Wóltaʼii 72
Diyin Yá Yáłtiʼí Joseph Smith díí diyingo bił ííshją́ą́ ályaa, Kirtland, Ohiodi, Níłchʼitsoh 4, 1831 yihahgo. Díkwííshį́į́ elders dóó sodizin daʼatahígíí áłah silį́į́ʼ áko binaanish yídahodoołʼááł dóó Sodizinjí naʼnitinígíí hózhǫ́ biʼoodląʼ dabidziilgo ádeidoolííł. Díí kweʼé bikááʼígíí éí tʼááłʼáʼí jínítínígo tááʼ diyingo ííshją́ą́ ádaalyaaígíí ahiih yiʼnilgo ályaa. 1 dóó ńléí 8jįʼ saad dashijaaʼígíí éí Newel K. Whitney bishop bee bikʼihodiiniiʼgo yaa halneʼ. Ako bikʼihodiiniiʼ dóó yiilzį́į́ʼ, éí bikééʼdóó 9 dóó ńléí 23jįʼ saad dashijaaʼígíí eiyílyá, éí éí bishop binaanishígíí łahdóó bénááhoosdzin. Áádóó bikʼijįʼ, 24 dóó ńléí 26jįʼ saad dashijaaʼ baa náánályá, éí Ziondi ahíʼiidooldahgo naʼdinóotį́į́ł bídéítʼiʼígíí bééhoozin.
1–8, Elders ákáʼanáʼálwogo naanish éí bishop yee yił nídahodoolnih; 9–15, Bishop éí naalyéhí bá hooghan yikʼidéézʼį́į́ʼ áádóó baa dahajoobaʼígíí dóó bichʼįʼ anídahastʼiʼígíí yaa áhályą́; 16–26, Bishop danilíinii éí elder danilíinii tʼáá aaníí dahodísin daaníigo naaltsoos yá hadeidileʼ doo.
1 Daʼíísínółtsʼą́ą́ʼ, áádóó Bóhólníihii nihiDiyin God bizhí deisínółtsʼą́ą́ʼ, O tʼáá ánółtso áłah soolį́ʼígíí, éí shisodizin bihigh priest danohłį́, éí diyin bił hazʼánígíí dóó adziilii baa dahasyą́.
2 Háálá tʼáá aaníigo Diyin Bóhólníihii kónihiłní, łaʼ bishop bikʼihodidoonihgo nihá nisin, éí doodago nihitahdóóʼígíí łaʼ doo, Diyin Bóhólníihii kweʼé Bidáʼákʼeh sodizin daʼatahígíí bá.
3 Áádóó tʼáá aaníigo díí hazhóʼí baa ntsídasookéezgo ádaołaa, háálá díí éí Diyin Bóhólníihii yee nihoníʼą́, tʼáá ałtso aa ádahályáanii, naanish bee bikʼidahodiiniiʼyę́ę yaa nídahodoolnih, tʼáá áłah kʼad hoolzhishgi dóó ahoyoolʼáágóó.
4 Háálá tʼáá haishį́į́ díí nihokááʼ bikááʼ baʼahódlí dóó hóyánígíí éí hodísingo baa ákohoniidzį́į́ʼ áko éí shiZhéʼé bighan ílíinii góneʼ bá hashtʼeilyaaígíí baa dahididootʼááł.
5 Tʼáá aaníigo nihichʼįʼ haasdziih, sodizindóó elders danilínígíí kweʼé shidáʼákʼeh daʼatahígíí éí ákáʼanídaajahę́ę éí bindaanish bishop yee yił dahodoolnih, éí shí díí kweʼé shidáʼákʼehdóó bikʼidideeshnih.
6 Díí éí baa náʼiidoodzoh, áko Ziondi bishop bílákʼeh dootʼááł.
7 Áádóó bishop binaanishígíí éí bee hazʼáanii aa dahasyáhígíí biyiʼdóó béédahodoozįįł, áádóó ntsaago áłah náʼádleehdi bee níʼdidoojah.
