1 O le fana’e mai o le Ekalesia a Keriso i nei aso amuli, i le tasi afe valu selau ma le tolu sefulu tausaga talu le afio mai o lo tatou Alii ma le Faaola o Iesu Keriso i la le tino, ua faatulagaina ma faatuina aloa’ia e tusa ma tulafono a lo tatou atunuu, i le finagalo ma poloaiga a le Atua, i le masina lona fa, ma i le aso lona ono o le masina ua ta’ua o Aperila—

2 O ia poloaiga na tuuina mai ia Iosefa Samita, Le Itiiti, o lē na valaauina e le Atua, ma faauuina o se aposetolo a Iesu Keriso, e avea ma toeaina muamua o lenei ekalesia;

3 Ma ia Oliva Kaotui, o lē foi na valaauina e le Atua, ma faauuina e ia o se aposetolo a Iesu Keriso, e avea ma toeaina lona lua o lenei ekalesia;

4 Ma ua faia lenei mea e tusa ai ma le alofa tunoa o lo tatou Alii ma le Faaola o Iesu Keriso, o lē e ōu le mamalu uma, i le taimi nei atoa ma le faavavau. Amene.

5 Ina ua uma ona faaali moni mai i lenei toeaina muamua ua maua e ia se faamagaloga o ana agasala, sa toe lavelavea o ia i mea lē aoga o le lalolagi;

6 Ae ina ua uma ona salamo, ma faalotomaualaloina o ia lava ma le faamaoni, e ala i le faatuatua, sa tali mai le Atua ia te ia e ala i se agelu paia, o lē o ona fofoga sa pei o le uilaemo, ma o ona ofu sa mama ma papae silisili atu i luga o isi mea papae uma;

7 Ma tuu mai ia te ia poloaiga na musuia ai o ia;

8 Ma sa tuu mai ia te ia le mana mai i luga, e ala i auala na saunia muamua, e faaliliu ai le Tusi a Mamona;

9 Lea o loo i ai se talafaamaumau e uiga i se nuu pa’ū, ma le atoatoa o le talalelei a Iesu Keriso i Nuuese ma i Iutaia foi;

10 Lea na tuu mai e ala mai i le musumusuga, ma ua faamaonia i isi i le auaunaga a agelu, ma ua alaga atu i le lalolagi e i latou—

11 E faamaonia atu ai i le lalolagi ua moni tusitusiga paia, ma e musuia e le Atua tagata ma valaaulia i latou i lana galuega paia i ona po nei ma lenei tupulaga, e pei lava o tupulaga anamua;

12 Ua faaali mai ai o ia lava o le Atua e tasi o ananafi, i le asō, ma le faavavau. Amene.

13 O lea, ona ua latou maua ni molimau sili faapea, o i latou o le a faamasinoina ai le lalolagi, le toatele lava lea o i latou o le a mulimuli ane o mai i se malamalama o lenei galuega.

14 Ma i latou o e e taliaina i le faatuatua, ma faia le amiotonu, o le a latou maua se palealii o le ola e faavavau;

15 Ae o i latou o e e faamaaa o latou loto i le lē talitonu, ma tetee i ai, o le a liliu i lo latou lava tausalaga—

16 Ona o le Alii le Atua ua fetalaia; ma o i matou, o toeaina o le ekalesia, na faalogoina ma molimauina fetalaiga a le Afioga mamalu o i luga, o lē ia i ai le mamalu e faavavau ma faavavau lava. Amene.

17 E ala i nei mea ona matou iloa o loo i ai se Atua i le lagi, o lē ua lē gata ma faavavau, mai le tumau e faavavau i le tumau e faavavau o le Atua lava lea e tasi e lē mafeliuliuai, o lē na faia le lagi ma le lalolagi, ma mea uma o i ai;

18 Ma o ia na foafoaina le tagata, o le tane ma le fafine, e tusa ma lona lava faatusa ma i ona lava foliga, na foafoa ai e ia i laua;

19 Ma sa tuu atu ia te i laua poloaiga e tatau ona laua alolofa ma auauna atu ia te ia, le Atua soifua moni e toatasi, ma ia nao ia lava le tagata o lē e tatau ona la tapuai atu i ai.

20 Peitai o le soliga o nei tulafono paia na nautino ma faaletiapolo ai le tagata ma avea ai ma tagata pa’ū.

21 O le mea lea, na tuuina mai ai e le Atua Malosi Aoao lona Atalii Pele e Toatasi, e pei ona tusia i tusitusiga paia na ua tuuina mai e uiga ia te ia.

