Wóltaʼii 28
Diyin Yá Yáłtiʼí Joseph Smith díí diyingo bił ííshją́ą́ ályaa éí Oliver Cowdery yee yił hodoolnih biniyé, Fayette, New Yorkdi, Biniʼantʼą́ą́tsoh 1830 yihahgo. Hiram Page, Sodizin atah nilį́, éí tsé léíʼ neiʼá dóó diyingo shił ííshją́ą́ ályaa ní éí bíkáʼanálwoʼgo Zion hadidoolnííł dóó Sodizin bee yilwoł doo. Díkwííshį́į́ sodizin atah danilínígíí díí yóóʼadabinííʼaaʼ, dóó Oliver Cowdery ndi atah yóóʼabidiʼnootʼaaʼ. Kʼadę́ę́ ntsaago áłah aleehgo, Diyin Yá Yáłtiʼí Diyin Bóhólníihii néíyookąąhgo díí yínaʼádéíłkid, áádóó díí diyingo bił ííshją́ą́ ályaa.
1–7, Joseph Smith éí tʼáá aaníinii tʼah doo béédahoozįįhígíí bibee ąą ńdaditį́hí dahyoojih, áádóó tʼáá bí tʼéiyá Sodizin bá diyingo bił ííshją́ą́ ályaa; 8–10, Oliver Cowdery éí Laman dineʼé neidínóotį́į́ł; 11–16, Chʼį́įdii éí Hiram Page yinaʼazloʼ dóó ił ííshją́ą́ ályaaígíí doo ákódaatʼéhígíí yaayiizlá.
1 Áko shooh, shí ánidishní, Oliver, sodizin daʼatahígíí tʼáá ałtso Aaʼáhályáanii binahjįʼ nánítingo dandidootsʼį́łígíí naadoolyééł, éí diyingo ił ííshjání ádaalyaaígíí dóó bee hazʼáanii bídadéétʼiʼígíí naahélá.
2 Ákondi, shooh, tʼáá aaníí, tʼáá aaníigo, ándishní, tʼáá háiida doo bikʼihodidoonih dah bee hazʼáanii dóó diyingo íł ííshją́ą́ ályaa díí sodizin biyiʼ doo baa doolyeeł da tʼáá hazhóʼí shá naalʼaʼí Joseph Smith, Jun. tʼéiyá, háálá éí Mosesgiʼ átʼáo baadahidoolyééł.
3 Áádóó baa hashłéhígíí bikʼeh honíłʼį́į doo, Aarongiʼ átʼáo, éí adziilii dóó óhólníihii bee sodizin daʼatahígíí, bee hazʼáanii dóó diyingo íł ííshją́ą́ ádaalyaiígíí bá hodínísingo bee nanítin doo.
4 Áádóó tʼáá hoolzhishgi Aaʼáhályáanii bee hadíídzihígíí dóó bee naʼdíníítį́łígíí naayiiléego, doodago tʼáá ahą́ą́h sodizin daʼatah bichʼįʼ hadíídzih nidiʼníigo, tʼáá áko beʼdíílííł.
5 Ákondi doo niʼdíízoh da niʼdooniidgo, ndi hodzáanii bikʼehgo tʼéiyá;
6 Áádóó nitsijįʼ sizínígíí tʼáadoo bitsiʼjįʼ naʼídílteehí, sodizin yilą́ąjįʼ sizínígíí ałdóʼ;
7 Háálá éí tʼáá aaníinii tʼah doo béédahoozįįhígíí bibee ąą ńdaditį́hí baaníjaaʼ, dóó éí diyingo ił ííshją́ą́ ályaaígíí kʼad ahídadiiljééʼ, éí nááná łaʼ bitséskʼeh góneʼ bikʼináádiishniiʼgo índá.
8 Áádóó áko, shooh, ándishní Laman dineʼé bitahgóó díínááł dóó shinaʼnitin bee yisdáʼiildéehii bee ndabidíníítįįł; áádóó bee nanítinígíí deiyoosdląądgo shisodizin bitah ndootʼááłgo ádíílííł; áádóó diyingo ił ííshją́ą́ ályaaígíí naa halyée doo, ákondi nidíízohgo éí dooda.
9 Áádóó áko, shooh, shí andishní tʼah doo ííshją́ą́ álnééh da, dóó doo łaʼ diné bił bééhózin da háadi kin dahshijaaʼ Zion ádoolníłígíí, ákondi náasdi baa hodoonih. Áko shooh, shí andishní Laman dineʼé bikéyah binaagóó ndooʼnił.
10 Ntsaago áłah azlį́į́ʼ bikééʼdóó índa kodóóʼ dahdidíínááł; áádóó shá naalʼaʼí Joseph éí ntsaago áłah aleehdi bikʼih bóhólníihgo bikʼihodidoonih éí dineʼé ádaaníigo, áádóó yee nił hodoolnihígíí baa hodíílnih.
11 Áádóó ałdóʼ, nikʼis, Hiram Page bił dahdidííʼash, tʼáá nihí tʼéiyá, dóó tʼáá sáhígo bił chʼídííʼááł éí tsé bitsʼą́ą́dóó neiyiizohę́ę doo shí shitsʼą́ą́dę́ę́ʼ átʼée da áádóó Chʼį́įdii éí binaʼazloʼ;
12 Háálá, áko shooh, díí tʼah doo bee bikʼidahodiinííh da, áádóó díí sodizinjí daʼatahígíí nídabidiʼdooltééłgo éí díí sodinzinjí diyingo bee ahadaʼdeestʼánígíí doo kʼídeidooti da.
13 Háálá tʼáá ałtsoní hashtʼeʼhodítʼéego ádaʼalʼį́, áádóó sodizin daʼatahígíí yee lą́ ńdaʼałeehgo ádaʼalʼį́, oodląʼ bee sohodizingo.
14 Áádóó díí tʼáá ałtso hashtʼedidootʼeełgo bee ákáʼadíílwoł, tʼah doo Laman dineʼé bitahgóó dahdinááhdą́ą́ʼ, sodizin diyingo bibee ahadaʼdeestáanii bikʼehgo.
15 Áádóó hahgo dahdidíínááł, dóó nídíídááłjįʼ, dóó haadííníłígíí ałdóʼ bee nił hodoonih.
16 Áádóó tʼáá ahą́ą́h baa hólneʼ doo, shinaʼnitin bee yisdáʼiildéehii baa nił hózhǫ́ǫgo baa hólneʼ dooleeł. Amen.