1 Lo, im eo̧ron̄ ainikien E eo epād ippān aolep kajoor, Eo ej jān indeeo n̄an indeeo, em̧ool Alpa im Omega, jinoin im jem̧ļo̧kin.

2 Lo, em̧ool āindein Irooj ej ba n̄an kom̧, O kom̧ elder ro an kabun̄ eo Aō, ro rej kuk ippān doon ioon ijin, ro jero̧wiwi ko aer em̧ōj jeoriļo̧k, bwe N̄a, Irooj, ij jeorļo̧k jero̧wiwi ko, im Ij tūriam̧o n̄an ro rej kwaļo̧ki jero̧wiwi ko aer kōn bōro ko rettā;

3 Ak em̧ool Ij ba n̄an kom̧, bwe ej jab mennin aikuj n̄an aolepān jarin elder rein Aō n̄an em̧m̧akūt innitōt ioon dān ko, kiiō ke ro rej pād ioon tōrerein ijeņ im ijeņ rej jako ilo jab tōmak.

4 Mekarta, Iaar kōtļo̧k bwe ren maron̄ kam̧ool; lo, elōn̄ kauwōtata ko ioon dān ko, im elōn̄ eļaptata tokālik;

5 Bwe N̄a, Irooj, Iaar kean̄ ilo Aō illu elōn̄ ko̧kkure ko ioon dān ko; aaet, im eļaptata ioon dān kein.

6 Mekarta, aolep kanniōk ej ilo Peiū, im e eo ej tiljek ilubwiljimi ej jamin jako jān dān kein.

7 Kōn menin, emennin aikuj bwe rikarejera Sidney Gilbert im rikarejera William W. Phelps ren kaiur kōn ijjilōk ko im mijen eo aerro.

8 Mekarta, Iban kōtļo̧k bwe kom̧in jeplōkļo̧k m̧ae kar kauweik kom̧ kōn aolep jero̧wiwi ko ami, bwe kom̧in maron̄ juon wōt, bwe kom̧in jab maron̄ jako ilo nana;

9 Ak kiiō, em̧ool Ij ba n̄an kom̧, e mennin aikuj n̄an Eō bwe kom̧in jeplōkļo̧k. Kōn menin kōtļo̧k ro rikarejera Sidney Gilbert im William W. Phelps bwe ren bōk jar ko rekar bōk er m̧oktaļo̧k, im kōtļo̧k bwe ren bōk ito-itak eo aer ilo kaiur bwe ren maron̄ kadedeļo̧k mijen eo aer, im kōn tōmak renaaj anjo̧ ioon;

10 Im toun wōt aer tiljek renaaj pād ilo jokane, im N̄a, Irooj, Inaaj pād ippāer.

11 Im kōtļo̧k bwe in elder ro bwe ren bōk men ko me reaikuji n̄an balle.

12 Kōtļo̧k rikarejera Sidney Gilbert bwe en bōk men ko ej jab aikuji ippān, āinwōt ami naaj errā.

13 Im kiiō, lo, n̄an em̧m̧an eo ami Iaar lewōj n̄an kom̧ juon kien kōn men kein; im N̄a, Irooj, Inaaj pepe ippemi āinwōt ippān armej ro ilo raan ko etto.

14 Lo, N̄a, Irooj, ilo jinoin Iaar kōjeraam̧m̧an dān ko; ak ilo raan kein āliktata, jān lo̧n̄iin rikarejera Jon, Iaar kaliaik dān ko.

15 Kōn menin, raan ko renaaj itok n̄e ejjeļo̧k kanniōk enaaj jokane ioon dān ko.

16 Im e naaj kōnono kake ilo raan ko rej itok bwe ejjeļo̧k ej maron̄ wanlōn̄ļo̧k n̄an āneen Zaion ioon dān ko, ak eo wōt ejim̧we ilo būruōn.

17 Im, āinwōt N̄a, Irooj, ilo jinoin Iaar kaliaik āneo, em̧ool āindein ilo raan ko āliktata Iaar kōjeraam̧m̧an e, ilo iien ko an, n̄an an ro rekwōjarjar Aō kōjerbale, bwe ren maron̄ m̧ōn̄ā m̧ōttan matōk ko ijo.

18 Im kiiō Ij lewōj n̄an kom̧ juon kien bwe ta eo Ij ba n̄an juon Ij ba n̄an aolep, bwe kom̧in maron̄ kakkōl im̧aanļo̧k ro jeiūm̧i im jātimi kōn dān kein, bwe ren maron̄ jab ito-itak ioer, n̄e tōmak eo aer eab m̧ōjņo̧ im rej po ilo aujiid ko;

19 N̄a, Irooj, Iaar kean̄, im riko̧kkure ej uwe ioon mejān dān ko ijo, im Ij jab kabbōjrake kean̄ eo.

20 N̄a, Irooj, Iaar illu ippemi inne, ak rainin Aō illu ej oktakļo̧k.

21 Kōn menin, kōtļo̧k bwe ro kōn ro Iaar kōnono, ro reaikuj bōk ito-itak eo aer ilo kaiur—bar juon alen Ij ba n̄an kom̧, kōtļo̧k bwe ren bōk ito-itak eo aer ilo kaiur.

