Wóltaʼii 56
Diyin Yá Yáłtiʼí Joseph Smith díí diyingo bił ííshją́ą́ ályaa, Kirtland, Ohiodi, Yaʼiishjááshchilí 15, 1831 yihahgo. Díí diyingo ił ííshją́ą́ ályaaígíí biyiʼ éí Ezra Thayre bichʼah adooshkeed háálá áłtséédą́ą́ʼ bee hazʼáanii tʼáadoo yikʼeh hóólʼįįdígíí biniinaa (díí “bee hazʼáanii” éí saad dashijaaʼígíí 8 góneʼ bikááʼ), éí Joseph Smith bí bá dooleełgo bił ííshją́ą́ ályaa, éí Thayre Frederick G. Williams bidáʼákʼehgi yindoolnishígíí bee nabidiʼneeztʼą́ą́ʼ, éí ákweʼé bighan. Áádóó éí ííshją́ą́ ályaaígíí ałdóʼ Thayre Thomas B. Marsh Missourigóó yił dooʼashyę́ę bitsʼą́ą́ʼ niʼ kólyaa (wóltaʼii 52:22gi yídííłtah).
1–2, Jesus Christ Yá Naazíinii bitsin ałnáosdzo ndeididootį́į́ł dóó Diyin Bóhólníihii yikééʼ yikahgo bee yisdáʼiildéehii ńdeididoolééł; 3–13, Diyn Bóhólníihii bibee hazʼáanii aa yiilé dóó nínéídiyiilé, dóó doo akʼeh dahółʼínígíí nahjįʼ kwíídoolííł; 14–17, Yéego daʼatʼínígíí teʼéʼį́ danilínígíí doo yíkáʼiijeehii yíi bikʼijįʼ siláa doo, áádóó téʼéʼį́ danilíinii doo bijéí joobaʼí ádeiyósinígíí yíi bikʼijįʼ siláa doo; 18–20, Téʼéʼį́ danilíinii bikʼihojídlí háálá éí aʼátʼeʼ doo bijéí biiʼ dahólǫ́ǫ da, éí nahasdzáán daabí doo.
1 Daʼíísínółtsʼą́ą́ʼ, O dineʼé shízhiʼ tʼáá aaníí ádadohníigo chodaałʼínígíí, ní Bóhólníihii nihiDiyin God; háálá áko shooh, tʼóó ndaastéeʼii bichʼįʼ shá háchʼįʼ, áádóó shighaan atíʼáłʼíinii dóó shi ánahwiitʼaahii bił béédahodoozįįł, éí atíʼáłʼį́ dóó báhádzidi yee ałąą dineʼé dahdeinééhii yaa doogááł.
2 Áádóó tʼáá háiida bitsin ałnáozʼáhí doo dahyidiitʼįįhgóó dóó doo shikééʼ dahdiighááhgóó, dóó doo shibee hazʼáanii yikʼeh hółʼį́įgo, éí doo yisdádoogááł da.
3 Áko shooh, Shí, Diyin Bóhólníihii, ánihidishní; tʼáá háíshį́į́ tʼáadoo akʼeh hóółʼįįdígíí éí tʼáá shí ííniizį́įʼgo nahjįʼ kódeeshłííł, éí bee hazʼáanii baa níláhę́ę kʼiinítiʼgo.
4 Éí bąą Shí, Diyin Bóhólníihii, bee haasdziihígíí dóó tʼáá éí shí bee shohólníihgo ałdóʼ niʼ kódeeshłííł, háálá shił tʼáá ákótʼé; áádóó díí tʼáá átʼé tʼóó ndaastʼeeʼii bąąh naazláa doo, ní Diyin Bóhólníihii.
5 Ákohgo, shá naalʼaʼí Thomas B. Marsh dóó Ezra Thayre bee bichʼįʼ haasdzííʼyę́ę kʼad nahjįʼ kóshlééh, áádóó shá naalʼaʼí Thomas naanish ániidígíí łaʼ baa náádeitʼą́, áko tʼáá tsxíłígo Missouri kéyahgóó díínááł biʼdooniid, áádóó shá naalʼaʼí Selah J. Griffin ałdóʼ ákǫ́ǫ́ yił dooʼash.
6 Háálá áko shooh, Shí shá naalʼaʼí Selah J. Griffin dóó Newel Knight bee bichʼįʼ haasdzíʼę́ę nahjįʼ kóshlééh, Thompsondi shidineʼé, doo ndabiʼdídzilígíí dóó akʼijįʼ danilínígíí biniinaa.
7 Ákohgo, bíniʼdii shá naalʼaʼí Newel Knight tʼáá yił naakai doo; áádóó ákǫ́ǫ́ akééʼ dadiikah danízinígíí bíniʼ yikééʼ yikah doo, éí shidááhdóó yínííł danilį́, áádóó bíniʼ kéyah baa diníʼánéégóó yidooʼish.