22 Sa mafatia o ia i faaosoosoga ae sa lē gauai atu i ai.

23 Sa faasatauroina o ia, maliu, ma toetu mai i le lona tolu o aso;

24 Ma sa afio a’e i le lagi, e afio i le aao taumatau o le Tamā, e nofotupu ma le mana malosi aoao e tusa ai ma le finagalo o le Tamā;

25 Ina ia mafai ona faaolaina le toatele o i latou o e e talitonu ma papatiso i lona suafa paia, ma tumau i le faatuatua e oo i le iuga—

26 E lē nao i latou o e na talitonu ina ua mavae ona afio mai o ia i le vaeluaga o taimi, i la le tino, ae o i latou uma mai le amataga, e oo lava i le toatele sa i ai ae lei afio mai o ia, o e na talitonu i upu a perofeta paia, o e na tautatala atu e pei ona sa musuia ai i latou e le meaalofa a le Agaga Paia, o e na molimau moni mai e uiga ia te ia i mea uma, e ao ona latou maua le ola e faavavau,

27 Faapea foi i latou o e o le a mulimuli mai, o e e talitonu i meaalofa ma valaauga a le Atua e ala i le Agaga Paia, o lē e molimau e uiga i le Tamā ma e uiga i le Alo;

28 O le Tamā lea, ma le Alo, ma le Agaga Paia o ni Atua ua tasi, e lē gata ma faavavau, ua aunoa ma se gataaga. Amene.

29 Ma ua matou iloa e ao i tagata uma ona salamo ma talitonu i le suafa o Iesu Keriso, ma tapuai atu i le Tamā i lona suafa, ma tumau i le faatuatua i lona suafa e oo i le iuga, a leai e lē mafai ona faaolaina i latou i le malo o le Atua.

30 Ma ua matou iloa, o le tauamiotonuina e ala i le alofa tunoa o lo tatou Alii ma le Faaola o Iesu Keriso ua tonu ma faamaoni;

31 Ma ua matou iloa foi, o le faapaiaga e ala i le alofa tunoa o lo tatou Alii ma le Faaola o Iesu Keriso ua tonu ma moni, ia i latou uma o e e alolofa ma auauna atu i le Atua ma o latou manatu atoa, mafaufau atoa, ma le malosi atoa.

32 Peitai ua i ai se avanoa e mafai ai ona pa’ū le tagata mai le alofa tunoa ma alu ese mai le Atua soifua;

33 O lea ia faaeteete ai le ekalesia ma tatalo e lē aunoa, ne’i pa’u’ū atu i latou i faaosoosoga;

34 Ioe, ma e oo lava ia te i latou o e ua faapaiaina ia faaeteete foi.

35 Ma ua matou iloa o nei mea ua moni ma ua tusa ma faaaliga a Ioane, ua lē faaopoopo i ai, pe ua toese mai valoaga a lana tusi, o tusitusiga paia, po o faaaliga a le Atua o le a oo mai i se taimi mulimuli e ala mai i le meaalofa ma le mana o le Agaga Paia, le siufofoga o le Atua, po o i le auaunaga a agelu.

36 Ma o le Alii le Atua na fetalaia; ma ia avatu le mamalu, mana ma le viiga i lona suafa paia, i le taimi nei atoa ma le faavavau. Amene.

37 O lenei foi, i se poloaiga i le ekalesia e uiga i le faiga o le papatisoga—O i latou uma o e e faalotomaualaloina i latou lava i luma o le Atua, ma mananao e papatiso, ma o mai i luma ma loto momomo ma agaga salamo, ma molimau atu i luma o le ekalesia ua latou salamo moni ia latou agasala uma, ma ua loto e ave i o latou luga le suafa o Iesu Keriso, ua i ai se naunautai e auauna atu ia te ia e oo i le iuga, ma faaali moni mai ia latou galuega ua latou maua le Agaga o Keriso mo le faamagaloina o a latou agasala, ia talia i totonu o lana ekalesia e ala i le papatisoga.

38 O le tiute o toeaina, ositaulaga, aoao, tiakono, ma tagata o le ekalesia a Keriso—O se aposetolo o se toeaina, ma o lona valaauga o le papatiso atu;

39 Ma faauu isi toeaina, ositaulaga, aoao, ma tiakono;

40 Ma faamanuia le areto ma le uaina—o faatusa o le tino ma le toto o Keriso—

41 Ma faamauina i latou o e ua papatiso i le ekalesia, ala i le faaee atu o lima mo le papatisoga i le afi ma le Agaga Paia, e tusa ai ma tusitusiga paia;

42 Ma aoao atu, faamalamalama atu, apoapoai atu, papatiso atu, ma leoleo le ekalesia;

43 Ma faamauina papatisoga o tagata o le ekalesia e ala i le faaee atu o lima, ma le tuuina atu o le Agaga Paia;

44 Ma taitai sauniga-lotu uma.

45 O toeaina e taitaia lotu e pei ona taitaia ai i latou e le Agaga Paia, e tusa ai ma poloaiga ma faaaliga a le Atua.

46 O le tiute o le ositaulaga o le talai atu, aoao atu, faamalamalama atu, apoapoai atu, ma papatiso atu, ma faamanuia le faamanatuga,

47 Ma asiasi atu i fale o tagata taitoatasi o le ekalesia, ma apoapoai atu ia te i latou ia tatalo faaleo ma faalilolilo ma auai atu i tiute uma faaleaiga.

