Wóltaʼii 33
Diyin Yá Yáłtiʼí Joseph Smith díí diyingo bił ííshją́ą́ ályaa éí Ezra Thayre dóó Northrop Sweet yee yił hodoolnih biniyé, éí Fayette, New Yorkdi, Ghąąjįʼ 1830 yihahgo. Díí diyingo ił ííshją́ą́ ályaaígíí yaa haadziihʼgo, Joseph Smith binákééʼ náháneʼ biyiʼ díí tʼáá aaníigo yaa hoolneʼ “Diyin Bóhólníihii éí … beʼoodląʼ dabidziilígíí neinitingo tʼáá áłahjįʼ yá hashtʼeʼ ádólzin.”
1–4, Ndaalnishí tsʼídá akéeʼdi oolkiłgo ndaʼiiníishdi Jesus Christin binaʼnitin bee yisdaʼiildéehii yee ndaʼdínóotįįłgo bee bikʼidahodiiniiʼ; 5–6, Sodizin hadilyaa, dóó diyingo ńdahaasdláaʼii ahíhidootʼish; 7–10, Ádaa ńdaʼoohkąąh, háálá yá ąąshdi hazʼą́ądi kʼadę́ę baa hoolzhíísh; 11–15, Sodizin éí Jesus Christ binaʼnitin bee yisdáʼiildéehii tségiʼ átʼáo bikááʼdóó bee haʼootłʼin; 16–18, Hastiin Adooyéhígíí yíghááhgo bichʼįʼ hashtʼeʼ ádadoołnééh.
1 Áko shooh, shí ánihidishní, shá naołʼaʼí Ezra dóó Northrop, akʼiʼdoohtʼįįh dóó Bóhólníihii nihiDiyin God bizhí yéego didoohtsʼį́į́ł, éí bizaad ayóó bidziil dóó hiiná, éí béésh hał-ałtsʼą́ą́jigo deinínígíí biláahgo hááheeshchxiiʼ, éí tʼáá áłah ahadaditʼą́ índa awol nidi ałtsʼáyiiłneʼ, atsʼíískʼehjí dóó iiʼsizíiniikʼehjí; áádóó nitsídahakees dóó ajéí yinízinígíí bił bééhózin.
2 Háálá tʼáá aaníí, tʼáá aaníigo, shí ánihidishní dilnígiʼ átʼáo nihizhí dadiitsʼaʼgo bee nihikʼihodiiniiʼ, áko bindaʼadloʼígíí dóó doo tsʼííd ádaatʼéégóó daʼahílchíihii shinaʼnitin bee yisdáʼiildéehii bee ndanohtin.
3 Háálá áko shooh, dáʼákʼeh tʼáá íídą́ą́ʼ dooldahgo deigai; áádóó tsʼídá akéeʼdi oolkiłgo ndaʼiinííshdi, ndaalnishí dáʼákʼehgi tʼáá łahídi nináádadoolnishgo biká ádideeshniił.
4 Áádóó shidáʼákʼeh tʼáá átʼé dááchxǫʼ azhą́ kóníshéhé ndi; áádóó doo łaʼ yáʼátʼéehgo éʼéłʼíní da tʼáá hazhóʼí tʼáá díkwíhígo tʼéiyá; áádóó nidaʼnitiní bindaʼadloʼígíí biniinaa tʼáá ląʼígo ndaʼiisííh, tʼáá ałtso bíniʼ yąąh dahoołʼaʼ.
5 Áádóó tʼáá aaníí, tʼáá aaníigo, ánihidishní, díí sodizin hadiishłaa dóó diné doo kééhatʼínídééʼ hodooleełgo bikʼidiishniiʼ.
6 Áádóó tʼáá ákótʼáo nahasdzáán bikááʼ tʼáá dį́į́ʼgo adahwiisʼáádę́ę́ʼ ńdahiséláʼígíí ahíhideeshʼish, éí ląʼí da dashoodlánígíí, dóó shizaad yikʼeh dahółʼínígíí ndi.
