Wóltaʼii 29
Diyin Yá Yáłtiʼí Joseph Smith, elders hastʼą́ą́go yinááł díí diyingo bił ííshją́ą́ ályaa, Fayette, New Yorkdi, Biniʼantʼą́ą́tsoh 1830 yihahgo. Ntsaago áłah aleeh tʼah bichʼįʼ hoolzhishgo díí diyingo ił ííshją́ą́ ályaaʼígíí bee yílyá, Biniʼantʼą́ą́tsoh 26, 1830 bee hahaalzhííshyę́ędą́ą́ʼ.
1–8, Christ Diné Néíyiizláʼígíí ahíyiizhʼeezh; 9–11, Nínáádoodáłígíí éí Millennium bee hahodoolzhish; 12–13, Hastóí Naakitsʼáadah éí Israel tʼáá ałtso yá ndahodooʼááł; 14–21, Christ Nínáádoodááł Bijį́ bitséedi, daatʼíinii, ndaałniihii dahodooleeł, dóó dahodoochxǫǫł; 22–28, Akéeʼdi nihokááʼ dineʼé náádahidooʼnaał dóó ałtso ánihwiitʼaah ádaalyaago índa Millennium áhodoonííł; 29–35, Diyin Bóhólníihii éí tʼáá ałtsóní Iiʼsizíiniikʼehgo ooʼį́; 36–39, Níłchʼi biʼiiníziinii dóó bikééʼ yikahígíí éí yáʼąąsdę́ę́ʼ chʼídabidiʼnoolkaad áko nihokááʼ dineʼé nideinitaah doo biniyé; 40–45, Anoonééł Hazʼlį́į́ʼ dóó Bąąhági Átʼéii Bikʼé Nináʼílyá éí binahjįʼ yisdáʼiildééh hólǫ́; 46–50, Bąąhági Átʼéii Bikʼé Nináʼílyá binahjįʼ áłchíní yázhí bá ninádaʼiisyaʼ.
1 Jesus Christ, niháNináʼnídláii, AyóóʼÁtʼéii Tʼáá Éí Áshtʼį́ bizaad deisínółtsʼą́ą́ʼ, háálá bibee ajoobaʼ nihibąąhági ádaatʼéii nihá yikʼéh ninánídlá;
2 Háílá bidineʼé ahąʼ íídoolííł naʼahóóhai bitʼaʼ biyaa biyázhí ahąʼánéíyilʼįįhígiʼ átʼáo, tʼáá ałtso shizaad yikʼeh dahółʼínígíí dóó shidááhdóó hajoobaʼ ídaʼdiilyaaígíí, áádóó dashózhíigo ayóó átʼáo sodizin yee shíká ádadidooniił.
3 Áko shooh, tʼáá aaníí, tʼáá aaníigo, ánihidishní, áko kʼad hoolzhishgi nihibąąhági ádaatʼéii nihá yóóʼadííʼą́, éí bąą díí nihił ííshją́ą́ ííshłaa; ákondi béédaołniih doo bąąhági ádaotʼį́į da doo, doo ákódaahdzaagóó éí doo yáʼátʼéehii nihikʼijįʼ kódadoolnííł.
4 Tʼáá aaníigo, ánihidishní nihokááʼdóó ńdanihiʼdiisdlááʼ shinaʼnitin bee yisdáʼiildéehii baa nihił dahózhǫ́ǫgo baa dahołneʼ dooleeł, bizhí dilní diitsʼaʼ nahalingo.
5 Nihijéí hadaʼólníigo ádaohłééh dóó nihił dahózhǫ́, háálá nihitah honishłǫ́, áádóó aTaaʼ bił nihá akʼíyáłtiʼí nishłį́; áádóó yáʼátʼéehii nihá yinízinígíí bee bóhólníihígíí nihaididooʼááł.
6 Áádóó, bee akʼeʼashchínígi átʼéego—Tʼáá háʼátʼííshį́į́ niheʼoodląʼ bee deiyínohkeedgo, shí ánihidishnínígíí bikʼehgo sodizin bee łáʼí danohłį́įgo, éí nihaa doolyééł.
