1 Dou vakatudaliga, oi kemudou na italatala qase ni noqu lotu, ka dolava na daligamudou ki na domo ni Kalou bula; dou muria na vosa ni yalomatua ka na tukuni yani vei kemudou, me vaka na nomudou kerekere ka dou sa duavata kina ena ka e baleta na lotu, kei na yalo era sa veilakoyaki voli e vuravura.

2 Raica, au sa kaya vakaidina vei kemudou, sa tu e vuqa na yalo e dauveivakacalai, era sa veilakoyaki voli e vuravura me ra vakacalai ira na kai vuravura.

3 Ka vakatalega kina ni sa segata ko Setani me vakacalai kemudou, io me lewai kemudou sara.

4 Raica, koi Au na Turaga, au sa raici kemudou, ka raica na veika vakasisila ena lotu sa vakatokai ena yacaqu.

5 Ia era na kalougata ko ira era sa yalodina ka vosota tiko, ni ra bula tiko se ni ra sa mate, ni ra na rawata na bula tawamudu.

6 Ia ena ca ko ira sa dauveivakacalai kei ira sa dauveivakaisini, ni sai ira oqori au na lewai ira, sa kaya vakaoqo na Turaga.

7 Raica, au sa kaya vakaidina vei kemudou, era sa tu na dauveivakaisini ena kemudou maliwa, io era sa vakacala e so, ka sa solia kina na kaukauwa vua na meca; raica sa rawa me ra na vakabulai tale ko ira oqori;

8 Ia ko ira na dauveivakaisini era na kilai ka muduki tani, se ni ra se bula tiko se ni ra sa mate, me vaka na noqu lewa; ka na ca vei ira sa muduki tani mai na noqu lotu, ni sa rawai ira ko vuravura.

9 Ia, raica me qarauni koya na tamata yadua de vakayacora na veika e sega ni dina ka dodonu e mataqu.

10 Ia oqo dou lako mai, sa kaya na Turaga, ena Yalo, vei ira na italatala qase ni nona lotu, me datou veitalanoa mada, mo dou rawa ni kila kina;

11 Me datou veitalanoa mada me vaka ga na nodrau veitalanoa e matana votu e rua na tamata.

12 Raica ni sa vakamacala e dua na tamata, ena kila tale ga na tamata, io ni rau sa veivosaki ga vakatamata; ia sa vakakina koi Au na Turaga, au na veivosaki vakakina kei kemudou, mo dou kila.

13 Ia, koi Au na Turaga au sa tarogi kemudou mada ena taro oqo—ena ilesilesi cava dou sa tabaki kina?

14 Mo dou vunautaka na noqu kosipeli ena Yalo, ko koya na Dauveivakacegui sa talai yani me vakatakila vei kemudou na ka dina.

15 Ia dou sa mai vakabauta tale e so na yalo dou sa sega ni kila, ka dou ciqoma me vaka ni dou sa ciqoma mai vua na Kalou; dou sa caka dodonu li ena ka oqo?

16 Raica dou na dui sauma ga vakai kemudou na taro oqo; ia, au na yalololoma ga vei kemudou; io au na vakaukauwataki koya sa malumalumu vei kemudou.

17 Au sa kaya vakaidina vei kemudou, ko koya au sa tabaka ka tala yani me vunautaka na vosa ni dina ena nona kaukauwa na Dauveivakacegui, ena Yalo ni ka dina, ena vunautaka li ena Yalo ni ka dina se ena dua tale na sala?

18 Ia kevaka sa caka ena dua tale na sala sa sega ni mai vua na Kalou.

19 Ka dua tale, o koya sa ciqoma na vosa ni dina, sa ciqoma li ena Yalo ni ka dina, se ena sala tani tale e so?

20 Kevaka sa caka ena dua tale na sala sa sega ni mai vua na Kalou.

21 O koya, a cava dou sa sega kina ni raica rawa ka kila, ni ko koya sa ciqoma na vosa ena Yalo ni ka dina sa ciqoma ni sa vunautaki ena Yalo ni ka dina?

22 Ia, ko koya sa vunau kei koya sa ciqoma erau sa veivakatataki ka marau vata.

23 Raica na ka sa sega ni veivakatataki cake, sa sega ni mai vua na Kalou, ia sa vu mai na butobuto.

24 Na veika sa vu mai vua na Kalou e veivakararamataki; kei koya sa ciqoma na rarama, ka tudei tiko ga vua na Kalou, ena vakararamataki vakalevu; io ena tubu cake tiko ga na nona rarama me yacova na siga uasivi ko ya.

