Seksen 23
Wan laen blong faef revelesen we God i givim tru long Profet Josef Smit, long Manjesta, Niu Yok, long Epril 1830, i go long Oliva Kaodri, Haeram Smit, Samuel H. Smit, Josef Smit Senia, mo Josef Naet Senia. From we ol faevfala man ia we nem blong olgeta i stap ia, oli bin wantem tumas blong save wanwan diuti blong olgeta, Profet i bin askem Lod mo i bin kasem revelesen ia long saed blong wanwan man ia.
1–7, Lod i singaotem ol fas disaepol ia blong prij, blong askem strong, mo mekem Jos i kam strong moa.
1 Luk, mi toktok long yu, Oliva, mi toktok smol nomo. Luk, mi mi blesem yu mo yu no stap anda long wan panismen. Be lukaot long fasin blong gat hae tingting, sapos no bae yu foldaon long temtesen.
2 Mekem se oli save koling blong yu long jos, mo tu, long fored blong wol, mo hat blong yu bae i open blong prijim trutok stat long taem naoia i go mo blong oltaem. Amen.
3 Luk, mi toktok long yu, Haeram, mi toktok smol nomo; from we yu tu, yu no stap anda long panismen, mo hat blong yu i open, mo tang blong yu i fri; mo koling blong yu i blong askem strong long ol man, mo blong gohed blong mekem jos i kam strong moa oltaem. Taswe, diuti blong yu i blong jos blong oltaem, mo hemia, from famli blong yu. Amen.
4 Luk, mi toktok smol nomo long yu, Samuel; from we yu tu, yu no stap anda long panismen, mo koling blong yu i blong askem strong long ol man, mo blong mekem jos i kam strong moa; mo yu, oli no singaotem yu yet blong prij long fored blong wol. Amen.
5 Luk, mi toktok smol nomo long yu, Josef; from we yu tu, yu no stap anda long panismen, mo koling blong yu tu i blong askem strong long ol man, mo blong mekem jos i kam strong moa; mo hemia diuti blong yu stat long taem naoia i go mo blong oltaem. Amen.
6 Luk, mi talemaot long yu, Josef Naet, tru long ol toktok ia, se yu mas karem kros blong yu, long wei we yu mas prea long wan voes we i laod long fored blong wol, mo tu, long sikret, mo insaed long famli blong yu, mo long medel blong ol fren blong yu, mo long evri ples.
7 Mo, luk, hem i diuti blong yu blong joenem tru jos, mo givim toktok blong yu blong talem ol gud toktok long ol man oltaem, blong yu save kasem pei blong man we i stap wok. Amen.