Seksen 48
Revelesen we God i givim tru long Profet Josef Smit, long Ketlan, Ohaeo, long 10 Maj 1831. Profet i bin askem long Lod abaot fasin blong wok folem, blong kasem ol graon blong olgeta Sent oli stap long hem. Hemia i bin wan impoten samting blong lukluk long muv blong ol memba blong Jos we oli aot long Is Yunaeted Stet, blong obei long oda blong Lod we oli mas kam tugeta long Ohaeo (luk long ol seksen 37:1–3; 45:64).
1–3, Olgeta Sent long Ohaeo oli mas serem ol graon blong olgeta wetem ol brata blong olgeta; 4–6, Olgeta Sent oli mas pem ol graon, bildim wan siti, mo folem kaonsel blong ol prisaeding ofisa blong olgeta.
1 Hem i nid blong yufala i mas stap nomo, blong taem naoia, long ol ples we yufala i stap laef long hem naoia, olsem we i stret long ol situesen blong yufala.
2 Mo folem hamas graon nao yufala i gat, bambae yufala i mas givim i go long ol brata blong Is;
3 Mo folem hamas graon nao we yufala i no gat, olgeta oli mas pem, blong taem naoia, long ol ples we oli stap raonabaot, olsem we i gud long olgeta, from i mas nid blong oli mas gat ol ples blong oli stap long hem blong taem naoia.
4 I mas nid blong yufala i sevem evri mane we yufala i save sevem, mo blong yufala i kasem evri mane we yufala i save kasem long stret mo gud fasin, blong mekem se long stret taem, bambae i save helpem yufala blong pem graon blong givim long laen blong pikinini blong yufala, mo taon ia tu.
5 Ples ia, Lod bae i no soemaot yet; be afta we ol brata blong yufala long Is oli kam, bambae i gat sam man ia we bae oli mas jusum, mo long olgeta nao, Lod bae i mekem se oli save ples ia, o long olgeta nao, bae Lod i soemaot samting ia.
6 Mo bambae oli mas jusum olgeta blong pem ol graon, mo blong statem ol stamba wok blong bildimap taon ia; mo afta, bambae yufala i stat blong kam tugeta wetem ol famli blong yufala, evri man wetem famli blong hem, folem situesen blong hem, mo olsem we presidensi mo bisop blong jos bae oli jusum, folem ol loa mo ol komanmen we yufala i bin kasem, mo we bae yufala i kasem afta. I olsem. Amen.