8 Áádóó ałdóʼ, Shí tʼáá aaníigo nichʼįʼ haasdziih, éí shá naalʼaʼí Ezra Thayre ádaahaʼniihígíí yaa náʼiidookąął, áádóó tʼáá shí tʼéiyá nízinígíí ałdóʼ, dóó ałtséédą́ą́ʼ bee haasdzííʼgo haa níláhą́ą bikʼeh hojíłʼį́į doo éí kéyah bikááʼ haghanígíí bídéétʼiʼ.
9 Áádóó díí beʼjiilaago, éí kéyah doo ałtsádadoodzoh da, áko Missouri kéyahdi bee hakʼihodiiniiʼígóó tʼahdii jidoogááł;
10 Doo ákójiidzaagóó éí béeso níjiníláhígíí haa ńdooʼnił, dóó yíwohjįʼ dashdidoogááł, dóó shisodizindóó nahjįʼ kóhodiʼdoolnííł, Diyin God Tʼáá Ałtsoní bee Bóhólníihii kóní;
11 Áádóó nahasdzáán dóó yádiłhił bił yóóʼahóóyáa ndi, díí saad doo náádidoolyééł da, ákondi ałtso bohodoolnííł.
12 Áádóó shá naalʼaʼí Joseph Smith, Jun., niʼdoolééł, áko shooh, Shí, Diyin Bóhólníihii, Missouri kéyahdi bichʼįʼ nináʼdeeshdlééł, áko ndaʼdooléłígíí yitsʼą́ą́dóó íʼiilaaígíí binahjį bichʼįʼ nináʼdoolyééł;
13 Háálá ádaʼałínígíí bikʼehgo bichʼįʼ ndaʼdoolyééł, kéyah tʼáá daabí dooleełgo baa dahideestʼánígíí bitsʼą́ą́dééʼ.
14 Áko shooh, Diyin Bóhólníihii shidineʼé ííłní—ląʼí da naanish ádadoolíłígíí hólǫ́ dóó baa ndaʼiidoohkąąłígíí ałdóʼ; háálá áko shooh, nihibąąhági ádaatʼéii baa ákoniizį́į́ʼ, dóó doo bee nihaa nídideeshʼááł da, háálá tʼáá nihí ndahoohʼáhígíí bikʼehgo ádaʼoohłaaígíí biniinaa.
15 Áádóó nihijéí doo nihił aadaaníi da. Áádóó tʼáá aaníinii doo bikʼeh dahonołʼį́į da, dóó doo yáʼádaatʼéehii nihił danizhóní.
16 Diné daʼatʼíinii bichʼįʼ yíi silá, áko nihinaadeełii baa dahojoobaʼígíí doo baa dahohłée da, áko háálá bee daʼohtʼínígíí nihiyiʼ naazíinii deidoołchxǫǫł; áádóó díí éí nádááhdi díí tʼáá íiyisíí baa yínííł danohsingo kódadidoohniił, dóó ánahwiitʼaahdi, dóó bąąhági átʼéii bichʼįʼ áháchiʼdi: Ndaʼiidlááh biláʼooskid, áádóó shį́ niʼ kódzaa, dóó shiiʼ sizíinii doo yisdááltʼį́į da!
17 Diné baa dahojoobaʼígíí yíi bikʼi silá, éí bijéí doo kʼídaʼiistǫʼ da, dóó biʼ iiʼnaazíinii doo yínííł danízin da, dóó doo ńdaniichaad da, dóó nááná łaʼ diné binichǫʼí tʼah yíká dahdadilnih, dóó binááʼ tʼah bił dahatsoh, dóó doo tʼáá bí bílaʼ yee ndaalnishígíí!
18 Ákondi baa dahojoobaʼí bijéí daniłtólígíí bikʼidahojídlí, éí bijéí kíʼdaʼiistǫʼ, dóó biiʼ naazíinii yínííł danilį́, háálá Diyin God bidziil dóó ayóó átʼéego bił hazʼánígíí yisdábidooʼishgo deidoołtsééł; háálá nahasdzáán atʼínígíí daabí doo.
19 Háálá áko shooh, Diyin Bóhólníihii éí doogááł, dóó yee niʼdoolééłii éí yidoolééł, dóó diné tʼáá łaʼí nízínígo yichʼįʼ niʼdooléeł, áádóó baa dahajoobáʼígíí yéego bił dahodoozhǫǫł;
20 Áádóó bidaʼíchíhígíí éí nahasdzáán daabí doo daʼíchíí dóó daʼíchííjįʼ, hoolʼáágóó dóó ahoyéelʼáágóó. Áádóó áko baa yáshtiʼígíí niʼ kódeeshłííł. Tʼáá ákótʼée doo. Amen.