7 Áádóó baa hodoolzhish shí diné nídahiséláʼígíí ahídahidoohishgo bee nihikʼidahodiiniiʼ; háálá diné nídahiséláʼígíí shizaad yikʼeh dahółʼį́ dóó bijéí doo deiłtłʼis da;
8 Ákohgo aTaaʼ bitsʼą́ą́dóó haneʼ ílíinii chʼétʼą́ éí díí kéyah bikááʼgóó tʼááłáʼí hazʼą́ągi áłah nídaóhdleeh biʼdooniid, nihijéí hashtʼedadohlííł dóó tʼáá ałtsoní bichʼįʼ hashtʼeʼ ádadoołnééh háálá diné doo yáʼádaashóonii tiʼhooʼnííh dóó dahodoochxǫǫł bijį́ bichʼįʼ kódoolnííł.
9 Háálá áajįʼ aʼdoolkiłígíí kʼadę́ę́ baa hoolzhíísh dóó nahasdzáán bikááʼgóó tʼáá íiyisíí daʼneestʼánígíí tʼáá hodinaʼí beidoołkááł; dóó tʼáá ałtso ádaa dahodzódlíhígíí dóó bąąhági ádaatʼéii yaa ndaakaiígíí éí tséhégod ndahalingo, abidideeshkʼą́ą́ł, ní Diyin Tʼáá Ałtsoní bee Bóhólníihii, áko doo yáʼádaashóonii nahasdzáán bikááʼdóó doo hólǫ́ǫ da doo;
10 Háálá áajįʼ aʼdoolkiłígíí kʼadę́ę́ baa hoolzhíísh, áádóó shihastóí bikʼihodiiniiʼígíí yee hadahaasdzííʼyę́ę tsʼídá bedaʼdoolnííł; háálá tʼáá yee hadahaasdzííʼyę́ę bikʼehgo ádahodoonííł;
11 Háálá yáʼąąshdę́ę́ʼ ádziilii bee dóó ayóóʼatʼéii binahjįʼ adaasháahgo dashidoołtsééł, dóó tʼáá ałtso bił honishłónígíí ałdóʼ, áádóó nihokááʼ dineʼé bíł Diyinkʼehgo nahasdzáán bikááʼ dahiniináago tʼááłáhídi mííl ńdoohah, áádóó doo yáʼádaashóonii doo ndaazį́į da doo.
12 Áádóó ałdóʼ, tʼáá aaníí, tʼáá aaníigo, ánihidishní, yee nihoníʼánígíí bił chʼédaastʼą́, aTaaʼ íínízinígíí bikʼehgo, áko shihastóí bikʼihodiiniiʼígíí, éí Hastóí Naakitsʼáadah Jerusalemdi naʼnishtingo shił tádíkááh ńtʼę́ę́ʼ, kǫʼ yadiitʼiʼ biiʼ náníshdááhgo shinishʼnáájígo deidoozįįł, diyinkʼehgo oodááł biʼéénééz yee hadadítʼéego, naatʼá chʼah bitsiiʼ bikʼidadíʼą́ągo, shígiʼ átʼáo ayóóʼádaatʼéego, áko Israel bighandóó danilínígíí tʼáá átʼéé ńtʼę́ę́ʼ yá ndahodooʼááł, tʼáá ałtso ayóó ádashóónínígíí dóó shibee hazʼáanii yikʼeh dahółʼínígíí, áádóó doo éí nááná łaʼ da.
13 Háálá dilní łaʼ nízáádgóó ayóó íítsʼaʼgóó didootsʼį́į́ł, Mount Sinai bikááʼdóó diitsʼaʼ nahalingo, áádóó nahasdzáán tʼáá ałtso nahidooʼnaał, áádóó jishchááʼdę́ę́ʼ háádahidookah—aooʼ, azhą́ daneeznánígíí shinahjįʼ ánáheeskaiígíí ndi, áko diyinkʼehgo oodááłjí naatʼá chʼah baadahidootʼááł, áádóó éénééz bąąh ndadooltsos, shí hadíníshtʼéhígiʼ átʼao, áko shił honóhłǫ́ǫ doo, áko bee łaʼ dadiidleeł.
14 Ákondi, áko shooh, ánihidishní díí ayóó átʼáo bijį́ tʼah doo baa hoolzhííshdą́ą́ʼ jóhonaaʼéí bił chahodoołhił, áádóó ooljééʼ dił nahalin dooleeł, áádóó sǫʼ éí yádiłhiłdééʼ adah dínóodah, áádóó yádiłhił dóó nahasdzáán biyiʼ ayóó átʼáo bee yitʼíní dahólǫ́ǫ dooleeł;
15 Áádóó ląʼída nihokááʼ dineʼé bitahgóó yínííł yee dadiʼní dóó dadilwoshgo daachah;
16 Áádóó nahasdzáán bikááʼ ayóó átʼáo ló bee daníchíílgo kʼidaʼdeesyáhę́ę deidoołchxǫǫł.
