Seksen 34
Revelesen we God i givim, tru long Profet Josef Smit, i go long Orson Prat, long Feyet, Niu Yok, long 4 Novemba 1830. Brata Prat i bin gat naentin yia long taem ia. Hem i bin jenisim laef blong hem mo i bin kasem baptaes taem hem i bin harem blong fas taem, prijing blong bigfala brata blong hem, Parli P. Prat, abaot gospel we i kambak, we hem i bin givim sikis wik bifo. Revelesen ia, Josef i bin kasem long hom blong Pita Witma Senia.
1–4, Olgeta we oli fetful oli kam ol pikinini blong God tru long Atonmen; 5–9, Fasin blong prijim gospel i mekem rere rod blong Seken Kaming; 10–12, Profesi i kam tru long paoa blong Tabu Spirit.
1 Boe blong mi, Orson, lisin gud mo harem mo luk wanem we mi, Lod God, bae mi talem long yu, mi we mi Jisas Kraes, Ridima blong yu;
2 Laet mo laef blong wol ia, wan laet we i saen long tudak mo tudak ia i no andastanem hemia;
3 We i lavem wol ia tumas mekem se hem i givim laef blong hemwan bakegen, blong mekem se hamas bae oli bilif bae oli kam ol pikinini blong God. Taswe, yu yu boe blong mi;
4 Mi blesem yu from se yu bin biliv;
5 Mo mi blesem yu moa from se mi singaotem yu blong yu prijim gospel blong mi—
6 Blong yu leftemap voes blong yu semmak olsem saon blong wan pupu, we i longfala mo i laod, mo blong yu taltalemaot fasin blong sakem sin long wan jeneresen we tingting blong olgeta i kruked mo oli stronghed, blong stap mekem rod blong Lod i rere from taem blong seken kaming blong hem.
7 From luk, i tru, i tru mi talem long yu, taem ia i kam kolosap nao we bae mi kam long wan klaod wetem paoa mo bigfala glori.
8 Mo bae i wan bigfala dei, long taem we bae mi kam, from evri nesen bae oli seksek.
9 Be bifo bigfala dei ia i kam, bae san i kam tudak, mo mun bae i kam blad; mo ol sta bae oli nomo wantem saen, mo sam bae oli foldaon, mo ol bigfala trabol bae i kasem ol nogud man.
10 Taswe, leftemap voes blong yu mo no stop blong toktok, from Lod God i bin toktok; from hemia, yu mas profesae, mo bae mi givim ol toktok ia tru long paoa blong Tabu Spirit.
11 Mo sapos yu fetful, luk, mi stap wetem yu kasem taem bambae mi kam—
12 Mo i tru, i tru mi talem long yu, mi kam kwiktaem. Mi, mi Lod blong yu mo Ridima blong yu. I olsem. Amen.