1 Anajwan, k’e reetal, sa’ xk’ab’a’ li k’a’ru kawaj laa’at, inmoos Oliver Cowdery, xnawb’al wik’in, nink’e aawe li aatin a’in:

2 K’e reetal, kink’utb’esi chawu, rik’in lin Musiq’ k’iila sut, naq yaal li k’a’aq re ru katz’iib’a; jo’kan naq nakanaw naq yaal.

3 Ut wi nakanaw naq yaal, k’e reetal, nink’e aawe jun taqlahom naq taakanab’ aawib’ chiru li k’a’aq re ru tz’iib’anb’il;

4 Xb’aan naq sa’eb’ a’an wan chi tz’iib’anb’il chixjunil li k’a’aq re ru chirix lix k’ojob’ankil lin iglees, lin evangelio, ut lin saqoonaq.

5 Jo’kan ut, wi taawaklesi lin iglees, sa’ xb’een li k’ojleb’aal re lin evangelio ut lin saqoonaq, li rokeb’aal xb’alb’a ink’a’ taanumtaaq sa’ aab’een.

6 K’e reetal, li ruchich’och’ yoo chi q’ano’k sa’ li maa’usilal; ut tento taa’uxq naq te’eek’asiiq li ralal xk’ajoleb’ li winq chixjalb’aleb’ xk’a’uxl, eb’ laj Gentil jo’ ajwi’ lix junkab’al laj Israel.

7 Jo’kan ut, jo’ kikub’e aaha’ xb’aan ruq’ lin moos aj Jose Smith, alalb’ej, jo’ chanru li k’a’ru kintaqla wi’, a’an xtz’aqob’resi ru li k’a’ru kintaqla wi’.

8 Anajwan ut, misach aach’ool naq kinb’oq a’an choq’ re tz’aqal li wajom, ut a’ ajom a’an nawb’il inb’aan; jo’kan ut, wi taawanq chi yalb’il xq’e sa’ xpaab’ankil lin taqlahom, a’an taa’osob’tesiiq toj sa’ li yu’am chi junelik; ut aj Jose xk’ab’a’ a’an.

9 Ut anajwan, at Oliver Cowdery, nakatwaatina laa’at, ut jo’kan ajwi’ laj David Whitmer, rik’in jun taqlahom; xb’aan naq k’e reetal, nintaqlaheb’ chixjunil li winq yalaq b’ar chixjalb’aleb’ xk’a’uxl, ut nekexwaatina laa’ex, jo’ chanru ajwi’ kiwaatina laj Pablo lin apostol, xb’aan naq b’oqb’ilex rik’in ajwi’ li b’oqok li kib’oqe’ wi’ a’an.

10 Chijultiko’q eere, nim lix loq’aleb’ li aamej sa’ rilob’aal li Dios;

11 Xb’aan naq k’ehomaq reetal, Li Qaawa’ laj Tojol eerix kixk’ul li kamk sa’ li tz’ejwalej; jo’kan naq kixk’ul lix rahileb’ chixjunileb’ li winq, re naq chixjunileb’ li winq te’ruuq chixjalb’al xk’a’uxl ut chi chalk rik’in.

12 Ut a’an xwakli chaq wi’chik sa’ xyanqeb’ li kamenaq, re naq taaruuq chixk’amb’aleb’ chaq chixjunil li winq rik’in, wi na’ux li jalb’a-k’a’uxlej.

13 Ut k’a’jo’ xsahil lix ch’ool rik’in li aamej li naxjal xk’a’uxl!

14 Jo’kan ut, b’oqb’ilex chixyaab’asinkil li jalb’a-k’a’uxlej chiru li tenamit a’in.

15 Ut wi taa’uxq naq texk’anjelaq chixjunil lee kutan sa’ xyaab’asinkil li jalb’a-k’a’uxlej chiru li tenamit a’in, ut teek’am chaq yal ta jun chi aamej wik’in, k’a’jo’aq xnimal xsahil eech’ool rochb’een a’an sa’ li rawa’b’ejihom lin Yuwa’!

16 Ut anajwan, wi nimaq xsahil eech’ool rik’in jun chi aamej li teek’am chaq wik’in sa’ li rawa’b’ejihom lin Yuwa’, k’a’jo’aq xnimal xsahil eech’ool wi teek’am chaq k’iila aamej wik’in!

17 K’ehomaq reetal, wan cheru lin evangelio, ut lin saqoonaq, ut lin kolb’a-ib’.

18 Chextz’aamanq chiru li Yuwa’b’ej sa’ lin k’ab’a’ chi wank eepaab’aal, rik’in xpaab’ankil naq texk’uluq, ut taawanq eerik’in li Santil Musiq’ej, li nak’utb’esink re chixjunil li k’a’aq re ru li aajel ru choq’ reheb’ li ralal xk’ajoleb’ li winq.

19 Ut wi maak’a’ eerik’in li paab’aal, li yo’onink, ut li rahok, maak’a’ nekexru chixb’aanunkil.

20 Maajun iglees teewech’, ka’ajwi’ lix iglees laj tza.

21 Chek’ul sa’ eeb’een lix k’ab’a’ li Kristo, ut cheye li yaal rik’in x’anchalil eek’a’uxl.

22 Ut jo’ k’ihaleb’ li neke’xjal xk’a’uxl ut neke’kub’e xha’ sa’ lin k’ab’a’, a’an li Jesukristo, ut neke’kuyuk toj sa’ roso’jik, a’aneb’ ajwi’ te’kole’q.

