1 Adtoy, nagasat, kuna ti Apo, dagiti immay iti daytoy a daga a naitalimudok ti imatangda iti dayagko, a maibatay kadagiti bilinko.

2 Ta isuda nga agbiag tawidendanto ti daga, ket isuda a matay aginanadanto iti amin a trabahoda, ket sumarunonto kadakuada ti bunga dagiti aramidda; ket umawatdanto iti korona kadagiti mansion ti Amak, nga insaganak a para kadakuada.

3 Wen, nagasat dagiti agindeg iti daga ti Zion, a nangtungpal iti ebangheliok; ta awatendanto a gunggonada dagiti nasayaat a banag iti daga, ket agbunganto iti nawadwad.

4 Ken makoronaandanto met iti parabur manipud iti ngato, wen, ken kadagiti bilin a saan la a bassit, ken kadagiti paltiing iti panawenda—isuda a napudno ken naregta iti imatangko.

5 Gapuna, itedko kadakuada ti bilin, a kastoy ti kunak: Ayatenyo ti Apo a Diosyo, iti amin a pusoyo, iti amin a kabaelan, panunot, ken pigsayo; ket iti nagan ni Jesucristo pagserbianyo.

6 Ayatenyo ti padayo a tao a kas iti bagiyo. Saankayo nga agtakaw; wenno makiabig, wenno mamapatay, wenno agaramid iti ania man a kaarngina.

7 Agyamankayo iti Apo a Diosyo iti amin a banag.

8 Mangidatonkayo iti sakripisio iti Apo a Diosyo iti kinalinteg, a kas iti dayta nasneban a puso ken napnuan babawi nga espiritu.

9 Ken tapno ad-adda a mapagtalinaedyo ti bagiyo nga awanan mulit iti lubong, mapankayo iti balay a pagkararagan ket mangidatonkayo iti sakramento iti nasantuan nga aldawko;

10 Ta pudno a daytoy ti aldaw a naituding a panaginanayo kadagiti trabahoyo, ken ti panagdaydayawyo iti Kangatuan;

11 Nupay kasta maidaton dagiti kariyo iti kinalinteg iti amin nga aldaw ken iti amin a panawen;

12 Ngem laglagipenyo nga iti daytoy, ti aldaw ti Apo, idatonyo dagiti sagut ken sakramentoyo iti Kangatuan, a mangipudno iti basbasolyo kadagiti kabsatyo, ken iti imatang ti Apo.

13 Ket awan ti sabali a banag nga aramidenyo iti daytoy nga aldaw, isaganayo laeng ti taraonyo a sipupuso tapno naan-anay ti panagayunoyo, wenno, iti sabali a pannao, tapno mapnokayo iti rag-o.

14 Pudno, daytoy ti panagayuno ken panagkararag, wenno iti sabali a pannao, panagrag-o ken panagkararag.

15 Ket no la ketdi aramidenyo dagitoy a banag nga addaan panagyaman, nga addaan iti naragsak a puspuso ken ruprupa, saan a nalabes a panagkatkatawa, ta basol daytoy, ngem iti narag-o a puso ken naragsak a rupa—

16 Pudno kunak, a no la ketdi aramidenyo daytoy, agpaay kadakayo ti pakabuklan ti daga, dagiti ayup iti kataltalonan ken dagiti tumatayab iti tangatang, ken dayta agkalatkat kadagiti kayo ken magna iti daga;

17 Wen, ken ti ruot, ken dagiti nasayaat a banag nga agtaud iti daga, para taraon man wenno aruaten, wenno para kadagiti balay, wenno para kadagiti sarusar, wenno para kadagiti mula a kayo nga agbunga, wenno para kadagiti minuyongan, wenno para kadagiti bangkag;

18 Wen, amin a banag nga agtaud iti daga, iti panawenda, naaramidda para iti pagimbagan ken aramaten ti tao, agpada a mangparagsak iti mata ken mangparag-o iti puso;

19 Wen, para taraon ken para aruaten, ramanan ken lang-aben, a pangpapigsa iti bagi ken pangparegta iti kararua.

20 Ket naragsakan ti Dios isu nga intedna amin dagitoy a banag iti tao; ta agingga iti daytoy a panungpalan naaramidda tapno aramaten, a nga addaan pangngeddeng, saan a tapno agsurok, wenno babaen ti pammilit.

21 Ket awan ti pagbasolan ti tao iti Dios, wenno awan ti pakaaronan ti pungtotna, malaksid kadagiti saan a mangipudno iti imana ti amin a banag, ken dagiti di agtungpal kadagiti bilinna.

22 Adtoy, maibatay daytoy iti paglintegan ken kadagiti propeta; gapuna, didak riribukenen maipanggep iti daytoy a banag.

23 Ngem adalenyo nga asino man a mangaramid kadagiti aramid ti kinalinteg awatennanto ti gunggonana, a kas iti kappia iti daytoy a lubong, ken agnanayon a biag iti masungad a lubong.

24 Siak, ti Apo, nasaokon, ket paneknekan ti Espiritu. Amen.