Wóltaʼii 41
Diyin Yá Yáłtiʼí Joseph Smith díí diyingo bił ííshją́ą́ ályaa éí sodizin daʼatahahígíí yee yił hodoolnih biniyé, Kirtland, Ohiodi, Atsá Biyáázh 4, 1831yę́ędą́ą́ʼ. Díí diyingo bił ííshją́ą́ ályaaígíí éí Diyin Yá Yáłtiʼí dóó Sodizin Daʼatahígíí elders éí Diyin God “bibee hazʼáanii” bíká sodadoołzin biʼdooʼniid (wóltaʼii 42gi yídííłtah). Joseph Smith ániid New Yorkdę́ę́ʼ níyá Kirtlandjįʼ, dóó Leman Copley, Thompson, Ohio tʼáá áhánídę́ę́ʼ naaghá, éí Sodizinjí atah yah anádááh, “éí Bikʼis Joseph dóó Sidney [Rigdon] … bighangi baa ałkʼee sikée doo áádóó choidoołʼįįłígíí yee yikáʼanálwoʼ doogo yiyííkeed.” Díí diyingo bił ííshją́ą́ ályaaígíí Joseph dóó Sidney haaʼígi bighan dooleełígíí hazhóʼí yaa hoolneʼ áádóó ałdóʼ Edward Partridge tsʼídá áłtsé Sodizin Daʼatahígíí bibishop dooleełgo bee bikʼihodiiniiʼ.
1–3, Elders éí diyingo ił ííshją́ą́ ályaígíí yee Sodizin deiyiyééłyeed doo; 4–6, Tʼáá aaníigo hastóí naakitsʼáadah akééʼ naazíinii éí Diyin Bóhólníihii bibee hazʼáanii baadahidoolyééł dóó yikʼehdahółʼį́į dooleeł; 7–12, Edward Partridge éí Sodizin Daʼatahígíí bibishop dooleełgo bee bikʼihodiiniiʼ.
1 Dashidohtsʼįįh dóó shikʼeh dahonółʼį́, O shidineʼé, ní Diyin Bóhólníihii dóó nihiDiyin God, nihí tʼáá ałtsoní akʼidahojídlí bilááh baa shił hózhǫ́ǫgo nihikʼihojinishdlíhígíí, dashíínółtsʼą́ʼígíí; dóó doo dashíínółtsʼą́ʼígíí éí hoyééʼgo nihá hadeesdzih, shízhiʼ doo tʼáá aaníí ádadohnínígo chodaałʼínígíí, éí tsʼídá aláahdi dahóyééʼ ádaatʼéi nihichʼįʼ kódoolnííł.
2 Daʼíísínółtsʼą́ą́ʼ, O elders shisodizinjí atah danohłį́įgo nihikʼidadiishniiʼígíí, áko shooh bee hazʼáanii łaʼ nihaa nílá, áko shizaad bee lą́ dadohłeeł biniyé áłah doohłeeł;
3 Áádóó niheʼoodląʼ bee sodadółzingo shibee hazʼáanii nihaadeeshłééł, áko shisodizin haitʼáo deiyínóołyeed dooleełígíí nihił béédahózin doo áádóó shidááhgi tʼáá ałtsóní tʼáá ákogi átʼéego ádaʼoołʼį́į doo.
4 Áádóó níyáago nihánahaʼáí nishłį́į dooleeł; áádóó áko shooh, tsxį́į́łgo deeshááł, dóó shibee hazʼáanii bikʼeh dahonółʼį́įgo bikʼidadínóohʼį́į doo.
5 Áádóó tʼáá háida shibee hazʼáanii neidiiláhígíí dóó yikʼeh hółʼínígíí, tʼáá éí shikééʼsizį́; dóó tʼáá háida sheiyílyá nííndi tʼáadoo yikʼeh hóółʼįįdgóó, éí doo shikééʼsizʼíinii nilį́į da, dóó éí nihitahdę́ę́ʼ chʼídínóolchééł;
6 Háálá doo ákótʼée da áłchíní diyin bił hazʼą́ą́dééʼ haʼátʼíida daabíhígíí éí diné doo dadiyinii baa hidoolyééł da, doodago łééchąąʼí da, doodago nihiyooʼ daʼílíinii tʼáadoo bisóodi bidáahjįʼ adahoołkaadí.
7 Áádóó ałdóʼ, tʼáá ákótʼé shánaalʼaʼí Joseph Smith, Jun., hooghan bá ádoolnííł, éí biyiʼ bighan doo áádóó ataʼ halneʼ doo.
8 Áádóó ałdóʼ, tʼáá ákótʼé shánaalʼaʼí Sidney Rigdon tʼáá bí íínízinígiʼ átʼáo nizhónígo bighan doo, shibee hazʼáanii yikʼéh hółʼį́įgo tʼéiyá ákótʼée doo.
9 Áádóó ałdóʼ, shánaalʼaʼí Edward Partridge bikʼidiishniiʼ; áádóó Shí ánihidishní, áko Sodizin daʼatahígíí ádaaníigo yikʼidadidoolnih, dóó sodizin yá bishop dooleełgo bidiʼdoolzį́į́ł, binaalyéhí tʼáá ákǫ́ǫ́ sinilgo íídoolííł dóó sodizin tʼáá áłahjįʼ yá naalnish doo;
10 Shibee hazʼáanii éí yoołkááłgóneʼ baah híláago tʼáá ałtsoní bee bikʼihodiiniiʼígíí yikʼidéézį́į́ doo.
11 Áádóó díí éí shidááhgi bijéí niłtólígíí biniinaa, háálá éí ałkʼidą́ą́ʼ Nathanaelyę́ęgiʼ átʼé, éí báʼátʼeʼ ádin ńtʼę́ę́ʼ.
12 Díí saad nihaa dahaasyá, dóó shidááhgi hadaałtʼé; ákohgo, haitʼáo baa ntsídaohkeesígíí baa ádahołyą́, háálá ndahwiitʼaah bijį́įdi nihiʼnaazíinii bąąh naazláago yaah hodoolnih. Tʼáá ákótʼée doo. Amen.