25 Kei na dua tale, au sa kaya vakaidina vei kemudou, kau sa kaya mo dou kila kina na dina, mo dou vakasava tani kina na butobuto mai na kemudou maliwa;

26 Ko koya sa tabaki koya na Kalou ka talai yani, sai koya sa lesi me cecere duadua, e dina ga ni sa lailai sara ka nomudou italai kecega.

27 Ia, ko koya sa rawata na ka kecega; ni sa lewa na ka kecega, mai lomalagi kei vuravura, na bula kei na rarama, na Yalo kei na kaukauwa, ka talai mai me vaka na lewa nei Tamana ena vukui Jisu Karisito, na Luvena.

28 Ia sa sega na tamata sa rawata na ka kecega, ko koya ga sa vakavoui ka vakasavasavataki mai na nona ivalavala ca kecega.

29 Ia kevaka dou sa vakavoui ka vakasavasavataki mai na nomudou ivalavala ca kecega, dou na kerea na ka kecega dou vinakata ena yacai Jisu ena soli vei kemudou.

30 Ia mo dou kila oqo, ena soli vei kemudou na ka dou na kerea; ia ni dou sa lesi mo dou iliuliu, sa na soli vei kemudou na yalo.

31 Ia, ka na qai yaco, kevaka dou sa raica ni vakaraitaki e dua na yalo ka dou sega ni rawa ni kila, dou se bera ni ciqoma na yalo oqori, mo dou kerea vua na Tamada ena yacai Jisu; ia kevaka e sega ni solia mai vei kemudou na yalo oqori, dou na qai kila ni sa sega ni vu mai vua na Kalou.

32 Ka na qai soli vei kemudou na kaukauwa mo dou rawa kina na yalo ko ya; io mo dou vunauca sara ka kacivaka vakadomoilevu ni sa sega ni vu mai vua na Kalou—

33 Me kakua ena vosa veivakacacani kei na veibeitaki, de dou na rawai kina, ia me kakua tale ga ena dokadoka kei na reki, de dou na coriti kina.

34 Raica ko koya sa ciqoma mai vua na Kalou, me kila tikoga ni sa mai vua na Kalou; io me rekitaka ni raica na Kalou ni sa kilikili kaya me ciqoma.

35 Ia ena nomudou muria ka vakayacora na veika kecega dou sa ciqoma oti, kei na kena dou na qai ciqoma e muri—ka sa soli vei kemudou na matanitu mai vei Tamada, kei na kaukauwa mo dou rawa kina na ka kecega sa lewa ko koya—

36 Ia raica, au sa kaya vakaidina vei kemudou, sa kalougata koi kemudou sa rogoca na noqu vosa oqo ena gusuna na noqu tamata, ni sa vosoti na nomudou ivalavala ca.

37 Me rau lako yani na noqu tamata ka’u sa daulomana ko Josefa Wekivili, kei Pali P. Pereta vei ira na veimatalotu ka vaqaqacotaki ira ena vosa ni veivakauqeti;

38 Ka vakakina ko Joni Korili na noqu tamata, se ko ira kecega na noqu tamata era sa tabaki ki na itutu oqo, ka me ra cakacaka ena noqu were ni vaini; ia me kakua ni dua e vakataotaka na nodra vakayacora na itavi au sa lesia vei ira—

39 Ia, ena vuku ni ka oqo sa sega kina ni dodonu ko Etuwate Patereji na noqu tamata; ia me veivutuni ka na qai vosoti.

40 Raica, dou sa gonelalai ga ka sega ni kila na ka kecega; sa kilikili mo dou tubu cake ena loloma soli wale ka kila na ka dina.

41 Dou kakua ni rere koi kemudou na gonelalai, ni dou sa noqu, au sa vakamalumalumutaki vuravura, io sai kemudou eso vei ira sa solia vei au ko Tamaqu;

42 Ka na sega ni dua vei ira sa solia vei au ko Tamaqu ena yali.

43 Keirau sa duabau kei Tamaqu. Au sa tu vei Tamaqu ka sa tu vei au ko Tamaqu; ia ni dou sa ciqomi au, dou sa tu kina vei au kau sa tu vei kemudou.

44 Ia, Au sa tu ena kemudou maliwa, ka sai Au na ivakatawa vinaka, ka uluvatu kei Isireli. O koya sa tara cake ena uluvatu oqo ena sega sara ni bale.

45 Ena yaco mai na siga dou na rogoca kina na domoqu ka raici au, io dou na kila ni sai Au.

46 Dou vakatawa, o koya, mo dou vakarau tu kina. Io me vakakina. Emeni.