7 Aooʼ, tʼáá aaníí, tʼáá aaníigo, Shí ánihidishní, dáʼákʼeh tʼáá íídą́ą́ʼ dooldahgo deigai; ákohgo, nibee iigéshí nídiitįįhgo bee íkaał, dóó neʼadziil, níniʼ, dóó nitsxeʼ tʼáá átʼé bee ahanahołjooł.
8 Nihizééʼ ąąʼóhłééh dóó bee ndiʼdínóhtįįłígíí biih doolyééł, áádóó ałkʼidą́ą́ʼ Nephiyę́ęgiʼ átʼáo doohłeeł, éí Jerusalemdę́ę́ʼ diné doo kééhatʼíní góneʼ chʼíníná.
9 Aooʼ, nihizééʼ ąąʼóhłééh dóó tʼáadoo baa soohtiʼígo hahoohdziih, áádóó tłʼoh naadą́ą́ʼ nidaazgo dahwohxééł doo, háálá jóʼakon, shí éí nihił honishłǫ́.
10 Aooʼ, nihizééʼ ąąʼóhłééh dóó bee ndiʼdínóhtįįłígíí biih doolyééł, kódóhníigo: Ádaa ńdaʼoohkąąh, ádaa ńdaʼoohkąąh, dóó Diyin Bóhólníihii bihonítʼiʼ hashtʼedaołééh, dóó beʼátiin kʼéházdongo ádaołééh; háálá yáʼąąshdí hazʼą́ koshídę́ę́ʼ bichʼįʼ hoolzhish;
11 Aooʼ, ádaa ńdaʼoohkąąh dóó tó bee danihiʼdiilzį́į́h, tʼááłáʼí noozínígo, háálá nihibąąhági ádaatʼéii nihá yóóʼahididootʼááł; aooʼ, tó ndi bee nihidiʼdoolzį́į́ł, áádóó áko índa kǫʼ dóó Iiʼ Sizį́ Diyinii bee nihiʼdiʼdoolzį́į́ł.
12 Áko shooh, tʼáá aaníí, tʼáá aaníigo, ándishní, díí éí shinaʼnitin bee yisdáʼiildéehii átʼé; dóó béédaołniih dashoodlą́ą doo doodago éí doo yisdáńdahidookah da;
13 Áádóó díí tsé bikááʼ shisodizin ndeeshʼááł; aooʼ, díí tsé bikááʼdóó hanihidiishłaa, dóó tʼáá náás óhtʼį́įgo, chʼį́įdiitah bidáńdítį́hí doo nihikʼehdidoodleeł da.
14 Áádóó sodizinjí naaltsoos hadadilyaago dóó diyingo bee ahadaʼdeestʼánígíí béédaołniih dóó bikʼeh dahinohnáa doo.
15 Áádóó tʼáá háíshį́į́ beʼoodlaʼ hólónígíí éí shisodizin biyiʼ deidoohsį́į́ł, atsíítʼááh dahadéésniiʼ bee, áádóó shí Iiʼ Sizį́ Diyinii aa halyéhígíí baa dadeeshłééł.
16 Áádóó Naaltsoos Mormon Wolyéhígíí dóó diyin God bizaad dadílzinígíí éí shí nihaa hisílá bee naʼnihiʼdinitin doo biniyé; áádóó shiʼIiʼ Sizį́ Diyinii bibeʼadziilii éí tʼáá ałtsoní iiná yeidiyiiʼaah.
17 Ákohgo, iinohdlą́, tʼáá áłahjįʼ sodoołzin, nihitó kǫʼí biih náltiʼhí hidoohgizh dóó didootłiłgo hashtʼedoohłííł, áádóó bitooʼígíí tʼáá bił, éí Diné Iiyehii doogáałdi bá hashtʼeʼ ádínółzin doo—
18 Háálá áko shooh, tʼáá aaníí, tʼáá aaníigo, ándishní, áko tʼáá hooshchʼįʼ deeshááł. Tʼáá ákótʼée doo. Amen.