1 Faalogo mai ia, E outou e tagata o la’u ekalesia, ua fetalai mai ai le Alii lo outou Atua, ma faalogo mai i le afioga a le Alii e faatatau ia te outou—

2 O le Alii o lē o le a faafuasei ona afio mai i lona malumalu; o le Alii o lē o le a afio ifo i le lalolagi ma se fetuu e faamasino; ioe, i luga o atunuu uma ua faagalo le Atua, ma i luga o tagata lē amioatua uma o i totonu o outou.

3 Auā o le a faaali e ia lona aao paia i mata o atunuu uma, ma o le a vaai tuluiga uma o le lalolagi i le faaolataga a lo latou Atua.

4 O le mea lea, ia outou saunia, ia outou saunia, E lo’u nuu e; ia outou faapaia outou lava; ia outou faapotopoto faatasi, E outou e tagata o la’u ekalesia, i luga o le laueleele o Siona, outou uma ia e lei poloaiina e nonofo pea.

5 Ia outou o ese mai Papelonia. Ia mamā outou o e e tauaveina ipu a le Alii.

6 Talo a outou faapotopotoga mamalu, ma tautala pea lava pea le tasi i le isi. Ma ia tuu atu i tagata taitoatasi e valaau atu i le suafa o le Alii.

7 Ioe, e moni Ou te toe fai atu ia te outou, ua oo mai le taimi ua oo mai ai le siufofoga o le Alii ia te outou: Ia outou o ese mai Papelonia; ia outou faapotopoto i fafo mai atunuu, mai matagi e fa, mai le tasi tuluiga o le lagi i le isi.

8 Auina atu toeaina o la’u ekalesia i atunuu mamao; i motu o le sami; auina atu i laueleele ese; valaau atu i atunuu uma, muamua i Nuuese, ona sosoo lea ma tagata Iutaia.

9 Ma faauta, ma taga’i, o la latou alaga atu lenei, ma le siufofoga o le Alii i tagata uma: Inā outou o atu ia i le laueleele o Siona, ina ia mafai ona faalauteleina tuaoi o lo’u nuu, ma ina ia faamalolosia ona siteki, ma ina ia mafai ona alu atu o Siona i nofoaga o faataamilo ai.

10 Ioe, ia tuu atu le alaga ia alu atu i totonu o tagata uma: Ala mai ia ma tutulai mai ma o atu e faafetaia’i i le Faatoafaiavā; faauta ma taga’i, ua afio mai le Faatoafaiavā; ia outou o atu ia e faafetaia’i ia te ia. Ia saunia outou lava mo le aso tele o le Alii.

11 O lea, ia mataala, aua tou te lē iloa le aso po o le itula.

12 O lea, ia tuu atu ia te i latou, o e o i totonu o Nuuese ia sosola i Siona.

13 Ma ia tuu atu ia te i latou o e o Iuta ia sosola i Ierusalema, i mauga o le maota o le Alii.

14 Ia outou o ese mai totonu o atunuu, mai Papelonia lava, mai le lotolotoi o le amioleaga, o Papelonia faaleagaga lea.

15 Ae e moni, ua faapea ona fetalai mai o le Alii, ia lē faanatinatia la outou solaaga, ae ia tuu atu ia mua’i saunia mea uma i o outou luma; ma o ia o lē e alu, ia lē tuu atu ia te ia e tepa i tua ne’i faafuase’i ona oo mai o le faafanoga i ona luga.

16 Uai mai ia ma faalogo mai, E outou e ua nonofo i le lalolagi. Faalogo mai faatasi, outou toeaina o la’u ekalesia, ma faafofoga i le siufofoga o le Alii; aua ua valaau atu o ia i tagata uma, ma ua poloaiina e ia tagata uma o i soo se mea ia salamo.

