Mwakoro 18
Kaotioti nakon Iotebwa Timiti te Burabeti, Oliver Cowdery, ao David Whitmer, ae kaotaki i Fayette, New York, n Tuun 1829. Iroun te Burabeti, te kaotioti aei e kaotaki iai “weteakia abotoro ake tengaun ma uoman ni boong aika kaitira, ao kaetieti naba aika kaineti nakon katean te Ekaretia.”
1–5, Koroboki aika tabu a kaota aron katean te Ekaretia; 6–8, E a tawa n te buakaka te aonaba; 9–16, Kakawakia aomata e rang korakora; 17–25, Ni karekea te kamaiuaki, a riai aomata ni katoka i aoia aran Kristo; 26–36, E kaotaki weteaia ao aia mition Abotoro ake Tengaun ma Uoman; 37–39, Oliver Cowdery ao David Whitmer a na riai ni kakaeia naake Tengaun ma Uoman; 40–47, Ni karekea te kamaiuaki, a riai aomata n raira nanoia, ni bwabetitoaki, ao kawakini tua.
1 Ngkai, nooria, bukin te bwai ae ngkoe, au tia mwakuri ae Oliver Cowdery, ko bubuti n reiakinna mai irou, I anganiko taian taeka aikai:
2 Nooria, I a tia ni kaotia nakoim, mai iroun Tamneiu n taai aika mwaiti, bwa bwaai ake ko korei a bon koaua; mangaia are ko ataia bwa a bon koaua.
3 Ao ngkana ko ataia bwa a bon koaua, nooria, I anganiko te tua, bwa ko na onimakini bwai ake a koreaki;
4 Bwa a bon koreaki ni kabane bwaai akanne ibukin aan au ekaretia, au euangkerio, ao au bwa.
5 Mangaia are, ngkana ko katea au ekaretia, i aon aan au euangkerio ao au bwa, mataroan moone e na bon aki tokanikai i aom.
6 Nooria, e a tawa n te buakaka te aonaba; ao e riai bwa natia aomata a na kaungaki nakon te rairannano, taian Tientaire ao te bata are Iteraera naba.
7 Mangaia are, ibukina bwa ko a tia ni bwabetitoaki ni bain au tia mwakuri ae Iotebwa Timiti te Ataei, ni kaineti ma are I tuangnga, e a tia ni kakoroa bukin te bwai are I tuangnga.
8 Ao ngkai, tai miimi ngkai I weteia ibukin oin au kantaninga, ae te kantaninga ae e ataaki irou; mangaia are, ngkana e botumwaaka ni kaawakin au tua e na bon kakabwaiaaki n te maiu ae akea tokina; ao arana bon Iotebwa.
9 Ao ngkai, Oliver Cowdery, I taetae nakoim, ao nakoim naba David Whitmer, man tuangkami; bwa, nooria, I tuangia aomata ni kabane n taabo nako bwa a na raira nanoia, ao I taetae nakoimi, n ai aron Bauro are au abotoro, bwa kam bon weteaki n te wewete naba are e weteaki iai.
10 Uringnga bwa e korakora kakawakia aomata imatan te Atua;
11 Bwa, nooria, te Uea te Tia Kaboingkami e mate n te rabwata; mangaia ae e rinanon te maraki ibukiia aomata ni kabane, bwa aonga aomata ni kabane n raira nanoia ao n nakoina.
12 Ao e a tia ni manga uti mai buakoia mate, bwa e aonga ni kairia aomata ni kabane nakoina, ngkana a raira nanoia.
13 Ao ai korakora ra kimwareireina iroun te aomata ae e raira nanona!
14 Mangaia are, kam a weteaki bwa kam na takaruaea te rairannano nakoia aomata aikai.
15 Ao ngkana ngaia bwa kam na mwakuri n ami bong ni kabane n takaruaea te rairannano nakoia aomata aikai, ao ni kaira nakoiu, ngkana tii temanna te aomata nakoiu, ai korakora ra kimwareireimi ma ngaia n abanuean Tamau!
16 Ao ngkai, ngkana kimwareireimi e korakora ma temanna te aomata are kam kairia nakoiu n uean Tamau, ai korakora ra riki kimwareireimi ngkana kam kairiia aomata aika mwaiti nakoiu!
17 Nooria, iai au euangkerio ae tauraoi ibukimi, ao au bwa, ao au kamaiu.
18 Bubutiia te Atua n arau ma te onimaki, ni kakoua bwa e na reke, ao e na reke iroumi te Tamnei ae Raoiroi, are e na kaoti bwaai ni kabane ake a riai nakoia natiia aomata.