48 Ma e mafai foi e ia ona faauu isi ositaulaga, aoao, ma tiakono.

49 Ma o ia e taitaia sauniga-lotu pe a leai se toeaina o auai;

50 Ae a i ai se toeaina o auai, e nao na ia talai atu, aoao atu, faamalamalama atu, apoapoai atu, ma papatiso atu,

51 Ma asiasi atu i fale o tagata taitoatasi o le ekalesia, ma apoapoai atu ia te i latou ia tatalo faaleo ma faalilolilo ma auai i tiute uma faaleaiga.

52 I nei tiute uma, e fesoasoani le ositaulaga i le toeaina pe afai e i ai se tulaga e manaomia ai.

53 O le tiute o le aoao o le leoleo lea o le ekalesia e lē aunoa, ma faatasi ma faamalosi i latou;

54 Ma vaai ia leai se amioletonu i totonu o le ekalesia, po o se feitagai o le tasi i le isi, po o se pepelo, faatuaupua, po o se taufaaleaga;

55 Ma vaai ia potopoto faatasi soo le ekalesia, ma vaai foi ia fai e tagata uma o le ekalesia o latou tiute.

56 Ma o ia e taitaia sauniga-lotu pe a lē o i ai se toeaina po o se ositaulaga—

57 Ma e fesoasoani i ai tiakono i taimi uma, i ona tiute uma i le ekalesia, pe afai e i ai i se tulaga e manaomia ai.

58 Peitai ua lē i ai i aoao po o tiakono le pule e papatiso atu ai, faamanuia ai le faamanatuga, pe faaee atu ai lima;

59 E ui i lea, latou te lapatai atu, faamalamalama atu, apoapoai atu, aoao atu, ma valaau atu i tagata uma ia o mai ia Keriso.

60 O toeaina, ositaulaga, aoao, po o tiakono uma taitoatasi, ia faauuina e tusa ai ma meaalofa ma valaauga a le Atua ia te ia; ma ia faauu o ia e ala i le mana o le Agaga Paia, lea e i ai i le tagata e faauuina o ia.

61 O toeaina ua tino i ai lenei ekalesia a Keriso, ia faapotopoto i le konafesi e faa-tasi i le tolu masina, pe mai lea taimi i lea taimi, e pei ona atofaina ma faatonuina e lenei konafesi;

62 Ma o ia konafesi ia faia ai soo se mataupu faale-ekalesia e tatau ona faia i lea taimi.

63 E tatau i toeaina ona maua o latou laisene mai isi toeaina, e ala i le siilima a le aulotu ua latou auai, pe mai i konafesi.

64 E mafai e ositaulaga, aoao, po o tiakono taitoatasi, o se na faauuina e se ositaulaga, ona ave se tusi faamaonia mai ia te ia i lea lava taimi, le tusi faamaonia lea, a tuu atu i se toeaina, o le a agavaa ai o ia mo se laisene, lea o le a tuu atu ai ia te ia le pule e fai ai tiute o lona valaauga, pe mafai ona maua e ia lea laisene mai i se konafesi.

65 Ia leai se tagata e faauu i soo se tofi i le ekalesia lenei, i mea ua i ai se paranesi faatulagaina tatau o lea lava ekalesia, e aunoa ma le siilima a lena aulotu;

66 Ae o toeaina pulefaamalumalu, epikopo femalagaai, fautua maualuga, faitaulaga sili, ma toeaina, e mafai ona latou maua le avanoa o le faauu atu, i mea e lē o i ai se paranesi o le ekalesia e mafai ona fai ai o se siigalima.

67 O peresitene taitoatasi o le perisitua maualuga (po o le toeaina pulefaamalumalu), epikopo, fautua maualuga, ma le faitaulaga sili, ia faauu e ala i le taitaiga a se aufono maualuga, po o le konafesi aoao.

68 O le tiute o tagata o le ekalesia pe a uma ona talia o i latou e ala i le papatisoga—E tatau i toeaina po o ositaulaga ona maua se taimi ua lava, e faamalamalama atu ai mea uma e uiga i le ekalesia a Keriso ina ia latou malamalama, ae lei taumamafa i latou i le faamanatuga ma faamauina o latou papatisoga e ala i le faaee o lima o toeaina, ina ia faia mea uma i le faasologa tatau ai.

