Wóltaʼii 52
Diyin Yá Yáłtiʼí Joseph Smith díí diyingo bił ííshją́ą́ ályaa éí Sodizinjí elders danilínígíí yee yił hodoolnih biniyé, Kirtland, Ohiodi, Yaʼiishjááshchilí 6, 1831 yihahgo. Kirtlanddi, Yaʼiishjááshchilí tááʼgóó yoołkááł bee hodilzhííshgo (3rd) dóó hastʼą́ą́ yoołkááłjįʼ (6th) ntsaago áłah silį́į́ʼ. Díí ntsaago áłah azlį́įgi high priest diyinkʼehgo ádaʼoolʼįįł bee bikʼidahodiiniiʼígíí bił ííshją́ą́ ádaalyaa, áádóó iiʼ naazíinii doo tʼáá daʼaanínígíí dóó bindaʼadloʼígíí hadabiʼdeesʼį́į́ʼ áádóó bichʼahdahoʼdooshkeed.
1–2, Missouridi ntsaago áłah nááʼdoodleełgo yee nidahazʼą́; 3–8, Łaʼ elders tʼáá háíshį́į́ yił ndaʼdinóotį́łígíí bee bił dahóóneʼ; 9–11, Elders éí hastóí naakitsʼáadah bikʼidahodiiniiʼígíí dóó Diyin yá yádaałtiʼí saad yee hadahaasdzííʼgo nídeiyíízooígíí bee ndaʼnohtin doo dabiʼdooniid; 12–21, Iiʼ Sizį́ Diyinii bitsʼą́ą́dóó tʼáá aaníinii bił béédahoozįįhígíí éí ląʼígo tsin bineestʼą́ʼgiʼ átʼéego hodílzin dóó ééhózin bee dahólǫ́ǫ doo; 22–44, Łaʼ elders Diyin binaʼnitin bee yisdáʼiildéehii yee ndaʼdínóotį́į́łgo bee bikʼih dahodiiniiʼ éí Missourigóó ntsaago áłah aleeh yichʼįʼ yikah doo.
1 Áko shooh, Diyin Bóhólníihii elders díí akéedi deiyoołkaałdi yikʼidiilniiʼ dóó neiyizlaʼígíí kwííłní, Iiʼ Sizį́ Diyinii biinééʼ yee kódííniid—
2 Kóníigo: Shí, Diyin Bóhólníihii, naa ákóneʼ ntsaago áłah aleeh ánáádaohdlaago kʼad dóó áajįʼ ahalzhííshgo haʼátʼíí ádadoołíłígíí nihił chʼídeeshʼááł, éí Missouridi áłah adooleeł, éí kéyah shidineʼé hodílzingo bichʼįʼ kódeeshłííł, éí Jacob bidineʼé chʼéédzíʼígíí, áádóó bee ałhaʼdeestʼánée binahjįʼ baa dahaasyáhą́ą daabí dooleeł.
3 Ákohgo, tʼáá aaníigo shí ánihidishní, bíniʼdii shá naalʼaʼí Joseph Smith, Jun., dóó Sidney Rigdon tʼáá hashtʼeʼ ádiilyaaí bighandóó dahdidooʼash, áádóó Missouri kéyahgóó dahdidooʼash.
4 Áádóó tʼáá shadaʼólíigo, áádóó ádeidoolíłígíí bee bił dahodoonih;
5 Áádóó ałdóʼ, tʼáá aaníigo adaʼólíigo, nihikéyah nihaa dahideestʼánígíí nihił ííshją́ą́ ádadoolnííł.
6 Áádóó doo tʼáá aaníí adaʼólíigo éí, nahjįʼ kódabidiʼdoolnííł, tʼáá shí íínisinígíí bikʼehgo, yáʼátʼééhgo bá ádoolnííł.
7 Áádóó ałdóʼ, Shí tʼáá aaníigo nihichʼįʼ haasdziih, bíniʼdii shá naalʼaʼí Lyman Wight dóó shá naalʼaʼí John Corrill tʼáá tsxį́łígo dahdidooʼash;
8 Áádóó ałdóʼ shá naalʼaʼí John Murdock, dóó shá naalʼaʼí Hyrum Smith, Detroit kin dashijaaʼjigo tʼáá éí hazʼanígóó dooʼash.
9 Áádóó Diyin bizaad yee naʼnitingóó dahdidooʼash, áádóó bíniʼdii Diyin yá yádaaltiʼí dóó hastóí naakʼitsʼáádah ndeiyíízohyę́ę tʼáá éí tʼéiyá yee ndaʼnitin doo, áádóó bedaʼodlą́ yinahjįʼ sodadilzingo Aaʼáhályáanii ndabineestą́ʼígíí bee.