23 K’ehomaq reetal, li Jesukristo a’an li k’ab’a’ej k’eeb’il xb’aan li Yuwa’b’ej, ut maajun chik k’ab’a’ej k’eeb’il li taaruuq taakole’q wi’ li winq;

24 Jo’kan ut, chixjunileb’ li winq tento te’xk’ul sa’ xb’eeneb’ li k’ab’a’ej li k’eeb’il xb’aan li Yuwa’b’ej, xb’aan naq rik’in li k’ab’a’ej a’an te’b’oqe’q sa’ roso’jik li kutan.

25 Jo’kan ut, wi moko neke’xnaw ta li k’ab’a’ej li b’oqb’ileb’ wi’, ink’a’ taaruuq te’wanq xna’aj sa’ li rawa’b’ejihom lin Yuwa’.

26 Ut anajwan, k’ehomaq reetal, wankeb’ jalan chik li b’oqb’ileb’ chixch’olob’ankil lin evangelio, chiru laj Gentil jo’ ajwi’ chiru laj Judio;

27 Relik chi yaal, kab’laju ajwi’, ut li Kab’laju te’wanq choq’ intzolom, ut te’xk’ul sa’ xb’eeneb’ lin k’ab’a’; ut li Kab’laju a’anaqeb’ li te’ajoq re xk’ulb’al sa’ xb’eeneb’ lin k’ab’a’ chi anchal li rajomeb’ lix ch’ool.

28 Ut wi neke’raj xk’ulb’al sa’ xb’eeneb’ lin k’ab’a’ chi anchal li rajomeb’ lix ch’ool, b’oqb’ileb’ chi xik sa’ chixjunil li ruchich’och’ re xjultikankil lin evangelio chiru li junjunq li yo’ob’tesinb’il.

29 Ut a’aneb’ a’an li k’ojob’anb’ileb’ inb’aan re kub’sink ha’ sa’ lin k’ab’a’, jo’ chanru li k’a’ru tz’iib’anb’il;

30 Ut wan cheru li k’a’ru tz’iib’anb’il; jo’kan ut, tento teeb’aanu jo’ chanru li aatin li tz’iib’anb’il.

31 Ut anajwan nekexwaatina laa’ex, li Kab’laju—K’ehomaq reetal, tz’aqal li wusilal choq’ eere; tento texb’eeq chi tiik chiwu, ut ink’a’ texmaakob’q.

32 Ut, k’ehomaq reetal, laa’ex li k’ojob’anb’ilex inb’aan re xk’ojob’ankileb’ laj tij ut laj tzolonel, re xch’olob’ankil lin evangelio, jo’ chanru lix wankil li Santil Musiq’ej li wan eerik’in, ut jo’ chanru lix b’oqom ut lix maatan li Dios choq’ reheb’ li winq;

33 Ut laa’in, li Jesukristo, lee Qaawa’ ut lee Dios, kinyehok re.

34 Li aatin a’in moko reheb’ ta li winq chi moko re winq, we b’an laa’in; jo’kan ut teech’olob’ xyaalal naq we laa’in ut moko re ta winq;

35 Xb’aan naq a’an xyaab’ inkux li nayehok re cheru; xb’aan naq k’eeb’il xb’aan inMusiq’ choq’ eere, ut rik’in lin wankilal nekexru chirilb’al chi tz’iib’anb’il cherib’il eerib’, ut wi ta maawa’ xb’aan inwankilal moko taaruuq ta chi wank eerik’in;

36 Jo’kan ut, naru nekech’olob’ xyaalal naq eerab’ihom lix yaab’ inkux, ut nekenaw li waatin.

37 Ut anajwan, k’ehomaq reetal, nink’e aawe laa’at, Oliver Cowdery, ut re ajwi’ laj David Whitmer, naq teesik’eb’ chaq li Kab’laju, li te’wanq rajom jo’ li kin’aatinak wi’;

38 Ut rik’in li rajomeb’ ut lix k’anjeleb’ teenaweb’ ru.

39 Ut naq akaq xetaweb’ teek’ut li k’a’aq re ru a’in chiruheb’.

40 Ut teehupub’ eerib’ ut teeloq’oni li Yuwa’b’ej sa’ lin k’ab’a’.

41 Ut tento texjultikanq aatin chiru li ruchich’och’, ut teeye: Tento teejal eek’a’uxl ut taakub’eeq eeha’, sa’ lix k’ab’a’ li Jesukristo;

42 Xb’aan naq chixjunileb’ li winq tento te’xjal xk’a’uxl ut te’kub’eeq xha’, ut moko ka’aj ta wi’ eb’ li winq; li ixq b’an ajwi’, ut li kok’al li ak xe’tz’aqlok xchihab’ re te’ruuq chi teneb’aak.

43 Ut anajwan, chirix naq xek’ul a’in, tento teepaab’ lin taqlahom sa’ chixjunil li k’a’aq re ru;

44 Ut rik’in lee ruq’ laa’in tink’anjela jun sachb’a-ch’oolejil k’anjel sa’ xyanqeb’ li ralal xk’ajoleb’ li winq, toj reetal te’q’unb’esiiq xch’ool naab’al chirix lix maakeb’, re taaruuq te’chalq sa’ li jalb’a-k’a’uxlej, ut re taaruuq te’chalq sa’ li rawa’b’ejihom lin Yuwa’.

45 Jo’kan ut, li osob’tesink li nink’e eere taqenaq sa’ xb’een chixjunil li k’a’aq re ru.

46 Ut chirix naq xek’ul a’in, wi moko nekepaab’ ta lin taqlahom ink’a’ nekexru chi kole’k sa’ li rawa’b’ejihom lin Yuwa’.

47 K’ehomaq reetal, laa’in, li Jesukristo, lee Qaawa’ ut lee Dios, ut laj Tojol eerix, rik’in lix wankilal lin Musiq’ kinyehok re. Amen.