17 Aua faauta, ua auina atu e le Alii le Atua le agelu ua alaga atu i le taulotoaiga o le lagi, ua fetalai atu; Ia outou saunia le ala o le Alii, ma faasa’osa’o ona ala, aua ua lata mai le itula o lona afio mai—

18 Pe a tulai le Tamai Mamoe i luga o le Mauga o Siona, ma se selau ma le fasefulu-fa afe faatasi ma ia, ua tusia i o latou muaulu le suafa o lona Tamā.

19 O le mea lea, ia outou saunia mo le afio mai o le Faatoafaiavā; ia outou o atu ia, ia outou o atu ia e faafetaia’i ia te ia.

20 Aua faauta, o le a tulai o ia i luga o le mauga o Olive, ma i luga o le vasa tele, le loloto tele lea, ma i luga o motu o le sami, ma i luga o le laueleele o Siona.

21 Ma o le a tulei atu e ia lona siufofoga i fafo mai Siona, ma o le a fetalai o ia mai Ierusalema, ma o le a faalogoina lona siufofoga i totonu o tagata uma;

22 Ma o le a avea o se siufofoga e pei o se leo o vai e tele, ma e pei o le leo o se faititili tele, o le a soloia ai i lalo mauga, ma o le a lē toe maua vanu.

23 O le a poloaiina e ia le loloto tele, ma o le a toe tulia i tua i itu-laueleele i matu, ma o le a avea motu ma laueleele e tasi;

24 Ma o le laueleele o Ierusalema ma le laueleele o Siona o le a toe faafoi i tua i o laua lava nofoaga, ma o le a avea lava le lalolagi e pei ona sa i ai i aso a’o lei vaevaeina.

25 Ma o le a tulai le Alii, le Faaola lava ia, i le lotolotoi o lona nuu, ma o le a nofotupu i luga o tagata uma.

26 Ma o i latou o e o loo i itu-laueleele i matu o le a manatua i luma o le Alii; ma o le a faalogo o latou perofeta i lona siufofoga, ma o le a latou lē toe taofi i latou lava; ma o le a latou taia papa, ma o le a tafe ifo i lalo le aisa i o latou luma.

27 Ma o le a lafoia se alatele i le totonugalemu o le loloto tele.

28 O o latou fili o le a avea o se vete ia te i latou,

29 Ma i totonu o toafa naumati o le a sau ai lepa o vai ola; ma o eleele maveve o le a lē toe avea o se laueleele matutu.

30 Ma o le a latou aumai a latou ’oa taua i fanau a Efaraima, o a’u auauna.

31 Ma o le a gatete tuaoi o mauga tumau e faavavau i o latou luma.

32 Ma o iina o le a latou faapa’u’ū ai i lalo ma faapaleina i le mamalu, i Siona lava, e lima o auauna a le Alii, le fanau lava a Efaraima.

33 Ma o le a faatumuina i latou i pese o le olioli tumau e faavavau.

34 Faauta, o le faamanuiaga lea a le Atua tumau e faavavau i luga o ituaiga o Isaraelu, ma le faamanuiaga ’oa tele atu i luga o le ulu o Efaraima ma ana aumea.

35 Ma o i latou foi o le ituaiga o Iuta, pe a mavae lo latou tiga, o le a faapaiaina i le paia i luma o le Alii, e nonofo i ona luma i le ao ma le po, e faavavau ma faavavau lava.

36 Ma o lenei, e moni ua fetalai mai le Alii, ina ia mafai ona iloa ia mea i totonu o outou, E outou e ua nonofo i le lalolagi, na Ou auina atu ai la’u agelu e lele atu i le taulotoaiga o le lagi, ua i ai le talalelei tumau e faavavau, o lē na faaali atu i ni isi ma tuu atu lea talalelei i tagata, o lē o le a faaali atu i le toatele o e ua nonofo i le lalolagi.