10 Bíniʼdii naaki yiltʼéego yiʼash doo, áádóó ákótʼáo bíniʼdii tʼáá ałtso daʼoodlání áłah ndaadleehgo ndaʼnitin doo, dóó tó bee dabidiʼdoolzį́į́ł, dóó tó bąąhgi tsíítʼááh dah adilnih ííłʼį́į doo.
11 Háálá Diyin Bóhólníihii kóní, yáʼátʼééhgo iinánígíí tʼáá tsxį́łígíí binaʼanishígíí hadidoolnííł, bee nahodeesháłígíí bichʼįʼ yoołkáałgo akʼihojídlí ádeeshłííł.
12 Áádóó bíniʼdii shá naalʼaʼí Lyman Wight díí yaa ákonízin leʼ, háálá Chʼį́įdii tłʼoh naadą́ą́ʼ bigháʼníldéhígíí nahalinígi átʼéego ándoolííłgo yinízin.
13 Áádóó áko shooh, yáʼátʼéehgo índa baʼahódlíigo naalʼaʼí nílíinii; háiida ayóó aʼólíigo ląʼída bee bóhólníihgo ádoolnííł.
14 Áádóó ałdóʼ, tʼáá ałtsóní bikʼehgo éʼélʼíinii nihił ííshją́ą́ ádeeshłííł, áko doo yóóʼ anihiʼdinóotʼah da; háálá Chʼį́įdii tʼáá ałtsogóó nahasdzáán yikááʼ naaghá, dóó dineʼé dahdeinééhgóó yóóʼ ayiiʼéésh—
15 Ákohgo tʼáá háiida sonídílzįįhgo, biiʼ sizíinii yínííł nilį́įgo, dóó shibee ádaʼoolʼįįł yikʼeh hółʼį́įgo éí shił yáʼátʼééh doo.
16 Tʼáá háíshį́į́ yáłtiʼígíí, éí biiʼ sizíinii yínííł nilį́įgo, éí bizaad baʼátʼeʼ bąąh ádingo dóó bidziilgo, dóó shibee ádaʼoolʼįįł yikʼeh hółʼį́įgo éí Diyin God bitsʼą́ą́dééʼ átʼį́į doo.
17 Áádóó ałdóʼ, háiida sheʼadziil bitah hoditsxis ábósingo éí bidziilgo ábidiʼdoolnííł, áádóó aahaʼniih dóó hódzą́ neestʼáanii ííshją́ą́ íídoolííł, éí diyingo ííshją́ą́ ádaalyaa dóó tʼáá aaníinii baa níláhígíí bikʼehgo.
18 Áádóó ałdóʼ, háiida bikʼeh adeesdlį́įgo dóó daneestʼánígíí doo neiyiijááhgóó, díí bikʼehgo éʼélʼíinii ndi, éí doo shí shitsʼą́ą́dóó átʼée da.
19 Ákohgo, díí bikʼehgo éʼélʼíinii binahjįʼ iiʼ naazíinii baa ákonínízin doo yáʼąąsh biyaagi tʼáá ałtso ádahooníłígíí biyiʼ.
20 Áádóó bijį́įjįʼ adahaashzhiizh; diné beʼoodląʼ bikʼehgo baa daʼdoolyééł.
21 Áko shooh, díí bee hazʼáanii tʼáá átʼé elder danilíinii baa dahaasyá éí Shí bikʼidadiishniiʼ.
22 Áádóó ałdóʼ, Shí tʼáá aaníigo nihichʼįʼ haasdziih, bíniʼdii shá naalʼaʼí Thomas B. Marsh dóó shá naalʼaʼí Ezra Thayre ałdóʼ dah didooʼash, Diyin bizaad tʼáá yiʼashgóó yee naʼnitingo kéyahgi dooʼash.
23 Áádóó ałdóʼ, bíniʼdii shá naalʼaʼí Isaac Morley dóó shá naalʼaʼí Ezra Booth dah didooʼash, éí ałdóʼ Diyin bizaad yee naʼnitingo kéyahgi dooʼash.
24 Áádóó ałdóʼ, bíniʼdii shá naalʼaʼí Edward Partridge dóó Martin Harris éí shá naalʼaʼí Sidney Rigdon dóó Joseph Smith, Jun. yił dah didookah.
25 Bíniʼdii shá naalʼaʼí David Whitmer dóó Harvey Whitlock ałdóʼ dah didooʼash, dóó Diyin bizaad yee naʼnitingo kéyahgi dooʼash.
26 Áádóó bíniʼdii shá naalʼaʼí Parley P. Pratt dóó Orson Pratt dah didooʼash, dóó Diyin bizaad yee naʼnitingo kéyahgi dooʼash.
27 Áádóó bíniʼdii shá naalʼaʼí Solomon Hancock dóó Simeon Carter ałdóʼ Diyin bizaad yee naʼnitingo, kéyahgi dooʼash.
28 Áádóó bíniʼdii shá naalʼaʼí Edson Fuller dóó Jacob Scott ałdóʼ ákǫ́ǫ́ dahdidooʼash.
