1 Imdenganyo, O dakayo nga elder ti simbaanko, ken denggenyo ti timek ti sibibiag a Dios; ken ikasoyo dagiti nainsiriban a balikas a maitedto kadakayo, a maibatay iti dinawatyo ken napagnunumuan a mainaig iti simbaan, ken dagiti espiritu a nagwaras iti daga.

2 Adtoy, pudno kunak kadakayo nga adu ti espiritu a sinsinan espiritu, a nagwaras iti daga, a mangal-allilaw iti lubong.

3 Ken kasta met a kinalikaguman ni Satanas ti mangallilaw kadakayo, tapno mapaksiatnakayo.

4 Adtoy, siak, ti Apo, sipsiputankayo, ket nakitak ti makarimon nga aramid iti simbaan a mangar-aramat iti naganko.

5 Ngem nagasat dagiti napudno ken makaibtur, iti man biag wenno iti patay, ta tawidendanto ti agnanayon a biag.

6 Ngem ay-ay pay dagiti manangallilaw ken managinkukuna, ta, kastoy ti kuna ti Apo, ukomekto ida.

7 Adtoy, pudno kunak kadakayo, adda dagiti managinkukuna kadakayo, a nangallilaw iti sumagmamano, a nangted iti bileg iti kabusor; ngem adtoy maibabawinto dayta;

8 Ngem mailasinto dagiti managinkukuna ket maisina, iti man biag wenno iti patay, a kas iti pagayatak; ket ay-ayto pay dagiti maisina iti simbaanko, ta agpada a rimbawanto ti lubong.

9 Gapuna, pagannadenyo ti tunggal tao amangan ta aramidenna ti saan a tumutop ken kinalinteg iti sangok.

10 Ket ita umaykayo, kinuna ti Apo, babaen ti Espiritu, kadagiti elder ti simbaanna, ket aglilinnawagtayo, tapno maawatanyo;

11 Aglilinnawagtayo a kas iti pannakilinnawag ti tao iti tunggal maysa a sangonsango.

12 Ita, iti pannakilinnawag ti tao maawatan ti tao, gapu ta makilinnawag a kas tao; a kas kaniak, nga Apo, a makilinnawag kadakayo tapno maawatanyo.

13 Gapuna, siak nga Apo damagek kadakayo daytoy a saludsod—ania ti nakaordenanyo?

14 Tapno ikasabayo ti ebangheliok babaen ti Espiritu, a kas iti Mangliwliwa a naibaon a mangisuro iti kinapudno.

15 Kalpasanna inawatyo nga espiritu ti diyo maawatan, ket inawatyo a nagtaud iti Dios; ket iti daytoy nainkalintegankayo kadi?

16 Adtoy sungbatanyo daytoy a saludsod iti bagbagiyo; nupay kasta, kaasiankayonto; asino man kadakayo ti nakapsut manipud ita mapapigsanto.

17 Pudno kunak kadakayo, isu nga inordenak ken imbaonko a mangikasaba iti balikas ti kinapudno babaen ti Mangliwliwa, iti Espiritu ti kinapudno, ikasabana kadi babaen ti Espiritu ti kinapudno wenno iti sabali a wagas?

18 Ket saan a nagtaud iti Dios no maaramid iti sabali a wagas.

19 Ket manen, isu a mangawat iti balikas ti kinapudno, awatenna kadi babaen ti Espiritu ti kinapudno wenno iti sabali a wagas?

20 Saan a nagtaud iti Dios no maaramid iti sabali a wagas.

21 Ngarud, apay a diyo maawatan ken ammo, nga isu nga umawat iti balikas babaen ti Espiritu ti kinapudno awatenna a kas inkasaba ti Espiritu ti kinapudno?

22 Gapuna, isu a mangikasaba ken isu a mangawat, agkinnaawatanda, ket agpadada a maitandudo ken agrag-oda a dua.

23 Ket dayta banag a saan a mangitandudo saan a nagtaud iti Dios, ngem ketdi iti kasipngetan.

24 Silaw dayta nagtaud iti Dios; ket isu nga umawat iti lawag, ken agtultuloy iti Dios, umawat iti ad-adu a lawag; ket rumanraniag a rumanraniag dayta a lawag agingga iti naan-anay nga aldaw.