37 Ma o lenei talalelei o le a talai atu i atunuu uma, ma ituaiga, ma gagana, ma nuu.

38 Ma o le a o atu auauna a le Atua, ma fai atu ma le leo tele: Ia matata’u i le Atua ma avatu le viiga ia te ia, aua ua oo mai le itula o lana faamasinoga;

39 Ma ia tapuai atu ia te ia o lē na faia le lagi, ma le lalolagi, ma le sami, ma puna o vai—

40 Ma valaau atu i le suafa o le Alii i le ao ma le po, fai atu: E, pe a na e saeia le lagi, ma e afio mai i lalo, ina ia solo mai i lalo mauga i ou luma.

41 Ma o le a tali i luga o o latou ulu; ona o luma o le Alii o le a pei o le afi faaliusuavai e mumū, ma e pei o le afi e faapupuna ai le vai.

42 E, le Alii e, o le a e afio ifo e faailoa atu lou suafa i ou fili, ma o le a gatete atunuu uma i ou luma—

43 A e faia mea mata’utia, o mea latou te lei manatu i ai;

44 Ioe, a e afio mai i lalo, ma solo i lalo mauga i ou luma, o le a e faafetaia’i ia te ia o lē ua olioli ma faia le amiotonu, o lē ua manatuaina oe i ou ala.

45 Aua talu mai le amataga o le lalolagi e lei faalogo lava tagata pe na lagona i le taliga, pe na vaaia foi e se mata, e ese mai ia te oe, E le Atua e, le silisili o mea ua e saunia mo ia o lē e faatalitali ia te oe.

46 Ma o le a fai ane: O ai lenei ua afio ifo mai le Atua o i le lagi ma la’ei mumu; ioe, mai mea e lei faaalia, ua ofu i ona laei mamalu, ua afio mai i le silisiliese o lona malosi?

47 Ma o le a fai mai o ia: O A’u o lē e tautala i le amiotonu, ua malosi e faaola.

48 Ma o le Alii o le a mūmū ona ofu, ma o ona la’ei o le a pei o ia o lē e solia le tanoa-vine.

49 Ma o le a matua tele lava le mamalu i ona luma o le a natia ai e le la ona mata i le maasiasi, ma o le a taofi e le masina lona malamalama, ma o le a lia’i ese fetu mai i o latou nofoaga.

50 Ma o le a faalogoina lona siufofoga: Ua Ou solia toatasi le soliga-vine, ma Ou aumai le faamasinoga i luga o lo’u nuu atoa; ma sa leai ni isi sa faatasi ma a’u;

51 Ma sa Ou solia i latou i lo’u aasa, ma sa Ou soli i luga o i latou i lo’u ita, ma ua Ou sausau o’u ofu i lo latou toto, ma faapisipisia o’u ofu uma; ona o le aso lea o le tauimasui sa i ai i lo’u loto.

52 Ma o lenei ua oo mai le tausaga o a’u togiolaina; ma o le a latou ta’uta’ua le alofa agalelei o lo latou Alii, ma mea uma ua ia faaeeina i o latou luga e tusa ma lona lelei, ma e tusa ma lona alofa agalelei, e faavavau ma faavavau lava.

53 Sa puapuaga o ia i o latou puapuagatia uma. Ma o le agelu mai ona luma na laveaiina i latou; ma o lona alofa, ma o lona loto mafatia, na ia togiolaina ai i latou, ma amo ai i latou, ma tauave ai i latou i aso uma anamua;

54 Ioe, ma Enoka foi, ma i latou o e na faatasi ma ia; o perofeta o e na muamua ia te ia; ma Noa foi, ma i latou o e na muamua ia te ia; ma Mose foi, ma i latou o e na muamua ia te ia;

55 Ma e mai ia Mose ia Elia, ma mai ia Elia ia Ioane, o e na faatasi ma Keriso i lona toetu mai, ma le au aposetolo paia, faatasi ma Aperaamo, Isaako ma Iakopo, o le a i ai i luma o le Tamai Mamoe.

