Wóltaʼii 44
Diyin Yá Yáłtiʼí Joseph Smith dóó Sidney Rigdon díí diyingo bił ííshją́ą́ ályaa, éí Kirtland, Ohiodi, Atsá Biyáázh 1831 yihahgo kʼadę́ę́ ałtso nídízíídgo. Éí bee hazʼáanii kweʼé nihił ííshją́ą́ ádaalyaaígíí bikʼehgo, Sodizin éí ntsaago áłah aleeh Yaʼiishjááshchilí bichʼįʼ hoolzhizhígíí biyiʼ ndeezʼą́.
1–3, Sodizinjí elders daʼatahígíí ntsaago áłah aleehdi ahíídookah; 4–6, Éí kéyah hahoodzoh bibee hazʼáanii bikʼehgo dóó baa dahojoobaʼígíí baa áháyą́ągo hashtʼedeidoolííł.
1 Áko shooh, Diyin Bóhólníihii shá ndaalʼaʼí kwííłní, áko shisodizinjí elders daʼatahígíí éí áłah dooleełgo tʼáá íiyisíí bá nisin, ńléí haʼaʼaah dóó eʼeʼaahdę́ę́ʼ, dóó ńléí nahookǫs dóó shádiʼááhdę́ę́ʼ, éí naaltsoos bichʼįʼ ádadoolnííł éí doodago éí nááná łahgiʼ átʼáo bił hodoonih.
2 Áádóó baa hodoolzhish, áko shikééʼ naazį́įgo, dóó beʼoodląʼ chodeiyoołʼį́įgo, áłah dooleeł bijį́įdi Shí éí shiʼIiʼ Sizį́ Diyinii bił hólǫ́ǫgo ádeeshłííł.
3 Áádóó baa hodoolzhish binaagóó nahazʼą́ą́góó, éí dineʼé ákǫ́ǫ́ dabighanígíí yitaakaigo ádaa ńdaʼoohkąąh deiłníigo ndeinitin doo.
4 Áádóóʼ ląʼí da idahididookah, áko éí bitsʼą́ą́dóó diné bibee hazʼáanii yikʼeh ndahaʼáago ádaʼdoolííł;
5 Áko niheʼanaʼí doo nihikʼi bídahólnííh da dooleeł; áko binahjįʼ tʼáá ałtsoní bee nihaa áháyą́ą doo; áko shibee hazʼáanii bikʼeh dahinohnáa doo; áko da índa tʼáá ałtso bee ahadaʼdeestʼánígíí kʼídahidootih éí binahjįʼ anaʼí shidineʼé ndeidoołtsxił.
6 Áko shooh, nihichʼįʼ haasdziih, áko baa dahojoobáʼígíí dóó bichʼįʼ andahaztʼiʼígíí baa nídaahkahgo bíkáʼandaahjah dooleeł, áko shibee hazʼáanii nihee yílyáhígíí binahjįʼ tʼáá ałtsóní ádaalyaajįʼ bikʼi dadinóhʼį́į́ʼ dooleeł. Amen.