1 Raica, sa kaya vakaoqo na Turaga vei ira na italatala qase ko ira sa digitaka ka lesia ko koya ena veisiga e muri oqo, ena domo ni Yalona—

2 Sa kaya: Koi Au, na Turaga, au na vakatakila vei kemudou na ka au vinakata mo dou na cakava me tekivu oqo me yacova na gauna ni koniferedi ka tarava, ka na la’ki caka mai Misuri, ena vanua ka’u na vakatabuya me baleti ira na noqu tamata, ko ira na ivovo i Jekope, io ko ira sa nodra dina me vaka na veiyalayalati.

3 Ia, au sa kaya vakaidina vei kemudou, me rau lako yani ko Josefa Simici Lailai kei Sidini Rikitoni na noqu tamata, ena nodrau ilakolako ena gauna ga sa oti kina na nodrau vakavakarau mai na nodrau vale, ka me rau lako yani ki na vanua ko Misuri.

4 Ia kevaka erau sa yalodina tiko ga vei au, ena vakatakilai vei rau na ka me rau kitaka;

5 Ia ka na vakatalega kina, kevaka erau sa yalodina tiko, ena vakatakilai vei rau na vanua ka sa nomudou ivotavota vakawa.

6 Ia kevaka erau sa sega ni yalodina, erau na muduki tani, io au na kitaka ga na ka sa dodonu vei au.

7 Kei na dua tale, raica au sa kaya vakaidina vei kemudou, me rau kusarawa ena nodrau ilakolako ko Laimeni Waiti na noqu tamata kei Joni Korili na noqu tamata;

8 Ia me rau lako tale ga ko Joni Modoki na noqu tamata kei Airame Simici na noqu tamata ena nodrau ilakolako ki na vanua vata oqori, ia me rau muri vaka ki Ditoroi.

9 Ia me ra lako ka vunautaka yani na noqu vosa ena nodra ilakolako, me kakua tale ni dua na ka era tukuna, na nodra vosa ga na parofita kei na iapositolo me vaka sa volai tu, kei na veika sa vakatavulica vei ira na Dauveivakacegui mai na nodra masu ni vakabauta.

10 Ia me ra lakolako yarua yani, ka vunau voli ki na ivavakoso kecega ena nodra ilakolako, me ra veipapitaisotaki ena wai, kei na veitabaki ni liga ni ra sa cabe mai wai.

11 Ni sa kaya vakaoqo na Turaga, Au na vakayacora kusarawa na noqu cakacaka, ni sa voleka mai na gauna me’u na tala yani kina na lewa ka na qaqa.

12 Me qarauni koya ko Laimeni Waiti na noqu tamata, ni sa segata ko Setani me tauvuloni koya me vaka na qa ni sila.

13 Ia raica ko koya sa yalodina tiko, ena lesi me lewa na ka e vuqa.

14 Kei na dua tale, au na solia tale ga vei kemudou na ivakarau ni ka kecega mo dou kakua kina ni vakacalai; io sa lako voli yani ko Setani ena loma ni vanua, ka sa lako yani me temaki ira na veimatanitu—

15 Ia ko koya sa dau masu, ka sa malumalumu na yalona, sai koya oqo au sa ciqoma kevaka sa talairawarawa ki na noqu veicakacaka vakalotu.

16 Ia ko koya tale ga sa vunau, ka sa malumalumu na yalona, ka sa yalomalua ka veivakatataki cake na nona vosa, sa mai vua na Kalou ko koya oqori kevaka sa talairawarawa ki na noqu veicakacaka vakalotu.

17 Kei na dua tale, ko koya tale ga sa sautaninini ena noqu kaukauwa ena vakaukauwataki, ena vuataka na vua ni vakarokoroko kei na yalomatua, me vaka na ivakatakila kei na dina au sa solia vei kemudou.

18 Kei na dua tale, ko koya sa malumalumu ka sega na vuana, ena ivakarau sa tukuni oqo, sa sega ni noqu.

19 Ia, ena ivakarau oqo, dou na kilai ira kina na yalo kecega ena rukui lomalagi kece sara.

20 Ka sa yaco mai na siga; me na vakayacori kina vei ira na tamata me vaka na nodra vakabauta.

21 Raica, sa soli na ivakaro oqo vei ira kece na italatala qase ka’u sa digitaka.

22 Kei na dua tale, au sa kaya vakaidina vei kemudou, me rau lako tale ga yani ko Tomasi B. Masi na noqu tamata kei Esera Tea na noqu tamata, ka vunautaka yani na noqu vosa ena nodrau ilakolako ki na vanua vata ko ya.

