1 Áko Bóhólníihii nihiDiyin God kóní, Jesus Christ ndi, AyóóʼÁtʼéii Tʼáá Éí Áshtʼį́, Alpha dóó Omega, bee hodeeztʼiʼii áádóó bee nihonítʼiʼii, tʼáá éí nízaadgóó ałtsʼááʼ hodeesʼáágóó doo bił nihonítʼiʼgóó ahoolʼá, dóó tʼáá ałtso Diyin yá nidaalʼaʼí bitsʼádaʼdinílíidii yáʼąąshdi dah deiyínéehii, tʼah doo nahasdzáán álnéhę́ędą́ą́ʼ yiyiiłtsą́;

2 Tʼáá éí tʼáá ałtsóní bił bééhózin, háálá tʼáá ałtsóní yishʼį́;

3 Haadzíʼę́ę tʼáá éí Shí áshtʼį́, áádóó éí bee nahasdzáán ályaa, áádóó shinahjįʼ tʼáá ałtsoní hadadiilyaa.

4 Tʼáá éí Shí áshtʼį́ éí Enoch biZion ádííníshtąʼgo ííshłaa; áádóó tʼáá aaníígo, Shí ádíshní, tʼáá ląʼída shizhiʼ deiyoosdląądígíí ndi, háálá Shí Christ áshtʼį́, áádóó tʼáá shízhiʼ bee, shidił deeznaʼígíí binahjįʼ, shiTaaʼ bidááhdóó bá náʼiisékan.

5 Ákondi shooh, doo yáʼádaashóonii chʼéédzííʼígíí éí chahałheeł biyiʼ dahdahaastłʼǫ́ǫgo ííshłaa ayóó átʼáo ánahwiitʼaah beiníłką́ądi índa, éí nahasdzáán bee nihoníyáadi índa áhodoonííł;

6 Áádóó tʼáá ákótʼáo doo yáʼádaashóonii bił ndahazʼą́ągo ádeishłííł, ákondi shizhí doo deidiitsʼaʼígíí bijéí deidoołtłʼis, áádóó yíí, yíí, yíí, bee bá ndahidootʼááł.

7 Ákondi shooh, tʼáá aaníí, tʼáá aaníigo, Shí ánhidishní áko shinááʼ bee hanihisííd. Nihitah honishłǫ́ ákondi doo dashoohʼį́į da;

8 Ákondi dashidoołtsééł bijį́įdi éí tʼáá hodinaʼí bichʼįʼ hoolzhish, áádóó hiinishnánígíí baa ákódanohsin doo; háálá hodíínááʼígo chahałheeł bidááʼdiníbaal nahjįʼ nidooldlał, áádóó doo daniłtólígíí éí bijį́įdi doo yídaníłdzil da doo.

9 Ákohgo, nihiʼééʼ nihoozhnííʼ gónaaʼígíí bedaʼohtłʼóh dóó hashtʼeʼ ádadínóołzin. Áko shooh, yá ąąsh hazʼą́ danihí dooleeł, áádóó anaʼí doo nihikʼehdadidoodleeł da.

10 Tʼáá aaníigo Shí ánihidishní, danołtólí, ákondi doo tʼáá ánóhtʼé ákódanohtʼée da; áádóó ádin doo nááná ła tʼáá íiyisíí baa shił hózhǫ́ǫ da;

11 Háálá tʼáá ałtsoní bitsʼíís dahólóonii shidááhdóó doo yáʼádaashǫ́ǫ da; áádóó chahałheeł bibeʼadziilii nahasdzáán bikááʼ tʼáá ałtsogo hazlį́į́ʼ, nihokááʼ dineʼé baʼáłchíní bitahgóó, tʼáá ałtsoní yáʼąąshdi dah deiyínéehii binááł—

12 Éí bąą doo íístsʼąʼí da, dóó tʼáá áłtso ahoolʼáágóó yínííł hazlį́į́ʼ, áádóó Diyin yándaalʼaʼí nahasdzáán bikááʼ ayóó átʼáo ndaʼdiyoohłah bididooniiłgo yibaʼ ádaatʼį́, áádóó tłʼoh naadą́ą́ʼ nahalinígíí ahandahidiyooljołgo adadidoolkʼą́ą́ł; dóó, áko shooh, anaʼí éí ahíhidooljoł.

13 Áádóó áko tʼáá aaníinii tʼah doo béédahoozįįhígíí łaʼ nihichʼįʼ ąąʼ ádeishłííł, éí ndahazʼą́ ndanilʼinée biiʼ silá, éí nihidiʼdoolchxǫǫłgo bichʼįʼ hoolzhish, áádóó nihí doo baa ákodanohsin da;

14 Ákondi kʼad bee nihił hashneʼ, áádóó nihikʼihojídlíi doo, doo éí bąąhági ádaotʼínígíí, doodaiiʼ nihijéí doo daʼoodlánígíí biniinaa da; háálá shidááhdóó łaʼ tʼáá aaníí kódaohdzaa, ákondi doo bichʼįʼ danihidziilígíí éí bee nihaa jiinishbaʼ doo.

