Wóltaʼii 57
Diyin Yá Yáłtiʼí Joseph Smith díí diyingo bił ííshją́ą́ ályaa, Zion, Jackson County hahoodzohgi, Missouridi, Yaʼiishjááshtsoh 20, 1831 yihahgo. Éí Diyin Bóhólníihii Missourigóó doohkah yił ninée bikʼehgo, áadi Bí “kéyah baadahideestʼánée yił ííshją́ą́ íídoolííł” (section 52), elders Ohio dóó ńléí Missouri eʼeʼaahjįʼ yíkai. Joseph Smith éí Laman dineʼé bił áhootʼéhígíí yéego yaa ntsédeezkééz dóó ayóó átʼáo yaa bił ádzaa: “Hahgo shąʼ diné doo kééhatʼínídi chʼó nahalingo dínóótʼį́į́ł? Hahgo shąʼ Zion ayóó átʼéego hadidoolnííł, dóó haaʼígi lá Ni nighan ntsaaígíí siʼą́ą doo, éí akéedi yoołkáałdi nihokááʼ dineʼé dahdeiyínéhígíí tʼáá átʼé áajįʼ nihidookah?” Éí bikéédóó díí diyingo ííshją́ą́ ályaa.
1–3, Independence, Missouri hazʼą́ądi, éí Zion Kindashijaaʼ dóó Diyin bighan ntsaaígíí hadidoolnííł; 4–7, Áadi Diyin Yikééʼ Naazíinii kéyah ndeidiyoołnih dóó áadi kéyah baa dahididootʼááł; 8–16, Sidney Gilbert éí naalyéhí báhoghan łaʼ neidooʼááł, William W. Phelps éí naaltsoos bikʼeʼéschí ííłʼíní dooleeł, áádóó Oliver Cowdery éí naaltsoos hahinidéhígíí néínílʼį́įgo neiłkaah doo.
1 Daʼíísínółtsʼą́ą́ʼ, O elders shisodizinjí atah danohłínígíí, ní Bóhólníihii nihiDiyin God, shibee hazʼáanii bikʼehgo, díí kéyah bikáaʼgi, áłah soolį́ʼígíí, éí Missouridi kéyahígíí átʼé, éí kéyah Diyin yikééʼ naazíinii yikááʼ áłah ndaadleeh doogo baadiníʼą́ dóó hodiyingo bá ííshłaa.
2 Ákohgo, díí éí kéyah bee ahaʼdeetʼą́ átʼé, dóó Zion kin dashijaaʼ hádidoolnííłgi átʼé.
3 Áádóó kótʼáo Bóhólníihii nihiDiyin God kóní, hódzą́ shaa doolyééł nínízingo éí kʼad kǫ́ǫ́ bee ééhózinii. Áko shooh, kʼad Independence hazʼą́ągi bee wójíhígíí éí ałʼnííʼgi hazʼą́ átʼé; áádóó Diyin bighan ntsaa hadidoolníłígíí éí eʼeʼaahjigo bá hooʼaʼ, éí aadahwiinítʼį́ bá hooghan tʼáá áhánígóó bíighahgi.
4 Ákohgo, Diyin yikééʼ naazíinii kéyah ndeidiyoołnihgo éí baa hódzáanii átʼé, áádóó ałdóʼ tʼáá ałtso kéyah eʼeʼaahjigo siláhígíí, ńléí Jew dineʼé dóó Gentile dineʼé bá ídzohjįʼ ndi;
5 Áádóó tʼáá ałtso chʼil deiyíláadi daʼídzoohígíí ałdóʼ, éí shikééʼ naazʼíinii kéyah ndeidiyoołnih yídeiyíghahígíí bikʼehgo. Áko shooh, díí hódzą́ átʼé, áko díí éí hoolʼáágóó daabí dooleełgo baa dahidoolyééł.
6 Áádóó bíniʼdii shá naalʼaʼí Sidney Gilbert éí naanish bee bikʼidiishniiʼígíí íídoolííł, béeso baa hinidééhgo yaa áhályą́ą doo, éí sodizinjí yá sizį́įgo naalnish doo, tʼáá ałtso binaagóó kéyah ndahazʼánígíí neidilyoołnih, tʼáá yáʼátʼéehgo áʼdoolníłígíí, dóó hódzą́ągo hootʼáłígíí bikʼehgo.