23 Kei na dua tale, me rau lako tale ga yani ko Aisake Moli na noqu tamata kei Esera Buci na noqu tamata ena nodrau ilakolako, io me rau vunautaka yani na noqu vosa ena nodrau ilakolako ki na vanua vata ko ya.

24 Kei na dua tale, me rau lako tale ga ko Etuwate Patereji na noqu tamata kei Matini Erisi na noqu tamata ena nodrau ilakolako vata kei rau na noqu tamata ko Sidini Rikitoni kei Josefa Simici Lailai.

25 Me rau lako tale ga yani na noqu tamata ko Tevita Witima kei Avi Witiloka ka vunau voli ena nodrau ilakolako ki na vanua vata ko ya.

26 Ka me rau lako talega yani na noqu tamata ko Pali P. Pereta kei Osoni Pereta, ka vunau voli ena nodrau ilakolako, io ki na vanua vata ko ya.

27 Me rau lako tale ga ko Solomoni Enikoka kei Simione Kata na noqu tamata, ki na vanua vata ko ya, ka vunau voli ena nodrau ilakolako.

28 Me rau lako talega na noqu tamata ko Etusoni Vula kei Jekope Sikote ena nodrau ilakolako.

29 Me rau lako talega na noqu tamata ko Livai W. Enikoka kei Sepeti Kolorini ena nodrau ilakolako.

30 Me rau lako talega na noqu tamata ko Rinoli Kauni kei Samuela H. Simici ena nodrau ilakolako.

31 Me rau lako talega na noqu tamata ko Wila Balawini kei Viliame Kata ena nodrau ilakolako.

32 Io me rau tabaki ruarua na noqu tamata ko Niueli Naiti kei Sela J. Kirivini, ka lako ena nodrau ilakolako.

33 Io, au sa kaya vakaidina, me ra lako kece yani ko ira oqo ki na dua ga na vanua, io me duidui na sala era dui muria, raica me kakua ni dua e tura na yavu ka dua tani, se dua e muria na nona sala tale e dua.

34 Ko koya sa yalodina tiko, sai koya oqo ena maroroi ka vakalougatataki, ka na vua vakalevu.

35 Kei na dua tale, au sa kaya vei kemudou, me rau lako yani ko Josefa Wekivili kei Solomoni Amuviri na noqu tamata, ena nodrau ilakolako ki na veivanua mai na tokalau;

36 Me rau cakacaka vagumatua vata kei ira na lewe ni nodrau dui matavuvale, me kakua tale ni dua na ka me ratou vunautaka, na veika ga era a tukuna na parofita kei na iapositolo, na veika eratou a raica ka rogoca ka vakabauta, me vakayacori kina na veika sa parofisaitaki tu.

37 Ena vuku ni talaidredre, me kau tani kina na veika sa soli vei Emani Beseti, ka soli ki na buradelai Saimoni Raida.

38 Kei na dua tale, au sa kaya vakaidina vei kemudou, me tabaki ko Jereti Kata me bete, kei Joji Jemesa talega me tabaki me bete.

39 Ko ira na vo ni italatala qase me ra vakatawana na isoqosoqo lotu, ka vunautaka yani na vosa ena veiyasana vakavolivoliti ira; ia me ra cakacaka vakaukauwa ka dui qaravi ira ga, me kakua kina ni ra qarava na kalou matakau ka caka ca.

40 Ka nanumi ira ena ka kecega ko ira na dravudravua kei na vakaleqai, na tauvimate kei ira sa kune rarawa, ia ko koya sa sega ni kitaka vakakina, sa sega ni noqu tisaipeli.

41 Ia me ratou kauta yani ko Josefa Simici Lailai kei Sidini Rikitoni, kei Etuwate Patereji na noqu tamata e dua na ivolatara mai na lotu. Me caka talega e dua me baleti Oliva Kaudari na noqu tamata.

42 Ia sa vakaoqori, me vaka au sa tukuna, kevaka dou sa yalodina dou na vakasoqoni kemudou vata mo dou reki ena vanua ko Misuri, na vanua sa nomudou ivotavota vakawa, ka ra sa tiko kina edaidai na nomudou meca.

43 Ia, raica, koi Au na Turaga, au na vakatotolotaka na tara ni koro ko ya, au na vakaisalataki ira na yalododonu me ra reki ka marau vata kina.

44 Raica, koi Au ko Jisu Karisito, na Luve ni Kalou, raica au na laveti ira cake ena siga mai muri. Ena yaco vakakina. Emeni.