Seksen 69
Revelesen we Lod i givim tru long Profet Josef Smit, long Haeram, Ohaeo, long namba 11 Novemba 1831. Wok blong putum tugeta ol revelesen blong oli pablisim kwik, oli bin pasem long wan spesel konfrens long namba 1 kasem namba 2 Novemba. Long namba 3 Novemba, revelesen we i stap long buk ia olsem seksen 133, we afta oli singaotem Wan Las Toktok, oli bin ademap. Oli bin jusum Oliva Kaodri bifo finis blong tekem buk ia blong ol revelesen mo komanmen we oli raetem long han mo putum tugeta i go long Indipendens, Misuri, blong oli printim. Mo tu, hem i mas tekem wetem hem ol mane we oli bin givim blong bildimap Jos long Misuri. Revelesen ia i givim instraksen long Jon Witma blong go wetem Oliva Kaodri, mo tu, i givim daereksen long Witma blong go long ol ples mo tekem ol histri infomesen long saed blong koling blong hem olsem man blong raetem Histri blong Jos mo olsem man blong raetemdaon ol rekod.
1–2, Jon Witma i mas go wetem Oliva Kaodri long Misuri; 3–8, Hem i mas prij tu, mo tekem, mo raetemdaon ol infomesen blong histri.
1 Lisin gud long mi, Lod, God blong yufala i talem, blong gud blong wokman blong mi, Oliva Kaodri. Mi talem se hem i no waes se bae oli givim hem ol komanmen mo ol mane we bae hem i mas tekem i go long graon blong Saeon, sapos nomo wan i go wetem hem, we bae i tru mo fetful.
2 Taswe, mi, Lod, mi wantem se wokman blong mi, Jon Witma, i mas go wetem wokman blong mi, Oliva Kaodri;
3 Mo tu, se bae hem i mas gohed blong raetem mo mekem wan histri blong evri impoten samting we bambae hem i luk mo save long saed blong jos blong mi;
4 Mo tu, blong hem i kasem advaes mo help we i kam long wokman blong mi, Oliva Kaodri mo ol narawan.
5 Mo tu, ol wokman blong mi we oli stap long ol narafala ples long wol, oli mas sendem ol ripot blong wok blong olgeta i go long graon blong Saeon;
6 From graon blong Saeon bae i wan stamba ples mo wan ples blong kasem mo mekem evri samting ia.
7 Be wokman blong mi, Jon Witma, i mas go plante taem, long wan ples i go long narafala ples, mo long wan jos i go long wan narafala jos, blong hem i save kasem save moa isi—
8 I stap prij mo stap eksplenem, i stap raetem, i stap kopi, i stap jusum, mo i stap kasem evri samting we bae i blong gud blong jos, mo blong ol yangfala jeneresen we oli stap kam antap we bae oli groap long graon blong Saeon, blong oli holemtaet, long wan jeneresen i go long wan narafala jeneresen, blong oltaem mo oltaem. Amen.