Wóltaʼii 59
Diyin Yá Yáłtiʼí Joseph Smith díí diyingo bił ííshją́ą́ ályaa, Zion, Jackson County hahoodzohgi, Missouridi, Biniʼantʼą́ą́tsʼózí 7, 1831 yihahgo. Tʼah doo díí diyingo ííshją́ą́ éʼélnééhgóó, kéyah yiilzį́į́ʼ, Diyin Bóhólníihii ádííniidígíí bikʼehgo, dóó Diyin bighan ntsaaígíí bá hazʼą́ą dooleełgo bikʼihodiiniiʼ. Diyingo ííshją́ą́ ályaaígíí bijį́, Polly Knight, Joseph Knight Sr., bichʼooní éí dahnídiidzá, tsʼídá ałtsé Sodizinjí atah nilíinii Ziondi dahnídiidzá. Áłtsé idahidiikaaígíí díí diyingo ííshją́ą́ ályaaígíí “diyin yá naazínígíí damóo dílzin dóó haitʼáo chʼiyáán doo yidą́ dílzin dóó sohodizin” bee naʼnitinígíí átʼé dadííniid.
1–4, Diyin Yikééʼ Naazíinii éí Ziondi biʼoodląʼ yadaʼolíhígíí bikʼidahojidoodliił; 5–8, Éí Diyin Bóhólníihii ayóó ádeiyóʼní dóó yá ndaalʼaʼ doo dóó Bibee hazʼáanii yikʼeh dahiináa doo; 9–19, Diyin Yikééʼ Naazíinii éí Diyin Bóhólníihii bijį́ hodílzin yikʼeh dahóółʼį́įgo, éí atsʼíís dóó iiʼ sizíiniikʼehjí bikʼidahojídlį́į doo; 20–24, Diyinkʼehgo dahiinánígíí éí nahasdzáań bikáaʼgi kʼé bee bá hadaʼiisdzį́į́ʼ dóó hoolʼáágóó iiná náásgóó kéédahatʼį́į́ dooleełígíí baa dahidoolyééł.
1 Áko shooh, bikʼidahojídlį́į doo, shiʼayóó átʼéii yichʼįʼ dadéezį́įʼgo díí kéyah yikááʼjįʼ haaskaaígíí, éí shibee hazʼáanii yikʼehgo ádaʼiilaa, ní Diyin Bóhólníihii.
2 Háálá dahiinánígíí nahasdzáán baa dahidoolyééł, áádóó dahnídahidiikaiígíí binaanish tʼáá ałtso yitsʼą́ą́dóó háádadoolyįh, dóó binaanish ádeiyiilaaígíí tʼáá bił dahólǫ́ǫ doo; shiZhéʼé bighan ílíinii góneʼ naatʼááh chʼah baa dahidootʼááł, éí bá hashtʼeishłaa.
3 Aooʼ, Zion kéyahdi kéédahatʼíinii bikʼidahojídlíi doo, éí shinaʼnitin bee yisdáʼiildéehii yikʼeh dahółʼį́į ńtʼę́ę́ʼ; háálá bí éí nahasdzáán bikááʼ yáʼádaatʼéehii deiyosbánígíí baa dahidoolyeeł, áádóó tʼáá áłahjįʼ nahasdzáán yikááʼ naʼniłtʼį́į́h doo.
4 Áádóó ałdóʼ yáʼąąshdééʼ akʼidahojídlí naatʼá chʼah bee bikʼidahodidoonih, aooʼ, áádóó tʼáá ałtso bee hazʼáanii, dóó ałkéé hoolzhishgo diyingo ííshją́ą́ ádaalyaaígíí bee—éí shidááhdóó hadaʼólnínígíí dóó tʼáá áwołí bee ádaatʼínígíí.
5 Ákohgo, shibee hazʼáanii łaʼ baa deeshłééł, kódíshníigo: Nijéí tʼáá átʼéé ńtʼę́ę́ bee, anitʼéhígíí, níniʼ, dóó neʼadziil tʼáá átʼé bee Bóhólníihii niDiyin God ayóóʼííníʼní; áádóó Jesus Christ bízhiʼ binahjįʼ bá nanilʼaʼ doo.
6 Tʼáá ni ádííʼníʼnínígi átʼéego ninaagóó kéédahatʼínígíí ayóóʼííníʼní. Tsʼídá doo adiʼnííʼį́įł da; éí doodago tsʼídá doo aaʼdidííléeł da, éí doodago diné tsʼída doo diyííłhééł da, éí doodago ákó daatʼéhígíí doo ádíílííł da.
7 Tʼáá ałtsojįʼ Bóhólníihii niDiyin God bichʼįʼ ahééh nínízin doo.
8 Diyinkʼehgo yínááłgo Bóhólníihii niDiyin God yáʼátʼééh éʼélíinii bee bichʼįʼ nááʼdiiyííłnih, nijéí dóó niiʼ sizʼíinii yínííł nilį́įgo bee.