29 Áádóó bíniʼdii shá naalʼaʼí Levi W. Hancock dóó Zebedee Coltrin ałdóʼ ákǫ́ǫ́ dahdidooʼash.
30 Áádóó bíniʼdii shá naalʼaʼí Reynolds Cahoon dóó Samuel H. Smith ałdóʼ ákǫ́ǫ́ dahdidooʼash.
31 Áádóó bíniʼdii shá naalʼaʼí Wheeler Baldwin dóó William Carter ałdóʼ ákǫ́ǫ́ dahdidooʼash.
32 Áádóó bíniʼdii shá naalʼaʼí Newel Knight dóó Selah J. Griffin tʼáá áłah bidiʼdoolzį́į́ł, áádóó ałdóʼ ákǫ́ǫ́ dahdidooʼash.
33 Aooʼ, tʼáá aaníigo ánihidishní, bíniʼdii tʼáá átʼé tʼááłaʼí hazʼą́ą́góó dahdidookah, tʼáá ałʼąą daʼnítiingóó, áádóó diné doo łaʼ nááná łah haʼíítłʼinígíí yikááʼ haʼdootłʼííł da, doodaiiʼ doo łaʼ náánáígíí yikʼékʼeh yigááł da doo.
34 Háiida aʼólíhígíí, tʼáá éí baa áháyą́ą doo dóó neestʼą́ tʼóó ahayóí bitsʼą́ą́dóó náhoodleeł doo.
35 Áádóó ałdóʼ, Shí nihichʼįʼ haasdziih, bíniʼdii shá naalʼaʼí Joseph Wakefield dóó Solomon Humphrey haʼaʼaahjigo kéyah sinilígíí yichʼįʼ dahdidooʼash;
36 Bíniʼdii baʼáłchíní yił ndaalnish doo, Diyin yá yádaałtiʼí dóó hastóí naakʼitsʼáadah yee ndaʼnitinígíí tʼéiyá yaa dahalneʼ doo, áko éí deiyiiłtsánígíí dóó deideeztsʼą́ʼígíí dóó tʼáá íiyisíí deiyoodlánígíí, áko diyingo ííshją́ą́ ályaaígíí bedaʼdoolnííł.
37 Áádóó naʼiisíhígíí biniinaa, Heman Basset bąąh niilyáhą́ą bitsʼą́ą́ʼ náádidoolyééł, áádóó Simonds Ryder bąąh ndoolyééł.
38 Áádóó ałdóʼ, Shí tʼáá aaníigo nihichʼįʼ haasdziih, bíniʼdii Jared Carter priest bee bidiʼdoolzį́į́ł, áádóó George James ałdóʼ priest dooleełgo bee bidiʼdoolzį́į́ł.
39 Bíniʼdii elders łaʼígíí sodizin naaznilígíí yikʼi dadéézʼį́į́ʼ doo, dóó binaagóó ndahazʼánígíí Diyin bizaad yee ndeinitin doo; áádóó bíniʼdii tʼáá bí bilaʼ yee yéego nidaalnishgo tʼáá bí ákʼinidaaldzil doo áko tʼóó biʼdaʼalyaai deidísingíí éí doodago doo yáʼádaashóonii doo yaa naakai da doo.
40 Áádóó béédaałniih teʼáʼį́ dóó bichʼįʼ andahaztʼiʼ yiih dahaakaaígíí tʼáá átʼé, bitah dahoneezgai dóó atídaadzaaígíí, háálá díí doo bíkaʼoohjeehgóó, éí doo shikeeʼsizíinii nilį́į da.
41 Áádóó ałdóʼ, bíniʼdii shá ndaalʼaʼí Joseph Smith, Jun., dóó Sidney Rigdon dóó Edward Partridge sodizindóó naaltsoos bikʼehgo ádaʼałʼį́į dooleeł. Áádóó ałdóʼ shá naalʼaʼí Oliver Cowdery łaʼ bá ndidooltsos.
42 Áádóó ákótʼáo, shí bee haasdzíʼígiʼ átʼáo ndi, akééʼ nisoozį́įgo kéyah Missouridi áłah doohłeeł dóó yéego nihił dahózhǫ́ǫ doo, áko éí kéyah nihaa dahideestʼánée átʼé, kʼad éí niheʼanaʼí bikéyah átʼé.
43 Ákondi, shooh, Shí, Diyin Bóhólníihii, baah hoolzhiizh tsxį́įłgo kin dashijaaʼ ádeeshłííł, áádóó ákééʼ naazíinii yéego ił hózhǫ́ dóó baa hózhóonii naatʼá chʼah bikʼidadidootʼááł.
44 Áko shooh, Shí éí Jesus Christ áshtʼį́, Diyin God biYeʼ, áádóó nihoníyá bijį́įdi akééʼ naazíiniii haałtʼéego ádadeeshłííł. Tʼáá ákótʼée doo. Amen.