Benneg 129
Panangiwanwan nga inted ni Joseph Smith a Propeta, iti Nauvoo, Illinois, idi 9 ti Pebrero 1843, a nangipakaammuanna kadagiti tallo a napateg a tulbek a pakailasinan iti umno a sasaaden dagiti agpapaay nga anghel ken espiritu (History of the Church, 5:267).
1–3, Agpadpada nga adda napagungar ken espiritu a bagi iti langit; 4–9, Naited dagiti tulbek a pakailasinan kadagiti mensahero iti likud ti kurtina.
1 Adda dua a kita ti tao iti langit, a managan: Dagiti anghel, a napagungar a kinatao, a nagtagilasag ken nagtagitulang—
2 Kas pagarigan, kinuna ni Jesus: Iggamannak ket kitaennak, ta saan a nagtagilasag ken nagtagitulang ti espiritu, a kas makita kaniak.
3 Maikadua: mapagbalin a naan-anay ti espiritu dagiti nalinteg a tao, isuda a saan a napagungar, ngem agtawidda iti isu met la a gloria.
4 No umay ti mensahero nga agkuna nga adda inkuyogna a mensahe a naggapu iti Dios, idiayayo ti dakulapyo ket dawatenyo a makidinnakulap.
5 No isu ti anghel aramidennanto, ket mariknayonto ti dakulapna.
6 No isu ti espiritu ti nalinteg a tao a nagbalin a naan-anay umayto iti dayagna; ta dayta laeng ti wagas a pannakapagpakitana—
7 Dawatenyo a makidinnakulap kadakayo, ngem saanto nga aggunay, gapu ta maisuppiat iti bilin kenkuana ti langit para iti nalinteg a tao a mangallilaw; ngem ipatungpalnanto latta ti mensahena.
8 No isu ti sairo a kasla anghel ti lawag, no dawatenyo a kadinnakulap idiayananto ti dakulapna, ket awan ti ania man a mariknayo; mailasinyo ngarud.
9 Dagitoy ti tallo a naindaklan a tulbek a pakaammuanyo no ti panangipatungpal ket naggapu iti Dios.