Mwakoro 50
Kaotioti ae kaotaki rinanon Iotebwa Timiti te Burabeti, i Kirtland, Ohio, ni Meei 9, 1831. E taekinaki n rongorongon Iotebwa Timiti bwa tabeman unimwaane a aki oota ni kaotin tamnei aika a kakaokoro n te aonaba ao bwa e anga te kaotioti aei ni kaineti nakon ana titiraki ae e onoti i aon aei. Bwaai aika a aranaki bwa bwain te tamnei aika kamimi a bon aki boou irouia kaain te ekaretia, tabeman a taku bwa a karekei taian mi ao kaotioti.
1–5, A mwaiti tamnei aika a buakaka n te aonaba; 6–9, A na reke kaia bwaritaio ao naake a teweaki nako man te Ekaretia; 10–14, A riai unimwaane n tataekina te euangkerio mai iroun te Tamnei; 15–22, Taan kabwarabwara ao taan ongoraa a riai ni kamatataaki mai iroun te Tamnei; 23–25, Te bwai ae e aki karikirakea te aomata bon tiaki mai iroun te Atua; 26–28, Taan kakaonimaki bon ngaiia taan bwaini bwaai ni kabane; 29–36, Aia tataro naake a kaitiakaki a na bon kaekaaki, 37–46, Kristo bon te Tia Kawakin Tiibu ae Raoiroi ao aia Atibu Iteraera.
1 Ongora, O ngkami unimwaanen au ekaretia, ao anga taningami nakon bwanaan te Atua ae maiu; ao kakauongo nakon taeka ni wanawana are e na anganingkami, ni kaineti ma aron are kam bubuti ao ni boraraoi iai ibukin te ekaretia, ao taian tamnei are a tia n nakon taabo nako n te aonaba.
2 Nooria, e koaua ae I tuangkami, bwa a mwaiti tenaan tamnei ake tamnei aika a buakaka, ake a tia n nako aon te aonaba, ni mwamwana te aonaba.
3 Ao Tatan naba e ukoukora mwamwanikimi, bwa e aonga n tokanikai i aomi.
4 Nooria, Ngai, te Uea, I a tia n taraingkami, ao n tia n noori mwakuri aika bati n ribaki n te ekaretia are e taekinna bwa au ekaretia.
5 Ma a kakabwaiaaki naake a kakaonimaki ao a teimatoa, n te maiu aei ke n te mate, bwa a na karekea te maiu ae akea tokina.
6 Ma a na reke kaia taan mwamwanaa te aba ao bwaritaio, bwa, e taku te Uea, N na bon uotiia nakon te motikitaeka.
7 Nooria, e koaua ae I tuangkami, iai bwaritaio i buakomi, ake a tia ni mwamwanaia tabeman, ake a tia n angan te kaaitara te mwaaka; ma nooria a na bon kaokaki.
8 Ma a na bon ataaki bwaritaio ao a na kamaunaaki, n te maiu ke n te mate, n aron are I bon taku; ao a na reke kaia ake a kamaunaaki man au ekaretia, bwa ngaia ake e tokanikai i aoia te aonaba.
9 Mangaia are, a riai aomata nako n ataia bwa mwiina a karaoa are e aki koaua ao n raoiroi i matau.
10 Ao nakomai ngkai, e taku te Uea, iroun te Tamnei, nakoia unimwaanen ana ekaretia, ao ti riai ni uaia ni marooro, bwa kam aonga n oota raoi.
11 Ti riai ni uaia ni marooro n aron te aomata ae e bon marooro nakon temanna ni itaramata.
12 Ngkai, ngkana te aomata e marooro e bon oota iroun te aomata anne, ibukina bwa e marooro n aron te aomata; n ai arou ae Ngai, te Uea, N na maroro ma ngkami bwa kam aonga n oota raoi
13 Mangaia are, Ngai te Uea I titirakiningkami te titiraki aei—tera ae kam katabuaki nako iai?
14 Kam na tataekina au euangkerio mai iroun te Tamnei, are te Tia Karaunano are e kanakoaki bwa e na reireia te koaua.
15 Ao ngkanne kam karekei tamnei are kam aki kona n oota iai, ao ni karekei bwa mai iroun te Atua; ao n aio kam eti iai?
16 Nooria kam na kaeka te titiraki aei i bon iroumi; ma e ngae n anne, I bon nanoanga nakoimi; ane e mamara i buakomi i mwin aei e na bon kakorakoraaki.
17 E koaua ae I tuangkami, ane e katabuaki irou ao ni kanakoaki bwa e na tataekina taekan te koaua mai iroun te Tia Karaunano, n Tamnein te koaua, e tataekinna mai iroun Tamnein te koaua ke man kawai tabeua?
18 Ao ngkana man kawai tabeua bon tiaki mai iroun te Atua.
19 Ao teuana riki, ane e karekea taekan te koaua, e karekea man Tamnein te koaua ke man kawai tabeua?
20 Ngkana man kawai tabeua bon tiaki mai iroun te Atua.
21 Mangaia are, bukin tera kam aki kona n oota ao n ataia, bwa ane e karekea te taeka man Tamnein te koaua e karekea n aron are e tataekinaki iroun Tamnein te koaua?
