Seksen 17
Revelesen we Lod i givim, tru long Josef Smit, i go long Oliva Kaodri, Deved Witma, mo Martin Haris, long Feyet, Niu Yok, long Jun 1829, bifo oli bin luk ol buk we oli raetem rekod we i stap insaed long Buk blong Momon. Josef mo man we i stap raet blong hem, Oliva Kaodri, tufala i bin lanem aot long translesen blong Buk blong Momon, se bambae Lod i jusum 3 witnes (luk long Ita 5:2–4; Seken Nifae 11:3; 27:12). Oliva Kaodri, mo Martin Haris, tufala i bin harem gud tumas folem wan filing we i kam long Spirit blong wantem kam olgeta trifala spesel witnes. Profet i bin askem Lod, mo revelesen ia, Lod i givim olsem wan ansa tru long Yurim mo Tumim.
1–4, Tru long fet, bambae Olgeta Tri Witnes oli luk olgeta buk mo ol narafala tabu samting; 5–9, Kraes i testifae we Buk blong Momon i wan tabu buk.
1 Luk, mi talem long yufala, se yufala i mas trastem toktok blong mi, we sapos yufala i mekem wetem ful tingting blong hat blong yufala, bambae yufala i save luk olgeta buk, mo tu, jesplet, naef blong faet blong Leban, mo Yurim mo Tumim, we Lod i bin givim long brata blong Jared antap long hil, taem hem i bin luk fes blong Lod mo i bin toktok wetem hem, mo tu, bae yufala i luk ol samting we oli stap lidim Lihae olsem merikel, we God i givim long Lihae long taem we hem i stap long waelples, long ol boda blong Red Si.
2 Mo tru long fet blong yufala, bambae yufala i save luk olgeta samting ia, mo tu, tru long fet ia we ol profet blong bifo oli bin gat.
3 Mo afta we yu bin kasem fet, mo yufala i bin luk olgeta wetem ol ae blong yufala, bambae yufala i testifae abaot olgeta samting ia, tru long paoa blong God.
4 Mo hemia bambae yufala i mekem blong mekem se wokman blong mi, Josef Smit Junia, bae i no save lus, blong mi save mekem ol stret mo gud stamba tingting oli kamtru long ol pikinini blong man tru long wok ia.
5 Mo bambae yufala i testifae se yufala i bin luk olgeta samting ia, semmak olsem we wokman blong mi, Josef Smit Junia i bin luk olgeta; from we tru long paoa blong mi ia nao, hem i bin luk olgeta samting ia, mo from se hem i bin gat fet.
6 Mo hem i bin transletem buk ia, mo tu, pat ia we mi bin givim oda long hem blong hem i mekem, mo hemia i tru semmak olsem we Lod blong yufala mo God blong yufala i stap laef.
7 Taswe, yufala i bin kasem sem paoa ia, mo sem fet ia, mo sem presen ia semmak olsem blong hem.
8 Mo sapos yufala i mekem folem ol las komanmen ia blong mi, we mi givim long yufala, ol get blong hel bambae oli no save win agensem yufala; from gladhat blong mi i naf long yufala, mo bambae God i leftemap yufala long las dei.
9 Mo mi, Jisas Kraes, Lod blong yufala mo God blong yufala, i bin toktok long yufala, blong mi save mekem ol stret mo gud stamba tingting blong mi oli kamtru long ol pikinini blong man. Amen.