17 Áádóó baa hodoolzhish, háálá nihokááʼ dineʼé doo yáʼáshǫ́ǫ́góó deeskaiígíí biniinaa, áko doo yáʼádaashónígíí shi áháchįʼ bikʼijįʼ kódeeshłííł, háálá doo ádaa ńdaʼookąąhígíí biniinaa; háálá shibąąh haʼíízhahí bee honishkéhígíí bee haʼdeezbin; háálá áko shooh, doo dashíístsʼą́ą́góó éí shidił chin daabąąhígíí doo niłtólí ádabidoolííł da.
18 Ákohgo, Shí Bóhólníihii Diyin God éí nahasdzáán bikááʼgóó tséʼádǫ́ʼii dah nídaʼasolgo ádeeshłííł, éí nihokááʼ yikááʼ kéédahatʼíinii yichʼįʼ ndahidoołnaał, dóó dabidooyį́į́ł, dóó tséʼédǫ́ʼii bichʼosh biiʼ dahodooleełgo dabidoołchosh;
19 Áádóó bízhíʼ ádadoodįįł áko doo shikʼijįʼ hadadoodzih da; dóó bitsʼįʼ éí bitsʼin bąąh ndadoołdas, dóó binááʼ éí binákʼeedóó hadadínóodah;
20 Áádóó baa hodoolzhish dziłyiʼdi naadlooshii daʼałchinígíí dóó tsídii yá yiyiʼ ndaatʼaʼígíí dabidoolghał.
21 Áádóó sodizin ayóóʼátʼéii dóó aláahgo woolchʼį́dígíí, éí nahasdzáán tʼáá ałtso yeʼałjiłnii nilį́, éí kǫʼ niʼjįʼ abididoołką́ą́ł, diyin yá yáłtiʼí Ezekiel bizééʼdóó yee haadzííʼyę́ę bikʼehgo, éí díí yaa yááłtiʼ, éí tʼah doo ákónééh da akondi tʼáá aaníí baa hodoolzhish, éí hinishnánígiʼ átʼéego, háálá aláahgo woolchʼį́dígíí doo hooʼááł da doo.
22 Áádóó ałdóʼ, tʼáá aaníí, tʼáá aaníigo, ánihidishní tʼááłáhídi mííl ałtso nááhaigo, áádóó nihokááʼ dineʼé biDiyin God yooʼanáádeidiʼaahgo, ákohgo índá tʼóó kónízáhíjįʼ nahasdzáán baa jideeshbaał;
23 Áádóó nihodoogááł, áádóó yádiłhił dóó nahasdzáán adidoolkʼą́ą́ł dóó ábidiʼdooldįįł, áádóó yádiłhił ániidígíí dóó nahasdzáán ániidígíí ádoolnííł.
24 Háálá ałkʼidą́ą́ʼ ádaátʼéhę́ę éí nahjįʼ kódaalyaa, dóó tʼáá ałtso ániidí nídadoodleeł yádiłhił dóó nahasdzáán ndi, dóó tʼáá ałtso yee hadítʼéhę́ę, ndaaldlooshii dóó nihokááʼ dineʼé tʼáá áłah, tsídii yádiłhił yiiʼ ndaatʼaʼígíí, áádóó łóóʼ tónteel yiiʼ ndaʼałkǫ́ʼígíí ałdóʼ;
25 Áádóó atsiiʼ tʼááłáʼí ndi, doodago anákʼeeltsʼidígíí, doo yooʼadínóodah da, háálá tʼáá shí shílaʼ bee ííshłaa.
26 Ákondi, áko shooh, tʼáá aaníigo shí ánihidishní, tʼah doo nahasdzáán yóóʼálnééhdą́ą́ʼ, Michael, shiʼaláahgo diyingo naalʼaʼí nilíinii, bidilní ayóó íitsʼaʼgo didootsʼį́į́ł, áko índa tʼáá ałtso daneeznánée chʼéédadoodził, háálá bijishchááʼ ąąʼádadoolnííł, áádóó hadahidookah—aooʼ, tʼáá ałtso ndi.