19 Ao ngkana akea ami onimaki, te kantaninga, ao te tangira ae kororaoi, kam aki kona ni karaoa te bwai teuana.
20 Tai kauntaeka ni kaaitaraia ekaretia, tii ngkana ana ekaretia te riaboro.
21 Katoka i aomi aran Kristo, ao taetaekina te koaua ma nanomi raoi.
22 Ao ni kabane aika raira nanoia ao ni bwabetitoaki n arau, ae Iesu Kristo, ao n teimatoa ni karokoa te toki, a na bon kamaiuaki.
23 Nooria, Iesu Kristo bon te ara ae e anga te Tama, ao bon akea te ara riki teuana are a na kamaiuaki iai aomata;
24 Mangaia are, a na riai aomata ni kabane ni katokaa te ara are e anga te Tama, bwa n te ara anne are a na weteaki iai n te kabanea ni bong;
25 Mangaia ae, ngkana a aki ataa te ara ae a na weteaki iai, a na akea nneia n abanuean Tamau.
26 Ao ngkai, nooria, iai tabeman ake a weteaki bwa a na taekina au euangkerio, nakoia Tientaire ao nakoia Iutaia;
27 Eng, naake Tengaun ma Uoman naba; ao naake Tengaun ma Uoman a na riki bwa au taan reirei, ao a na katoka arau i aoia; ao naake Tengaun ma Uoman bon ngaia ake a kukurei ni katokaa arau i aoia ma nanoia ni kabane.
28 Ao ngkana a tangiria ni katokaa arau i aoia ma nanoia ni kabane, a bon weteaki bwa a na nako n te aonaba n tataekina au euangkerio nakoia aomata nako.
29 Ao bon ngaiia ake a katabuaki irou bwa a na bwabetito n arau, ni kaineti nakon te bwai are e koreaki;
30 Ao e tauraoi te bwai are e koreaki ibukimi; ma ngaia are, kam riai ni karaoia ni kaineti nakon taeka ake a koreaki.
31 Ao ngkai I taetae nakoimi, naake Tengaun ma Uoman—Nooria, e tau au akoi ibukimi; kam riai n nakonako i nanon te raoiroi i matau ao n aki bure.
32 Ao, nooria, bon ngkami ake kam katabuaki irou bwa kam na katabuia ibonga ao tia reirei; n taekina au euangkerio, ni kaineti nakon mwaakan te Tamnei ae Raoiroi are iai iroum, ao ni kaineti nakon taian wewete ao taian bwaintituaraoi mai iroun te Atua nakoia aomata;
33 Ao Ngai, Iesu Kristo, ami Uea ao Atuami, I a tia n taekini.
34 Taeka aikai tiaki mai irouia aomata ke mai iroun te aomata, ma bon mai irou; mangaia are, kam riai ni kakoaua bwa bon mai irou ao tiaki mai iroun te aomata;
35 Bwa bon bwanaau are e taekini nakoimi; bwa kam anganaki au taeka ma iiroun Tamneiu, ao man mwaakau kam a kona ni wareki imarenami; ao a aki kona n reke iroumi ma ti man mwaakau;
36 Mangaia are, kam kona ni kakoaua bwa kam a tia n ongo bwanaau, ao n atai au taeka.
37 Ao ngkai, nooria, I anganiko, Oliver Cowdery, ao nakoim naba David Whitmer, bwa kam na kakaeia naake Tengaun ma Uoman, ake iai irouia tangiran bwaai ake I a tia n taekin;
38 Ao man bwai ake a tangiri ao aia mwakuri ae kam na kinaia iai.
39 Ao ngkana kam kuneia kam na kaoti bwaai aikai nakoia.
40 Ao kam na bwaka ni bobaraki n neboa te Tama n arau.
41 Ao kam na riai n tataekinna nakon te aonaba, ni kangai: Kam riai n raira nanomi ao ni bwabetitoaki, n aran Iesu Kristo;
42 Bwa aomata ni kabane a na riai n raira nanoia ao ni bwabetitoaki, ao tiaki tii mwaane, ma aine, ao ataei ake a roko n te roro ni bukinaki.
43 Ao ngkai, i mwin karekean aio iroumi, kam riai ni kawakini au tua ni bwaai ni kabane;
44 Ao man baimi N na karaoi mwakuri aika a kamimi i buakoia natiia aomata, ni kakoaua nakoia aika a mwaiti bwa a tia ni bure, bwa aonga n roko nakon te raira nano, ao bwa aonga n roko nakon abanuean Tamau.
45 Mangaia are, kakabwaia ake I anganingkami a bon rangi ni kakawaki nakon bwaai ni kabane.
46 Ao i mwin karekean aio iroumi, ngkana kam aki kawakini au tua kam aki kona ni kamaiuaki n abanuean Tamau.
47 Nooria, Ngai, Iesu Kristo, ami Uea ao Atuami, ao te Tia Kaboingkami, man mwaakan Tamneiu I a tia n taekini. Amen.