9 Áádóó áko nahasdzáán bitsʼą́ą́dóó bąąhági átʼéii ádąąh jitʼį́įgo, shikin biiʼ sohodizin góneʼ yah adoohhááł áádóó sháhodílzin bijį́įdi oʼoolʼįįł bee shichʼįʼ náádaʼíyóołniih doo;
10 Háálá tʼáá aaníí díí bijį́ éí naanish bitsʼą́ą́dóó háádíílyįh, áádóó Tsʼídá Aláahdi Ayóó Átʼéii bichʼįʼ hodíínísin dooł;
11 Ákótʼée ndi bee ádee héínídzíʼígíí éí diyingo tʼáá ákwííjį́ dóó tʼáá ałahjįʼ áníłʼį́į doo;
12 Ákondi béénílniih, Diyin Bóhólníihii bihááʼáyį́į́h jį́į́ góneʼ, Tsʼídá Áláahdi Ayóó Átʼéii bee bichʼįʼ nááhíłniih dóó hodínísingo oʼoolʼįįł ádííłííł, asínísihígíí nihikʼis bee bił hodíílnih, áádóó Diyin Bóhólníihii bidááhdóóʼ ałdóʼ.
13 Áádóó díí bijį́ éí tsʼídá doo nááná łaʼ ádííłííł da, nijéí biniyéii biiʼ hólǫ́ǫgo chʼiyáán hashtʼedíílííł áko chʼiyáán ádąąhnitʼínígíí hadíłtʼéego ádíílííł, éí doodago, kótʼáo ááłdíshní, haałtʼéego nihił dahózhǫ́ǫ doo.
14 Díí éí tʼáá aaníí, tó dóó chʼiyáán ádąąhjitʼį́įgo dóó sozdilzingo, éí doodago kótʼáo ááłdíshní, éí ił hózhǫ́ dóó sohodizin átʼé.
15 Áádóó ahééh nínízingo díígiʼ átʼáo éʼéłʼį́įgo, niniiʼ dóó nijéí bił hózhǫ́ǫgo, tʼáá ádzaago oodloh bąąh ádingo, háálá éí bąąhági átʼéii átʼé, ákondi nijéí bił hózhǫ́ǫgo dóó niniiʼjįʼ nił hózhónígíí bee bééhózingo—
16 Shí tʼáá aaníigo nichʼįʼ haasdziih, áko díigi átʼáo íʼiinlaago, tʼáá ałtso nahasdzáán bikááʼ siléí ni doo, naaldlooshii daʼałchiní dóó hódah ndaatʼaʼí, áádóó tsin yąąh ndaanaʼí dóó nahasdzáán yikáá ndaakaiígíí ałdóʼ;
17 Aooʼ, dóó chʼil azeeʼ, dóó nahasdzáán bikááʼdóó yáʼádaatʼéehígíí ałdóʼ, éí chʼiyáán éí doodago ééʼ, éí doodago hoghan bá, éí doodagao tłʼoh bighan, éí doodaiiʼ hadaneesánígíí bineestʼąʼ yílʼáhígi, éí doodago dáʼákʼeh bá, éí doodago chʼil naʼatłʼoʼí kʼéédílyééhdi;
18 Aooʼ, tʼáá ałtsóní nahasdzáán bikááʼ nídahadleeh, ndaʼniltʼį́į́h baa hoolzhizh góneʼ, éí nihokááʼ dineʼé bá dóó chodeidoołʼįįł biniyé ályaa, bił yáʼádaatʼéeh doo dóó bijéí bił dahózhǫ́ǫ doo;
19 Aooʼ, éí chʼiyáán éí doodago ééʼ bá, éí alniih dóó alchin bá, bitsʼíís bidziilgo dóó biʼii sizíinii bił hasihgo ádoolnííł.
20 Áádóó Diyin God díí tʼáá ałtsóní nihokááʼ dineʼé yá ayiilaaígíí yaa bil hózhǫ́; háálá díigi átʼáo choidoolʼįįł biniyé ádaalyaa, hazhóʼó baa ntsáhákeesgo, bilááhgóó éí dooda, tʼóó aghaʼiilyéego ałdóʼ dooda.
21 Áádóó ádin doo éí diné haitʼáo da Diyin God bíní jidoołʼaał da, éí doodago ádin doo yikʼijįʼ báhodoochįįł da, tʼáá hazhóʼí doo tʼáá ałtsóní bílákʼeedóó áhoonííłgo yaa ahééh nízinígíí, dóó doo bibee hazʼáanii yikʼeh hółʼínígíí tʼéiyá.
22 Áko shooh, díí éí bee hazʼáanii dóó Diyin yá yádaałtiʼí bikʼehgo bá nahodootʼááł; ákohgo, díí tʼáadoo bee shaa nánítʼíní doo.
23 Ákondi bídahoołʼaah tʼáá háiida naanish yáʼátʼéehii ííłʼį́įgo éí yoosbánígíí baa doolyééł, díí nahasdzáán bikááʼ kʼé bił naaztiʼígíí ndi, áádóó hoolʼáágóó iiná náásgóó kéédahatʼį́į́ dooleełígíí baa dahidoolyééł.
24 Shí, Diyin Bóhólníihii, díí bee haasdzííʼ, dóó Iiʼ Sizį́ Diyinii haneʼ naháasdzooígíí éí yaa halneʼ. Amen.