27 Áádóó diyinkʼehgo deiyíkááhígíí hoolʼáágóó iiná biniyé shinishnáájígo áłah dooleeł; áádóó doo yáʼádaashóonii éí shinishtłʼají baa yánísingo deidoozįįł shiTaaʼ bidááhgi;
28 Ákohgo shí kóbidideeshniił—Yíwohjįʼ shitsʼą́ąjįʼ deinóhkááh, atídanihidiʼdoolníiłgo nihá hadaʼiisdzíiʼii, éí hoolʼáágóó hodookʼą́ą́ł biyiʼ, éí níłchʼi biʼiiníziinii dóó bá ndaalʼaʼí bá hashtʼeilyaa.
29 Áádóó áko, shooh, shí ánihidishní, nídookahgo éí tsʼídá shizééʼdóó tʼáadoo bee haasdzííʼ da, háálá shí naasháadi doo dookah da, háálá doo yídaneilą́ą da.
30 Ákondi béédaołniih nihokááʼ dineʼé shiʼánihwiitʼaahii tʼah doo tʼáá ałtso baa halyée da; dóó tʼáá shí shizééʼdóó bee haasdzíʼígíí éí bohodoolnííł, dóó áłtséhę́ę akéeʼdi doolééł, dóó tʼáá ałtsoní sheʼadziil bee haasdzííʼgo ádeishłaayę́ę akéeʼdiígíí áłtsé dadoolééł, éí shiʼIiʼsizʼį́ Diyinii bibeʼadziilii átʼé.
31 Háálá shiʼIiʼsizʼį́ Diyinii bibeʼadziilii bee ádeishłaa; aooʼ, iiʼ sizíinii dóó atsʼíískʼehjí tʼáá ałtso—
32 Iiʼ sizíiniikʼehjí áłtsé, áádóó naaki góneʼ atsʼíískʼehjí, kótʼáo shinaanish áshʼį́įgo bee hahoolzhiizh; Áádóó ałdóʼ, atsʼíískʼehjí áłtsé, áádóó naaki góneʼ éí iiʼ sizíiniikʼehjí, kótʼáo shinaanish bee nahidoolzhish—
33 Tʼáá nihi bikʼidaʼdoohtį́łígíí bikʼehgo nihichʼįʼ haasdziih; ákótʼée ndi shídééʼ nishį́į́go éí shinaanish doo niitʼééh da, áádóó bee hahalzhííshígíí ałdóʼ; ákondi tʼáá nihí bikʼidiʼdoohtį́łígíí éí nihí nihaiyílyá, háálá bee ńdashisoohkan dóó bee lą́ daʼsoohłį́į́ʼ.
34 Ákohgo, tʼáá aaníigo shí ánihidishní tʼáá ałtsoní iiʼsizíiniikʼehjí bee néshʼį́, áádóó hádą́ą́ʼda éí bee hazʼáanii atsʼíiskʼehgo doo łaʼ nihaa níláa da; doodaiiʼ nihokááʼ dineʼé łaʼ, doodaiiʼ nihokááʼ dineʼé baʼ áłchíní; doodaiiʼ nihizhéʼé, Adam, jó éí shí áhwiishłaa.
35 Áko shooh, tʼáá bí ádánisékeesgo bee bóhólníihgo ííshłaa; áádóó bee hazʼáanii baanílá, ákondi atsʼíískʼehgo bee hazʼáanii éí tʼáadoo baaníláa da, háálá shibee hazʼáanii éí íísizʼíiniikʼehjí tʼéiyá ádaalyaa; háálá doo éí nahasdzáánkʼehgo doodago atsʼíseekʼehgo da, doodago atsʼíískʼeh deiyíkááhii doodago atsʼíískʼehjí deinizinii ádaatʼée da.
36 Áádóó baa hoolzhiizh Adam, níłchʼi biʼiiníziinii azábíílóóz—háálá, áko shooh, níłchʼi biʼiiníziinii éí Adam yilą́ąjįʼ bízhiʼ ályaa, háálá shikʼijįʼ silį́į́ʼ, kóníigo, Bee néíhoʼdílzinígíí shaa nílé, éí shí sheʼadziilii átʼé; áádóó ałdóʼ yáʼąąshdi tááʼgo ałʼąą dahʼooldahígíí shitsʼą́ą́jígo dahyikahgo áyiilaa tʼáá bí ádá ntsídaakeesgo bee bídahólnííhígíí biniinaa;
37 Áádóó adah adabiʼdiistłʼííd, áádóó ákótʼáo níłchʼi biʼiiníziinii dóó bá ndaalʼaʼí daazlį́į́ʼ;
38 Áádóó, áko shooh, hodeeyáádą́ą́ʼ łaʼ hazʼą́ągo bá hashtʼedahoolyaa, éí hazʼánígíí éí chʼį́įdiitah átʼé.