22 Im ej jab aorōk n̄an Eō, ālikin jidik iien, eļan̄n̄e āindein bwe ren kadedeļo̧k mijen eo aer, eļan̄n̄e rej etal ioon dān ak ioon bwidej; āinwōt kwaļo̧k e n̄an er ekkar n̄an ekajet ko aer tokālik.

23 Im kiiō, kōn ro rikarejera, Sidney Rigdon, Josep Smith, Jun., im Oliver Cowdery, kōtļo̧k bwe ren jab bar itok ioon dān ko, ijello̧kun wōt ioon canal eo, n̄e rej etal n̄an m̧ōko im̧weer; ak ilo bar jet naan ren jab itok ioon dān ko ilo aer ito-itak, ijello̧kun wōt ioon canal eo.

24 Lo, N̄a, Irooj, Iaar jitōn̄ juon iaļ n̄an ito-itak an ro rekwōjarjar Aō; im lo, en̄in ej iaļ eo—bwe ālikin aer likūt canal eo renaaj ito-itak ioon bwidej, toun wōt jiron̄ er bwe ren ito-itak im wanlōn̄ļo̧k n̄an āneen Zaion;

25 Im renaaj kōm̧m̧an āinwōt ro nejin Israel, kajutak im̧ōn kōppād ko aer tok ilo iaļ eo.

26 Im, lo, kien in kom̧ naaj leļo̧k n̄an aolep ro jeiūm̧i im jātimi.

27 Mekarta, n̄an eo leļo̧k e kajoor n̄an leļo̧k naan in jiron̄ n̄an dān ko, n̄an e ej leļo̧k jān Jetōb n̄an jeļā aolep iaļ ko An;

28 Kōn menin, kōtļo̧k bwe e en kōm̧m̧an āinwōt Jetōb eo an Anij emour ej jiron̄ e, men̄e ioon āne ak ioon dān ko, āinwōt an pād wōt Ippa n̄an kōm̧m̧an tokālik.

29 Im n̄an kom̧ em̧ōj lewōj kooj eo n̄an ro rekwōjarjar, ak iaļ eo n̄an ro rekwōjarjar in kamp eo an Irooj, n̄an ito-itak.

30 Bar juon alen, em̧ool Ij ba n̄an kom̧, ro rikarejera, Sidney Rigdon, Josep Smith, Jun., im Oliver Cowdery, ren jab kōpeļļo̧k lo̧n̄ier ilo jarlepju in rijar ko an ro renana m̧ae aer tōprakļo̧k ilo Cincinnati;

31 Im ilo jikin en renaaj kotak ainikier n̄an Anij ņae armej raņ, aaet, n̄an E eo illu eo an ej urur ņae jero̧wiwi eo aer, juon armej eo rekanooj utiej ilo kalo n̄an ko̧kkure.

32 Im jān jikin en ren ito-itak n̄an jarlepju in rijar ko an ro jeir im jatier, bwe jerbal ko aer kiiō rekōņaan eļapļo̧k ilubwiljier jān ilubwiljin jarlepju in rijar ko an ro renana.

33 Im kiiō, kōn bwe eo, kōtļo̧k bwe ren ito-itak im kwaļo̧k naan eo ilubwiljin jarlepju in rijar ko an ro renana, toun wōt leļo̧k e n̄an er;

34 Im jon̄an wōt aer kōm̧m̧ane men in renaaj jojān men ko ballier, im rej jamin libbijinjin Im̧aō.

35 Im kōtļo̧k bwe ren ito-itak ippān doon, ak ruo ian ruo ian, āinwōt an em̧m̧an n̄an er, kōtļo̧k wōt rikarejera Reynolds Cahoon, im rikarejera Samuel H. Smith, ro kake er ekanooj bun̄ Buruō, ren jab jepel m̧ae aerro ro̧o̧l n̄an m̧ōko im̧weero, im men in ej kōn juon un emālōtlōt ilo N̄a.

36 Im kiiō, em̧ool Ij ba n̄an kom̧, im men eo Ij ba n̄an juon Ij ba n̄an aolep, kom̧in m̧ōņōņō, ajri reddik; bwe N̄aij pād ilubwiljimi, im Iaar jab eļļo̧k jān kom̧;

37 Im toun wōt ami kar kōttāik kom̧ Im̧aō, kōjeraam̧m̧an ko an aelōn̄ eo rej ami.

38 Kan̄ōrn̄ōr ipūmi im kom̧in ekkōl im en alikkar ami ļōmņak reim̧aanļo̧k n̄an itok eo an Nejin Armej, bwe ej itok ilo awa eo kom̧ij jab ļōmņak kake.

39 Jar iien otemjej bwe kom̧in jab deļo̧n̄ ilo kapo, bwe kom̧in maron̄ jelm̧ae mour raan in itok eo An, men̄e ilo mour ak ilo mej. Em̧ool āindein. Amen.