22 Mangaia are, ane e tataekinna ao ane e karekea, a oota imarenaia, ao a kaai ni karikirakeia ao a uaia ni kimwareirei.
23 Ao ane e aki karikirakea te aomata bon tiaki mai iroun te Atua, ao bon te rotongitong.
24 Bwa ane mai iroun te Atua e bon oota; ao ane e karekea te oota, ao n reitinako i nanon te Atua, e na karekea riki te oota; ao te oota anne e rikirake ootana ma n oota riki ni karokoa te bong ae kororaoi.
25 Ao e koaua ae I a manga tuangkami, ao I taekinna bwa kam aonga n ataa te koaua, bwa kam aonga ni kakionakoa te roo mai i buakomi;
26 Ane e katabuaki mai iroun te Atua ao ni kanakoaki, e bon rineaki bwa e na kakannato, e ngae ngke te kabanea ni mangori ao te tia mwakuri ibukiia ni kabane.
27 Mangaia are, ngaia te tia bwaini bwaai ni kabane; bwa bwaai ni kabane a bon mena i aan mwaakana, i karawa ao n te aonaba naba, te maiu ao te oota, te Tamnei ao te mwaaka, are e kanakomaiaki bwa nanon te Tama rinanon Iesu Kristo, are Natina.
28 Ma akea te aomata ae e bwaini bwaai ni kabane ma tii ngkana e kakororaoaki ao e kaitiakaki man bure nako.
29 Ao ngkana kam kakororaoaki ao kam kaitiakaki man bure nako, kam na bubuti bwaai ni kabane are kam tangiria n aran Iesu ao e na bon karaoaki.
30 Ma ataa aei, e na kaotaki nakoimi te bwai are kam na bubuti; ao ngkai kam rineaki nakon te mataniwi, e na mena i aan mwaakami taian tamnei.
31 Mangaia are, e na koro bukina, bwa ngkana kam noora te tamnei ae e kaoti are kam aki kona n oota iai, ao kam aki karekea te tamnei anne, kam na bubutia te Tama n aran Iesu; ao ngkana e aki anga nakoimi te tamnei anne, ngkanne kam na ataia bwa tiaki mai iroun te Atua.
32 Ao kam na anganaki, te mwaaka i aon te tamnei anne; ao kam na taetae ni kaitara te tamnei anne ma te bwana ae takarua bwa tiaki mai iroun te Atua—
33 Tiaki ma te taetae n aki akaaka ni kabuakaka, bwa kam na aki niniaki, ke ma te kamoamoa ke te kimwareirei, bwa kam aonga n aki tautoronaki irouna.
34 Ane e butimwaea te bwai mai iroun te Atua, e riai ni kakoaua bwa mai iroun te Atua; ao e na kimwareirei bwa e warekaki iroun te Atua bwa e tau ni karekea.
35 Ao man ongo ao ni karaoi bwaai aikai ake kam a tia ni karekei, ao bwaai ake kam na karekei i mwina—ao kam anganaki te abanuea iroun te Tama, ao te mwaaka n tokanikai i aon bwaai ni kabane ake aki kariaiakaki irouna—
36 Ao nooria, e koaua ae I tuangkami, kam a kakabwaiaki ngkami ake kam ongo ngkai au taeka aikai man wiin au tia mwakuri, bwa a kabwaraaki ami bure.
37 E riai au tia mwakuri ae Joseph Wakefield, are I rang ni kukurei irouna, ao au tia mwakuri ae Parley P. Pratt ni waki nako buakoia mwanga n te ekaretia ao ni kakorakoraia n te taeka ni kaunga nano;
38 Ao au tia mwakuri naba ae John Corrill, ke ni kabane au taan mwakuri ake a katabuaki nakon te nakoa aei, ao a na mwakuri i nanon te nne ni kurebe; ao a na akea te aomata ae e na totokoia man te mwakuri are I a tia n anganiia—
39 Mangaia are, e aki tau au tia mwakuri ae Edward Partridge ni bwaai aikai; e ngae n anne e riai n raira nanona ao e na bon kabwaraaki ana bure.
40 Nooria, ngkami ataei aika a uarereke ao n aki kona ni karekei bwaai ni kabane ngkai; kam riai n rikirake n te akoi ao n ataakin te koaua.
41 Tai maaku, ataei aika a uarereke, bwa au bwai ngkami, ao I a tia n tokanikai i aon te aonaba, ao ngkami are e a tia n anganai te Tama;
42 Ao bon akea i buakoia ake e a tia n anganai te Tama ae e na bua.
43 Ao te Tama ao Ngai bon tii teuana. I mena iroun te Tama ao te Tama irou; ao ngkana kam a tia ni butimwaeai, kam mena irou ao Ngai iroumi.
44 Mangaia are, I mena i buakomi, ao boni Ngai te tia kawakin tiibu ae raoiroi, ao ana atibu Iteraera. Ane e kateitei i aon te bwaa aei e na bon aki bwaka.
45 Ao e na roko te bong are kam na ongo iai bwanaau ao n noorai, ao n ataia bwa boni Ngai.