39 Áádóó éí biniinaa níłchʼi biʼiiníziinii nihokááʼ dinéʼé baʼáłchíní yínítaah dooleeł, doodago éí doo tʼáá bí ádánitsídaakeesgo bee bídahólníih da doo; háálá díchííʼígíí doo bee dahólǫ́ǫgóó éí łikanígíí doo bił béédahózin da doo—
40 Ákohgo, baa hoolzhiizh níłchʼi biʼiiníziinii éí Adam azáyíílóóz, tsin bineestʼąʼ doo doodį́į́łii yiyííyą́ą́ dóó bee hazʼáanii kʼíínítiʼ, éí binahjįʼ biʼiiníziinii yíʼoołkąąhígíí bikʼehgo nabilooz silį́į́ʼ, háálá azábíílózígíí bił tʼáá áko.
41 Ákohgo, Shí, Bóhólníihii Diyin God, dáʼákʼeh Edendóó, shitsʼą́ą́jįʼ chʼíbiníłchą́ą́ʼ, asiihígíí biniinaa, éí biniinaa iiʼsizíiniikʼehgo ádin silį́į́ʼ, éí áłtsé anoonééł átʼé, tʼáá éí anoonééł ałdóʼ akéeʼdi anoonééł átʼé, éí iiʼsizíiniikʼehjí átʼé, éí doo yáʼádaashóonii bichʼįʼ kódeeshłííł kótʼáo bichʼįʼ hadeesdzihʼgo: Yíwohjįʼ deiyínóhkááh, atídanihidiʼdoolníiłgo nihá hadaʼiisdzííʼii.
42 Ákondi, áko shooh, shí ánihidishní Shí, Bóhólníihii Diyin God, Adam dóó bílástsiiʼ díí baa nílá, éí atsʼíískʼehgo doo dadínóonééł da, áko Shí, Bóhólníihii Diyin God diyin yándaalʼaʼí ádaa náʼookąąh dóó ánináʼílyá yee yił dahodoolnih, éí shiYeʼ Tʼáá Éí Tʼéiyá Bá Yizhchíinii bízhiʼ deiyoodlą́ągo.
43 Áádóó ákótʼáo shí, Bóhólníihii Diyin God kóʼiishłaa, nihokááʼ dineʼé yáʼátʼééhii ádeidoołííłgo yoołkááłígíí bee bá nahootʼą́—áko dahnídahidiikaigo bitsʼíís doo náádadootsaał da ákondi hoolʼáágóó dahiináa dooleeł, éí ląʼí daʼoodlánígíí bá;
44 Áádóó tiʼhooʼnííh doo ninítʼíhii doo deiyoodlánígíí; háálá éí iiʼsizíiniikʼehjí doo bá ninádaʼiisyáa da doo, háálá doo ádaa ńdaʼookąąhígíí biniinaa;
45 Háálá chahałheeł ayóóʼádeiyóní adinídíín éí ndagaʼ, áádóó ádeiłʼínígíí éí doo yáʼádaashǫ́ǫ da, áádóó yikʼeh dahółʼínígíí éi binahjįʼ baa daʼiilyé.
46 Ákondi shooh, ánihidishní, áłchíní yázhí éí bá nináʼílyá tʼáá nahasdzáán álnéhę́ędą́ą́ʼ éí Tʼáá Éí Tʼéiyá Shá Yizhchíinii binahjįʼ;
47 Ákohgo, bąąhági átʼéii doo bídadéétʼiʼ da, háálá Chʼį́įdii éí áłchíní yázhí neidínóotahgo adziilii doo bee yílyáa da, shidááhdóó bąąhági átʼéii ádeiłʼį́įgo yídeiyíghah daazlį́į́ʼgo índa;
48 Háálá shí shikʼehgo éí baadahaasyá, shí íínisinígíí bikʼehgo, áko dabizhéʼéyę́ę bílákʼeedóó ayóó átʼáo ádaʼdoolííłgo nidzin.
49 Áádóó, nááná, ánáánihidishní, tʼáá háíshį́į́ bił ééhózinígíí, eiísh ádaa náʼiiníkąąh bidishní?
50 Áádóó tʼáá háíshį́į́ chʼééh akʼidiitʼįįhígíí, díí ndaháasdzohígíí tʼáá ákótʼáo ádahidoonííłgo ádeishłííł. Áádóó áko hoolzhishgi doo łaʼ bee nihichʼįʼ hanáádeesdzih da. Amen.