15 Éí bąą, kʼad kodóóʼ danihidziil doo; tʼáadoo nídaołdzidí, háálá Diyin God bił hazʼą́ danihí dooleeł.

16 Áádóó bee yisdáʼdíínáłígíí bibee hazʼáanii łaʼ nihaa nílá, háálá nihisodizin éí dasidétsʼą́ą́ʼ, áádóó téʼéʼį́ danilínígíí shidááhdóó saad dahółʼǫ́ǫ́ ńtʼę́ę́ʼ, áádóó daʼatʼínígíí éí ádeishłaa, áádóó tʼáá ałtsoní bitsʼíís dahólóonii daashí, áádóó diné tʼáá átʼé tʼáá ahedaałtʼéego baa nitséskees.

17 Áádóó nahasdzáán éí atʼį́įgo ííshłaa, áádóó áko shooh éí shibikʼi dah adéesʼeezí átʼé, ákohgo, bikááʼ dahnáánéideesįįł.

18 Áádóó nihichʼįʼ kódeeshłííł áádóó ayóó átʼé bilááhgóó daʼohtʼį́į doogo nihá nisin éí nihaa deeshłééł, azhą́ kéyah haa deetʼáanii ndi, éí kéyah abeʼ dóó tsésná bitłʼizh biiʼ nílíinii, éí Diyin Bóhólníihii nádáahdi doo hóyééʼgo yá hadoodzih da;

19 Áádóó kéyah danihí dooleełgo nihaa dahideeshłééł, éí nihijéí tʼáá átʼéé ńtʼę́ę́ʼ bee bíká ádaotʼį́įgo tʼéiyá.

20 Áádóó díí diyingo bee nihił ahadaʼdideeshtʼááł, áko tʼáá aaníí kéyah nihí dooleełgo nihaa deetʼą́, áádóó nihaʼáłchíní hoolʼáágóó daabí dooleeł, éí nahasdzáán tʼah tʼáá siʼáán ńtʼééʼgo, áádóó hoolʼáágóó, doo nahjįʼ kónáádooʼnííłgóó tʼah tʼáá nihí doo.

21 Ákondi, tʼáá aaníigo Shí ándishní tʼáá bichʼįʼ hoolzhish aláahdi naatʼáanii doodago nihinanitʼaʼí doo nihee hólǫ́ǫ da dooleeł, háálá Shí nihiʼaláahdi naatʼáanii deeshłeeł dóó nihikʼidíníshį́į́ʼ dooleeł.

22 Ákohgo, shinééʼ dadoohtsʼaʼ áádóó shikééʼ deiyínóhkááh, áádóó diné tʼáá bí bíniʼ bikʼehgo ndaakaiígíí danohłį́į dooleeł, áádóó bee hazʼáanii nihee ádin ákondi níyáago shibee hazʼáanii nihee dahólǫ́ǫ dooleeł, háálá Shí éí bee hazʼáanii nihaidiiʼaahii nishłį́, áádóó háísh éí shílaʼ niʼ kwíídoolííł?

23 Ákondi, tʼáá aaníigo Shí ánihidishní, naanish nihaa hidiníʼánígíí bikʼehgo ndaʼahinohtin;

24 Áádóó tʼáá ałtso diné bikʼis bił danilį́į doo tʼáá bí ádaa nitsékeesígiʼ átʼáo, áádóó tsʼídá yáʼátʼéehgo dóó dahodínohsingo shidááh ádaahníił doo.

25 Áádóó ałdóʼ ánáánihidishní, tʼáá ałtso diné bikʼis bił danilį́į doo tʼáá bí ádaa nitsékeesígiʼ átʼáo.

26 Háíshąʼ diné nihitahgóó biyeʼ naakitsʼáadah hólónígíí, dóó tʼáá átʼé tʼáá aheełtʼéego yaa nitsékees, dóó bikʼeh dahółʼį́įgo biká ańdaajah, áádóó łaʼ ííłní: Ééneez bee hadínééh dóó kweʼé nídaah; áádóó łaʼígíí ííłní: Anilí bee hadínééh dóó kweʼé nídaah—áádóó biyeʼké yiníłʼį́įgo ádidooniił Shí éí tʼáá ákogiʼ ánishtʼé?

27 Áko shooh, díí haneʼ bee akʼidiʼdootį́įłgo bee nihił hweeshneʼ, dóó shí áníshtʼéhígiʼ átʼé. Shí ánihidishní, tʼááłáʼí danohłį́; dóó doo tʼááłáʼí danohłį́įgo éí doo shitsʼą́ą́dóó danohłį́į da.

28 Áádóó ałdóʼ, tʼáá aaníigo nihichʼįʼ hanáánásdziih anaʼí nahonitʼin ndahazʼą́ądi naaghahígíí niheʼiinaʼ yíká átʼį́.

29 Kédaayah nízaadí anaaʼ dahólǫ́ǫgo dadohtsʼaʼ, áádóó hodíínaʼgo ayóó átʼáo anaaʼ kéyah danízaadi dahólǫ́ǫ doo dadohní, ákondi tʼáá nihí nihikéyah bikááʼgóó dineʼé bijéí biiʼ naazláhígíí doo ndi nihił béédahózin da.

