Nkeji 54
Mkpughe e nyere site n’aka Joseph Smith Onye-amụma nye Newel Knight, na Kirtland, Ohio, Jun 1831 (History of the Church, 1:180–181). Ndị-otu Nzukọ-nsọ na ngalaba dị na Thompson, Ohio, nwere nkewa n’ajụjụ ndị metụtara nnyefechasị arịa nile. Ịchọ-nke onwe na oke-ọchịchọ pụtara ìhè, ma Leman Copley emebiwo ọgbụgba-ndụ ọ gbara inyefechasị nnukwu ubi ya dịka ihe-nketa nke Ndị-nsọ na-abịarute site na Colesville, New York. Ezra Thayre bịakwara daba n’ime arụmarụ ụka ahụ. N’ihi nke a, Newel Knight (onye-isi nduzi ngalaba dị na Thompson) na ndị okenye ndị ọzọ bịakwutere Onye-amụma na-ajụ otu a ga-esi aga-n’iru. Onye-amụma jụrụ Onye-nwe ma nata mkpughe nke a. (Lee nkeji 56, nke be ebe okwu a gara n’iru.)
1–6, Ndị-nsọ nile aghaghị idebe ọgbụgba-ndụ ozi-ọma iji nweta ebere; 7–10, Ha aghaghị inwe ndidi n’ime mkpagbu.
1 Lee, otu a ka Onye-nwe kwuru, ọbụna Alfa na Omega, mmalite na ọgwụgwụ ọbụna ya onye ahụ nke a kpọgburu maka mmehie nile nke ụwa.
2 Lee, n’ezie, n’ezie, a sị m gị, nwa odibo m Newel Knight, ị ghaghị iguzosike n’ọkwa-ọrụ nke ahụ m hopụtaara gị.
3 Ma ọ bụrụ na ụmụ nne gị nwoke chọrọ ịgbanarị ndị iro ha nile ka ha chegharịa site na mmehie ha nile, ma dịrị umeala n’ezie n’iru m ma nwekwa mụọ nke nchegharị.
4 Ma dịka ọgbụgba-ndụ ha mere n’iru m e mebiworị, ọbụna otu a ọ bụrụwo ihe efu n’abaghị kwa n’ihe.
5 Ma ahụhụ ga-adịrị ya bụ onye mmebi iwu a ga-esi n’aka ya bịa, n’ihi na ọ kara ya mma na o mikpuru n’ogbu nke oke osimiri.
6 Mana ngọzi na-adịrị ndị debere ọgbụgba-ndụ ma debekwa iwu-nsọ, n’ihi na ha ka a ga-emere ebere.
7 Ya mere, gaa nụ ugbua gbapụ n’ala ahụ, ka ndị iro unu ghara ịbịakwute unu; ma gaa nụ njem unu, ma họpụta onye unu chọrọ ka ọ bụrụ onye-ndu unu, ma kwụọrọ unu ego unu nile.
8 Ma otu a ka unu ga-aga njem unu baa na mpaghara nile n’ọdịda anyanwụ, ruo n’ala nke Missouri, ruo n’oke ala nile nke ndị Leman.
9 Ma mgbe unu gasịrị-njem, lee, a sị m unu, chọọ nụ ụzọ ibi ndụ dịka ndị mmadụ, ruo mgbe m dozichaara unu ebe.
10 Ma ọzọ, nwee ndidi n’ime mkpagbu ruo mgbe m ga-abịa; ma, lee a na m abịa ọsọ-ọsọ, ma ụgwọ ọrụ m dịkwa n’aka m, ma ndị nke chọrọ m site na mbụ ga-enwe ezumike nye mkpụrụ-obi ha nile. Ọbụna otu a. Amen.