Seksen 60
Revelesen we Lod i givim tru long Profet Josef Smit, long Indipendens, Jakson Kaonti, Misuri, long namba 8 Ogis 1831. Long taem ia, ol elda we oli bin go long Jakson Kaonti mo bin tekem pat long dedikesen blong graon mo ples blong tempol oli bin wantem save wanem bae oli mas mekem.
1–9, Ol elda oli mas prijim gospel long ol kongregesen blong olgeta nogud man; 10–14, Oli no mas westem taem blong olgeta, mo oli no mas berem ol talen blong olgeta; 15–17, Oli save wasem leg blong olgeta olsem wan testemoni agensem olgeta we oli sakemaot gospel.
1 Luk, olsem ia nao Lod i talem long ol elda blong jos blong hem, we oli mas gobak kwiktaem long graon we oli bin kamaot long hem: Luk, mi glad we yufala i bin kam long ples ia;
2 Be, mi no glad long sam long olgeta, from we oli no wantem openem maot blong olgeta, be oli haedem talen we mi bin givim long olgeta, from se oli fraet long man. Sore tumas long olgeta ia, from kros blong mi i girap agensem olgeta.
3 Mo bambae i kam blong hapen se, sapos oli no fetful moa long mi, bambae mi karemaot long olgeta, wetem hemia tu we oli gat finis.
4 From we mi, Lod, mi rul long ol heven antap, mo long medel blong ol ami long wol; mo long dei ia we bae mi jusum ol flas samting blong mi, evri man bambae oli save se wanem ia we i soemaot paoa blong God.
5 Be, i tru, bae mi toktok long yufala long saed blong rod blong yufala blong go long graon we yufala i kam long hem. Bae yufala i mas mekem wan bot, o pem wan, olsem we yufala i luk se i gud, hemia i nomata long mi, mo mas tekem rod blong yufala kwiktaem i go long ples ia we oli singaotem Sent Lui.
6 Mo long ples ia, ol wokman blong mi, Sidni Rigdon, Josef Smit Junia, mo Oliva Kaodri, oli mas tekem rod blong olgeta i go long Sinsinati;
7 Mo long ples ia, oli mas leftemap voes blong olgeta mo oli mas talemaot toktok blong mi wetem ol voes we oli laod, mo i no gat kros o gat tu tingting long hem, mo oli mas leftemap ol tabu han blong olgeta. From we mi save mekem yufala i tabu, mo bambae mi fogivim ol sin blong yufala.
8 Mo ol narafalawan we oli stap, oli mas tekem rod blong olgeta aot long Sent Lui i go; oli mas go tutu, mo oli mas prijim toktok be oli no mas hariap, long medel blong ol kongregesen blong ol nogud man, kasem taem we oli gobak long ol kongrekesen we oli kamaot long hem.
9 Mo hemia bae i blong gud blong ol kongregesen blong jos; from tingting ia nao mi bin sendem olgeta from.
10 Mo wokman blong mi, Edwod Patrij i mas serem pat blong mane we mi bin givim long hem, i mas givim wan pat long ol elda blong mi we mi komandem olgeta blong gobak;
11 Mo hem we i save mekem, hem i mas pembak mane ia tru long ripresentativ; mo hem we i no save mekem, hem i no nidim blong pembak.
12 Mo naoia, mi toktok long ol narafalawan we oli stap we bambae oli kam long graon ia.
13 Luk, mi bin sendem olgeta blong prijim gospel blong mi long medel blong ol kongregesen blong ol nogud man; taswe, mi givim wan komanmen long wanwan long olgeta olsem ia nao: “Yu no mas westem taem blong yu, mo yu no mas berem talen blong yu blong man i no save long hem.”
14 Mo afta we yu kam long graon blong Saeon, mo yu bin prijim toktok blong mi, bambae yu mas gobak kwiktaem, mo talemaot toktok blong mi long medel blong ol kongregesen blong ol nogud man, be yu no mas hariap, yu no mas gat bigfala nogud kros, mo yu no mas mekem man i raorao.
15 Mo yu tekemaot das long leg blong yu agensem olgeta we bambae oli no akseptem yu, i no tetaem ia we oli stap, nogud bae yu mekem olgeta oli kros, be long sikret; mo wasemaot leg blong yu, olsem wan testemoni agensem olgeta long dei blong jajmen.
16 Luk, hemia i inaf long yufala, mo tingting blong hem we i bin sendem yufala.
17 Mo tru long maot blong wokman blong mi, Josef Smit Junia, bambae mi talemaot long saed blong Sidni Rigdon mo Oliva Kaodri. Long saed blong ol narafalawan we oli stap, bae i kam afta. I olsem. Amen.