1 Mifala i biliv se God i stanemap ol gavman blong gud blong ol man; mo hem i mekem se man i mas ansa from ol aksen blong olgeta wetem ol gavman ia, tugeta, long saed blong mekem ol loa mo long saed blong mekem ol loa oli wok, blong gud mo sef fasin blong sosaeti.

2 Mifala i biliv se bae i no save gat wan gavman i stap long pis, be sapos nomo, oli mekem ol loa ia, mo holemtaet olgeta, mo givim long wanwan man fridom blong yusum tingting blong hem, raet mo kontrol ova long ol samting blong hem, mo i protektem laef blong hem.

3 Mifala i biliv se evri gavman i gat nid blong gat ol gavman ofisa mo majistret blong mekem man i folem ol loa long saed blong ol samting ia; mo olgeta ia we bae oli lukaot long loa folem wanem we i stret mo folem jastis, bae tingting blong man we i rul, o voes blong pipol, sapos hem i stap insaed long wan ripablik, i mas lukaotem mo sapotem olgeta ia.

4 Mifala i biliv se God i stanemap relijin; mo man i mas ansa long hem, mo long hem nomo, long fasin blong yusum relijin blong olgeta, be nomo sapos tingting blong relijin blong olgeta i pusum olgeta blong go agensem ol raet mo ol fridom blong ol narafala man; be mifala i no biliv se loa blong man i gat raet blong gat bisnis blong setemap ol rul blong wosip blong kontrolem ol tingting blong man, o talemaot fasin blong gat wosip long pablik o long ples we i haed; mifala i biliv se majistret blong loa i mas blokem fasin blong brekem loa, be i no save kontrolem tingting; i mas panisim rong, be i no mas karemaot fridom blong sol blong man.

5 Mifala i biliv se evri man i mas sapotem mo respektem ol wanwan gavman we oli stap long ples we oli stap long hem, be semtaem, ol loa blong ol gavman ia oli mas protektem olgeta long ol raet blong olgeta we i blong olgeta, mo ol raet ia we oli no save karemaot long man; mo sapos ol man ia oli gat fasin blong stiarem man blong faet, mo fasin blong man i faet agensem gavman, hemia i no stret mo oli mas kasem panismen folem hemia; mo we evri gavman i gat raet blong pasem ol loa we, folem wanem oli ting se i stret, i moa gud long intres blong pablik; be long sem taem, i holemtaet fridom blong tingting.

6 Mifala i biliv se evri man i mas kasem ona long wok we hem i gat, olsem ol man blong rul mo ol majistret, we oli putum olgeta blong protektem olgeta we oli no gat rong mo blong panisim olgeta we oli gat rong; mo se evri man oli mas gat respek mo oli mas folem ol loa, from se sapos i no gat olgeta, bae pis mo gudfala laef i lus mo fasin blong nomo gat loa mo fraet bae i tekem ples; from se oli bin stanemap ol loa blong man, from nomo, folem stamba tingting blong kontrolem ol intres blong yumi, olsem wanwan man mo woman, mo ol nesen, mo bitwin man mo narafala man; be ol tabu loa oli kam long heven blong givim ol rul long saed blong ol tingting blong yumi long saed blong spirit, from fet mo wosip, we i tufala samting we man i mas ansa from long Meka blong hem.

7 Mifala i biliv se ol man blong rul, ol kantri, mo ol gavman oli gat wan raet, mo oli gat wok ia blong mas pasem ol loa blong protektem evri sitisen blong oli gat fridom blong praktisim bilif blong olgeta long saed blong relijin; be mifala i no biliv se oli gat raet folem jastis, blong karemaot spesel janis ia long ol sitisen, o blong blokem olgeta long tingting we oli gat, sapos oli stap lukluk mo gat respek long ol loa mo sapos ol tingting ia long saed blong relijin oli no sapotem fasin blong stiarem tingting blong man blong faet, o oli no sapotem fasin blong mekem sikret plan.

8 Mifala i biliv se taem man i brekem loa, hem i mas kasem panismen we i folem loa ia we hem i brekem; se fasin blong kilim man i ded, fasin blong salem gavman o kantri, fasin blong fos blong tekem samting long man, fasin blong stil, mo fasin blong brekem pis we i stap long wan ples, long eni kaen wei, bae i mas gat panismen from fasin ia blong brekem loa mo fasin ia blong mekem ol nogud samting long medel blong ol man, tru long ol loa blong gavman ia we oli mekem rong ia long hem; mo blong mekem se i gat pis long pablik mo ples i kwaet, evri man i mas stanap mo yusum paoa blong olgeta blong tekem ol man ia, we oli brekem ol gudfala loa, oli mas kam blong kasem panismen.

9 Mifala i no biliv se i stret blong miksim paoa blong relijin wetem gavman we i stanap folem loa, blong mekem se wan sosaeti blong relijin i gat moa janis, mo wan narawan i nomo save gat raet blong glad long ol spesel janis blong hem long saed blong spirit, mo blong mekem se ol memba blong hem oli nomo gat ol raet blong olgeta olsem ol sitisen.

10 Mifala i biliv se evri sosaeti blong relijin oli gat wan raet blong stretem ol memba blong hem sapos oli gat ol rong fasin, mo hemia folem ol rul mo ol loa blong wanwan sosaeti ia; be hemia i hapen nomo sapos ol disiplin ia oli long saed blong ol raet blong olgeta olsem ol memba mo long saed blong ona blong olgeta; mo mifala i no biliv se eni sosaeti blong relijin i gat atoriti blong jajem man long saed blong raet blong olgeta long saed blong ol samting we oli gat, o long saed blong laef blong olgeta, o blong gat atoriti blong tekemaot ol samting blong olgeta we oli gat long wol ia, o blong putum laef o bodi blong olgeta i stap long denja, o blong givim olgeta ol panismen long bodi blong olgeta. Oli save sakemaot olgeta nomo long sosaeti blong olgeta, mo karemaot raet blong olgeta olsem ol memba.

11 Mifala i biliv se man i save askem loa blong kantri blong stretem evri rong mo rong fasin we oli mekem long hem, taem we man i mekem nogud long hem, o taem we nara man i karemaot raet blong hem long ol samting we hem i gat, taem i gat ol loa olsem we i stap protektem olgeta samting ia; be mifala i biliv se evri man i gat raet blong i difendem hemwan, ol fren blong hem, mo ol samting we hem i gat, mo gavman, long ol faet we i no folem loa mo fasin blong agensem raet blong evri man long taem blong hadtaem, long taem we oli no save askem loa blong kantri blong kasem help.

12 Mifala i biliv se i stret blong prijim gospel long ol nesen blong wol, mo givim woning long olgeta we oli stret mo gud blong oli sevem olgetawan long ol kruked fasin blong wol; be mifala i no biliv se i stret blong gat bisnis wetem fasin blong mekem man i slef, o blong prijim gospel, o blong baptaesem olgeta agensem tingting mo wanem we ol masta blong olgeta oli wantem; o blong gat tingting o tanem tingting blong olgeta blong mekem olgeta oli nomo hapi long kaen laef we oli gat long wol ia, mo long wei ia, putum laef blong man long denja; kaen fasin olsem blong blokem laef blong man, mifala i biliv se i no folem loa mo i no stret, mo i wan denja long pis blong eni gavman we i letem fasin blong man i stap olsem slef.