25 Ket manen, pudno kunak kadakayo, ket ibagak tapno maammuanyo ti kinapudno, tapno mapaksiatyo ti kinasipnget kadakayo;

26 Isu nga inordenan ti Dios ken naibaon, isu met laeng ti matudingan a kangatuan, iti laksid ti kababana ken katulongan ti amin.

27 Gapuna, isu ti akinsakup iti amin a banag; ta adda iti babaenna amin a banag, iti langit ken iti daga nga agpadpada, ti biag ken ti lawag, ti Espiritu ken ti bileg, a naibaon babaen ti pagayatan ti Ama babaen ni Jesucristo, ti Anakna.

28 Ngem awan ti asino man a tao a mangsakup iti amin a banag malaksid no napatarnaw ken nadalusan iti amin a basol.

29 Ket no napatarnaw ken nadalusankayo iti amin a basol, dawatenyo ti ania man a kayatyo iti nagan ni Jesus ket maaramidto.

30 Ngem ammuenyo daytoy, maitedto kadakayo ti dawatenyo; ket iti panangtudingna kadakayo a mangipangulo, addanto iti babaenyo dagiti espiritu.

31 Gapuna, mapasamakto, a no makitayo ti espiritu nga agpakita a diyo maawatan, ket diyo awaten dayta nga espiritu, agdamagkayo iti Ama iti nagan ni Jesus; ket no dina ited kadakayo dayta nga espiritu, isunto ti pannakaammoyo a saan a nagtaud iti Dios.

32 Ket maitedto kadakayo, ti bileg a mangparmek iti dayta nga espiritu; ket ibagayo a maibusor iti dayta nga espiritu iti napigsa a timek a saan a nagtaud iti Dios—

33 Saan a makapabain a pammabalaw, tapno dinakayo marimbawan, uray pay ti panangiparammag wenno panagrag-o, no saan parmekennakayo dayta.

34 Isu a mangawat iti Dios, bay-anyo nga isu ti agsungbat iti Dios; ket bay-anyo nga agrag-o tapno isunto ti agsungbat iti Dios iti maitutop nga awatenna.

35 Ket babaen ti panangtungpalyo ken panangaramidyo kadagitoy banag nga inawatyo, ken dagitinto pay awatenyo kalpasan daytoy—ket inted kadakayo ti Ama ti pagarian, ken bileg a mangrimbaw iti amin a banag a saanna nga inordenan—

36 Ket adtoy, pudno kunak kadakayo, nagasatkayo a dumdumngeg ita kadagitoy a balikasko manipud iti ngiwat ti katulongak, ta pinakawannakayon ti basbasolyo.

37 Palubosanyo ti katulongak a ni Joseph Wakefield, a nakaay-aywak unay, ken ti katulongak a ni Parley P. Pratt a mapan kadagiti simbaan ket papigsaenda ida babaen ti mangigunamgunam a balikas;

38 Kasta met ti katulongak a ni John Corrill, wenno kas iti kaadu dagiti katulongak a naordenan iti daytoy a rebbengen, ket palubosanyo ida nga agtrabaho iti bangkag; ket diyo palubosan ti asino man a tao a mangtubeng kadakuada a mangaramid iti intudingko kadakuada—

39 Gapuna, iti daytoy a banag saan a nainkalintegan ni katulongak nga Edward Partridge; nupay kasta bay-anyo nga agbabawi ket mapakawanto.

40 Adtoy, babassitkayo nga ubbing ket diyo pay maibturan amin a banag ita; nasken a dumakkelkayo iti parabur ken iti pannakaammo iti kinapudno.

41 Dikayo agbuteng, babassit nga ubbing, ta kukuakayo, ket sakupko ti lubong, ket dakayo dagiti inted kaniak ti Amak;

42 Ket awan ti mapukaw kadagiti inted kaniak ti Amak.

43 Ket maymaysa ti Ama ken siak. Addaak iti Ama ken adda kaniak ti Ama; ket gapu ta inawatdak, addakayo kaniak ken addaak kadakayo.

44 Gapuna, addaak iti tengngayo, ket siak ti nasayaat a pastor, ken ti bato ti Israel. Isu a nabangon iti daytoy a bato saanto a maduprak.

45 Ket dumtengto ti aldaw a mangngegyo ti timekko ken makitadak, ken maammuanyo a siak.

46 Agsiputkayo, ngarud, tapno makapagsaganakayo. Pudno a kasta. Amen.