7 Áádóó bíniʼdii shá naalʼaʼí Edward Partridge éí naanish bee bikʼidiishniiʼígíí íídoolííł, dóó Diyin yikééʼ naazíinii tʼáá aheełtʼéego baa dahideestʼánígíí yeedooleeł, Shí bee bichʼįʼ haasdzíʼígíí bikʼehgo ndi; áádóó bikáʼadoojahgo neiyiizláʼígíí ałdóʼ.
8 Áádóó áłdóʼ, Shí tʼáá aaníigo nihichʼįʼ haasdziih, bíniʼdii shá naalʼaʼí Sidney Gilbert ákweʼé kééhatʼį́į dooleeł, dóó naalyéhí bá hoghan niidooʼááł, áko doo biyoochʼíídgóó nalyéhí baa nahaniih doo, áko éí béesoígíí Diyin yikééʼ naazíinii yee yíkáʼadoowołgo kéyah yá neidiyoołnih, áádóó hastʼóí naakitsʼáadah bikʼidahodiiniiʼígíí haʼátʼííshį́į́ deinízinígíí yá neidiyoołnih áko kéyah baa dahideestʼánígi ndahidoonééł.
9 Áádóó ałdóʼ bíniʼdii shá naalʼaʼí Sidney Gilbert naaltsoos bikʼehgo naʼanishígíí chóídoołtʼeeł—áko shooh díí éí hódzą́ átʼé, áádóó tʼáá háíshį́į́ díí yíídóółtahígíí bíniʼdii díí yikʼidiitįįh—áko dineʼé naalyéhí ałdóʼ yichʼįʼ kwíídoolííł, áádóó bá ndaalnishígíí éí yichʼįʼ yidoołʼaałgo áadi deidoojih;
10 Áádóó ákótʼáo shikééʼ naazínígíí yikáʼadoojah, áko shinahatʼá bee yisdáʼiildéehii chahałheeł yiiʼ kéédahatʼínígíí dóó chahaʼohgóó nidaháaztą́ą́ nítʼéʼígíí bee ndinóotįįł.
11 Áádóó áłdóʼ, Shí tʼáá aaníigo nihichʼįʼ haasdziih, bíniʼdii shá naalʼaʼí William W. Phelps ákweʼé kééhatʼį́į dooleeł, dóó sodizinjí dah ooldahígíí yá naaltsoos bikʼeʼéschí ííłʼíní nilį́į doo.
12 Áádóó shooh níníłʼį́, nihokááʼ dineʼé akʼeʼéschí áyiilaaígíí deiyoosdląądgo—áko shooh díí hódzą́ átʼée doo—bíniʼdii tʼáá haʼátʼííshį́į́ néídidooléłígíí Diyinkʼehgo oodááł bikʼehgo néídidoolééł, háálá éí Jesus yikééʼ naazíinii bá yáʼátʼééh doo.
13 Áádóó bíniʼdii shá naalʼaʼí Oliver Cowdery yíkáʼadoolwoł, Shí bee nihichʼįʼ haasdzíʼígi átʼáo, hazʼą́ągi bá bikʼidiishniiʼígi, yééʼdoolííł, dóó naʼasdzoh hashtʼéídoolííł, dóó neididoonił, áko tʼáá ałtsoní shidááhgi tʼáá ákótʼée doo, éí éíí Iiʼ Sizį́ Diyinii binahjįʼ bí íʼiilaaígíí tʼáá aaníí átʼéego bééhodoozįįł.
14 Áádóó ákótʼáo bíniʼdii tʼáá ałtso baa haasdzíʼę́ę Zion kéyahgi nidahidoonééł, tʼáá tsxį́łígo, bichʼooní dóó baʼáłchíní yił, áko baa haasdzííʼyę́ę yedaʼdoolííł.
15 Áádóó áko ałhanaʼiildééh bídéétiʼgo—Bíniʼdii bishop dóó bikáʼanálwoʼii hooghan hazʼą́ díí kéyahjįʼ ndahidoohnééł bidííniidyę́ę yá hashtʼedahodoolííł, tʼáá tsxį́łígo, dóó bíniʼdii kéyah baa dahideestʼánéejįʼ ndahidoonééł.
16 Áádóó tʼáá áłah elders dóó sodizin daʼatah łaʼígíí éí tʼáá náásgóó ádaʼdoolíłígíí tʼah índa bee bił hodoonih. Tʼáá ákótʼée doo. Amen.