69 Ma ia faaali atu e tagata o le ekalesia i luma o le ekalesia, ma i luma foi o toeaina, e ala i le savali ma le tautala amio-atua, ua latou agavaa i ai, ina ia mafai ona i ai o galuega ma le faatuatua e tusa ai ma tusitusiga paia—ma savavali ma le paia i luma o le Alii.

70 E tatau i tagata taitoatasi o le ekalesia a Keriso ua i ai fanau, ona aumai i latou i toeaina i luma o le ekalesia, o e e tatau ona faaee o latou lima i luga o i latou i le suafa o Iesu Keriso, ma faamanuia i latou i lona suafa.

71 E leai se tasi e mafai ona talia i le ekalesia a Keriso vagana ai ua oo o ia i tausaga agavaa e tatau ai i luma o le Atua, ma ua mafai ona salamo.

72 O le papatisoga e tatau ona faia i le ala lea o le a sosoo ai, ia i latou uma o e ua salamo—

73 O le tagata ua valaaulia e le Atua ma ua i ai le pule mai ia Iesu Keriso e papatiso atu ai, ia o ifo i lalo i le vai faatasi ma le tagata ua tuuina mai o ia lava e papatiso, ma valaau o ia i lona igoa, ma fai atu: Ona ua tofia a’u e Iesu Keriso, ou te papatiso ia te oe i le suafa o le Tamā, ma le Alo, ma le Agaga Paia. Amene.

74 Ona ia faatofu ai lea o ia i le vai, ma toe alu a’e ai mai le vai.

75 E tatau ona potopoto soo faatasi le ekalesia e taumamafa i le areto ma le uaina i le faamanatuina o le Alii o Iesu;

76 Ma o le toeaina po o le ositaulaga ia faamanuiaina; ma o le ala lenei ia faamanuia ai e ia—ia tootuli o ia faatasi ma le ekalesia ma valaau atu i le Tamā i le tatalo faamaoni, fai atu:

77 Le Atua e, le Tamā Faavavau, matou te ole atu ia te oe i le suafa o lou Alo, o Iesu Keriso, ia e faamanuiaina ma faapaiaina lenei areto i agaga o i latou uma o e e fetagofi i ai, ina ia latou taumamafa i le faamanatuina o le tino o lou Alo, ma molimau atu ia te oe, le Atua e, le Tamā Faavavau, latou te loto ina ave i o latou luga le suafa o lou Alo, ma manatua pea o ia ma tausi i ana poloaiga ua ia tuuina mai ia te i latou; ina ia latou maua pea lona Agaga e faatasi ma i latou. Amene.

78 O le ala e faamanuia ai le vai—ia ave foi e ia le ipu, ma fai atu:

79 Le Atua e, le Tamā Faavavau, matou te ole atu ia te oe i le suafa o lou Alo, o Iesu Keriso, ia e faamanuiaina ma faapaiaina lenei uaina i agaga o i latou uma o e e feinu ai, ina ia latou faia i le faamanatuina o le toto o lou Alo, sa faamaligiina mo i latou; ina ia latou molimau atu ia te oe, le Atua e, le Tamā Faavavau, latou te manatua pea o ia, ina ia latou maua lona Agaga e faatasi ma i latou. Amene.

80 Soo se tasi o tagata o le ekalesia a Keriso ua solitulafono, pe maua ua faia se sese, ia faia ia te ia e pei ona faasino mai i tusitusiga paia.

81 Ia fai ma tiute o aulotu eseese, ua tino ai le ekalesia a Keriso, le auina atu o se toatasi, pe sili atu o o latou aoao e auai i konafesi eseese e faia e toeaina o le ekalesia,

82 Faatasi ma se lisi o igoa o tagata eseese ua auai i latou lava faatasi ma le ekalesia talu mai le konafesi ua mavae; pe auina atu i le lima o se ositaulaga; ina ia mafai ona tausia o se lisi tatau ai o igoa uma o le ekalesia atoa i se tusi, e se tasi o toeaina, po o ai lava e tofia e isi toeaina mai lea taimi i lea taimi;

83 O lenei foi, pe afai e i ai ni isi ua faatea mai i le ekalesia, ina ia mafai ona soloia ese o latou igoa i fafo mai le talafaamaumau aoao o igoa o le ekalesia.

84 O tagata uma o le ekalesia e o ese atu mai le aulotu ua latou nonofo ai, afai e o atu i se aulotu ua lē iloa ai i latou, e mafai ona latou ave o se tusi e faamaonia ai, o i latou o tagata auai ma tulelei o le ekalesia, ma e mafai ona saini lea tusi faamaonia e soo se toeaina po o se ositaulaga, pe afai o le tagata o le ekalesia e mauaina le tusi, e masani lelei ma le toeaina po o le ositaulaga, pe mafai foi ona saini e aoao po o tiakono o le ekalesia.