30 Baa sodadoołzinígíí biniinaa Shí díí bee nihił hashneʼ; ákohgo, nihiyiʼdi bee dahódzáanii nihił danilį́įgo deiyínóhtąʼ, doodago éí diné doo biyáʼátʼéehii éí díí doo biyáʼáshóonii yee nihił ííshją́ą́ ádeidoolííł, éí nahasdzáán nahidooʼnááł bilááh átʼéego anééʼ dadidohtsį́į́ł; ákondi bichʼįʼ hashtʼeʼ ádaʼdínóołzingo doo ńdaałdzid da doo.

31 Áádóó áko anaʼí bibeʼadziilii bitsʼádadínóóhchééł, áádóó diné diyinkʼehgo deiyíkááhii danohłį́įgo, doo nihikʼéhátʼáahgo dóó chin nihąąh ádaadingo shaa hidoohkah—

32 Ákohgo, díí biniinaa bee hazʼáanii nihaa nilá áko Ohiogóó dohkah; áádóó áadi shibee hazʼáanii nihaa dadeeshłééł; dóó áádi hódahdééʼ adziilii nihaa dahidoolyééł;

33 Éí áádóó, tʼáá háiida tʼáá ałtso ałʼąą dineʼé dahdeiyíkááhgóó adahideeshʼaał, áádóó ádeidoolíłígíí bee bił dahodoonih; háálá naanish ayóó átʼéii bá hashtʼeishłaa, háálá Israel dineʼé yisdádookah, áádóó tʼáá Shí nisinígóó yishish doo, áádóó adziilii ádin doo łaʼ shílaʼ niʼ kwíídoolííł da.

34 Áádóó áko, Shí éí sodizin nahósʼaʼgi bee hazʼáanii łaʼ baa nílá, áko diné łaʼ bitah náhidoodlah, áádóó éí Sodizin daʼatahígíí ádaaníigo yikʼidadidoolnih;

35 Áádóó baa dahojoobaʼígíí dóó bichʼįʼ andahaztʼiʼígíí yiká adadoojah, áádóó yá dahwééʼaahgo doo bichʼįʼ ndahwiiʼnáa da dooleeł; áádóó ákǫ́ǫ́ dohkah bidííniidyę́ęgóó yidaʼdoołnih;

36 Áádóó díí bindaanish doo, díí sodizingi binaalyéhí naachʼidígíí yikʼidadeezʼį́į́ʼ doo.

37 Áádóó dáʼákʼeh doo ndahaniihgo bee dahólónígíí, bineʼdii tʼáá ákǫ́ǫ́ doodago háiida yikʼeh ndaʼiilée doo éí tʼáá bí bédahólnííh.

38 Tʼáá ałtsóní naalyéhí hazhóʼí hashtʼedadoohłííł; áádóó hastʼóí hódahdééʼ adziilii baa dahaasyáago ataadaakai doogo adabidiʼdoolʼaał, díí tʼáá átʼé naalyéhí sodizin biyiʼjįʼ ahąʼ ádoolnííł.

39 Áádóó atʼį́ bíká ádáotʼį́įgo éí aTaaʼ nihá yinizin dóó niheidooléeł, áko tʼáá ałtso dineʼé bilááh daʼohtʼį́į doo, háálá hoolʼáágóó atʼíinii nihee dahólǫ́ǫ doo; áádóó tʼáá aaníí éí nahasdzáán bidaʼatʼíinii éí daashígo aa hashnííł; ákondi bee ádaa hodzódlí tʼáá baa ádahoołʼyą́, háálá doo ákódaahdzaagóó éí áłkʼidą́ą́ʼ Nephi dineʼé ádaatʼéhę́ęgiʼ ádanohtʼée doo.

40 Áádóó ałdóʼ, Shí ánihidishní, bee hazʼáanii łaʼ nihaa nílá, nihokááʼ dineʼé tʼááłáʼí nízínígo, tʼáá átʼé elder, priest, ndaʼnitiní, dóó sodizin daʼatahígíí ałdóʼ, nílááh tʼáá awołí niheʼadziil bee, áádóó tʼáá nihílaʼ bee yéego nidaołnish, áko ádadoohłííł nihidíshnée hashtʼedadoohłííł dóó ałtso bidaʼdohłííł.

41 Áádóó bitsʼą́ą́dóó hóyééʼ áhodooníłígíí nihinaʼnitin átʼée doo, nihokááʼ dineʼé tʼááłáʼí nízínígo bee ndadínóohtʼįįł, dadínóołzééʼ dóó nihaa ádahwiinítʼį́įgo.

42 Áádóó diné doo yáʼádaashóonii bitsʼánóhkááh. Tʼáá nihí yisdáohkááh. Chin nihąąh ádingo ídaʼdółnééh Diyin Bóhólníihii binaalyéii dahdeinóhłéii. Tʼáá ákótʼée doo. Amen.