56 Ma o le a tatalaina tuugamau o le au paia; ma o le a latou o mai ma tutulai i le itu taumatau o le Tamai Mamoe, pe a tulai o ia i luga o le Mauga o Siona, ma i luga o le aai paia, o le Ierusalema Fou; ma o le a latou lagi le viiga o le Tamai Mamoe, i le ao ma le po e faavavau ma faavavau lava.

57 Ma o le pogai lenei, ina ia mafai ona maua e tagata mamalu sa faamoemoe e faaali mai, na auina mai ai e le Alii le atoatoaga o lana talalelei, lana feagaiga tumau e faavavau, ua talatala atu i le manino ma le faigofie—

58 E saunia ai e ua vaivai mo mea na o le a oo mai i le lalolagi, ma mo le feau a le Alii i le aso pe a faafememeaiina e e vaivai le au popoto, ma avea ai lē ua laitiiti ma atunuu malosi, ma faia ai e le toalua a laua sefulu o afe o fili ia sosola ese.

59 Ma i mea vaivai o le lalolagi o le a vaevaeesea ai e le Alii atunuu i le mana o lona Agaga.

60 Ma o le pogai lenei na tuu atu ai nei poloaiga; sa poloa’ia ia taofia i latou mai le lalolagi i le aso na tuu atu ai i latou, ae o lenei ia tuuina atu nei i tagata uma—

61 Ma ua tusa lenei ma le mafaufau ma le finagalo o le Alii, o lē ua pule i tagata uma.

62 Ma o ia o lē e salamo ma faapaiaina o ia lava i luma o le Alii o le a tuuina atu i ai le ola e faavavau.

63 Ma o i latou o e e lē faalogo i le siufofoga o le Alii, o le a faataunuuina i luga o i latou le mea na tusia e le perofeta o Mose, e tatau ona vavae ese i latou mai le nuu.

64 Ma le mea foi na tusia e le perofeta o Malaki: Aua, faauta, e oo mai le aso o le a mu ai e pei o se ogaumu, ma o e uma ua faamaualuluga, ioe, ma e uma ua faia amioleaga, o le a avea ma tagutugutu o saito; ma o le a oo mai le aso o le a susunuina i latou, ua fetalai mai ai le Alii o ’au, o le a lē tuua ai mo i latou se a’a po o se lala.

65 O le mea lea, o le a avea lenei ma tali a le Alii ia te i latou:

66 I lena aso na Ou alu atu ai i o’u lava, sa leai se tagata sa i totonu o outou sa taliaina a’u, ma sa tulia outou i fafo.

67 Ina ua Ou toe valaau atu sa leai se isi o outou e tali mai; e ui i lea sa lei faapuupuuina lava lo’u lima sa lē mafai ai ona Ou togiola atu, po o lo’u mana e laveai ai.

68 Faauta, o la’u aoaiga Ou te faapa’umātu ai le sami. Ou te faia vaitafe ia avea ma vaomatua; e manogi o latou i’a, ma mamate i le fia inu.

69 Ou te faaofuina le lagi i le pouliuli, ma faia ie talatala mo o latou ufiufi.

70 Ma o lenei mea o le a outou maua mai i lo’u lima—o le a outou taooto i lalo i le faanoanoa.

71 Faauta, ma taga’i, ua leai se tasi e laveaiina outou; aua sa outou lē usiusitai i lo’u leo ina ua Ou valaau atu ia te outou mai le lagi; sa outou lē talitonu i a’u auauna, ma ina ua auina atu i latou ia te outou sa outou lē taliaina i latou.

72 O le mea lea, ua latou faamaufaailogaina ai le molimau ma fusifusia ai le tulafono, ma sa tuuina atu outou i le pouliuli.

73 O i latou nei o le a o ese atu i le pouliuli i fafo, i le mea o i ai le tagitu’i, ma le tagiauē, ma le lilivau o nifo.

74 Faauta o le Alii lo outou Atua ua fetalai mai ai. Amene.