8 Áádóó áko, tʼáá aaníigo nihichʼįʼ haasdziih, shá naalʼaʼí Newel K. Whitney éí hastiin nídidooltééł dóó díí adziilii bąąh ndoolyéełgo bee bidiʼdoolzį́į́ł. Díí Bóhólníihii nihiDiyin God, nihá Nináʼnídláii kótʼéego yinízin. Tʼáá ákótʼée doo. Amen.
9 Diyin Bóhólníihii bizaad, éí bee hazʼáanii niilyáhígíí bił ahidiiʼnil, éí kweʼé dáʼákʼehgi bishop sodizinjí biʼdoolzį́į́ʼgo binaanish íídoolíłígíí bééhoozin, éí díí tʼáá aaníí átʼé—
10 Diyin Bóhólníihii binaalyéhí bá hooghan yikʼideezʼį́į́ʼ; ákweʼé dáʼákʼehgi sodizin bibéeso yá neiyiilááh doo;
11 Áłtséédą́ą́ʼ kóniʼdooniidyę́ę bikʼehgo elders naanish bee bikʼidahodiiniiʼígíí baa náhodíílnih; áádóó deinízinígíí bee bíkáʼadíílwoł, áádóó baa dahidoolyéłígíí yikʼé ndaʼdoolééł, béeso bee dahólónígíí bikʼehgo;
12 Áádóó ałdóʼ díí dílzingo nidoolyééłgo sodizin bá yáʼátʼééh doo, baa dahajoobáʼígíí dóó bichʼįʼ anídahaztʼiʼígíí bá dooleeł.
13 Áádóó háííshį́į́ niʼdooleełgo doo yiighahígíí, éí naaltsoos bá hadidoolnííł áádóó Zion bibishop nilínígíí yee dooltsos, áádóó Diyin Bóhólníihii bílákʼee yínilígíí éí bee ąąh hááʼáhígíí niidoolééł.
14 Áádóó badaʼódlį́įgo iiʼ sizį́kʼehjí naanish ádeiyiilaaígíí, éí naʼnitin bee yisdáʼiildéehii yaa deezlá dóó Diyin bił hazʼą́ą́dóóígíí sodizin yichʼįʼ kódeidoolííł, áádóó nihokááʼ dineʼé ałdóʼ yichʼįʼ, éí bąąh hááʼáhígíí Ziondi bishop nilínígíí yichʼįʼ nideidoolééł;
15 Áko éí sodizindééʼgo bikʼé naʼalyééh, háálá éí bee hazʼáanii bikʼehgo diné tʼáá ałtso Zionjįʼ nahikááhígíí tʼáá ałtsoní bee dahólónígíí bishop yaa deidoonił.
16 Áádóó áko, tʼáá aaníigo nihichʼįʼ haasdziih, áko elder łaʼí nízínígo díí dáʼákʼehgi níyahígíí bishop díí dáʼákʼehgi akʼídéézʼį́ígíí áká ánídaalwoʼgo nidaalnishígíí haitʼáo yigáłígíí yaa ndahodoolnih—
17 Ánahwiiʼaahii éí doodago bishop nilį́įgo díí dáʼákʼehdóó naaltsoos eidoołtsos, éí Ziondi bishop yeidoołtsos, éí diné tʼáá łáʼí níznínígo bá bíhoolyaa doo, dóó tʼáá ałtsóní yaa halneʼ, baa dahididootʼáłígíí bá, dóó hóyą́ągo ákáʼanálwoʼí nilį́įgo bééhoʼdílzin dóó baʼídlíigo naalnishí nilį́į doo;
18 Díí doo ákótʼéego éí Ziondi bishop doo bá ahóótʼiʼ da bidiʼdidooniił.
19 Áádóó áko, tʼáá aaníigo nihichʼįʼ haasdziih, tʼááłáʼí nízínígo elder binaanish díí kweʼé dáʼákʼehgi sodizin bibishop yił deiyídóołtah bíniʼdii sodizin dóó sodadizin, ádaaníigo yindaashnishígíí, ndaalnishígíí bí dóó yindaashnishígíí yaa hodoolnihígíí tʼáá ałtsojįʼ bee bá lą́ adooleeł.
20 Áádóó ałdóʼ, bíniʼdii shá ndaalʼaʼí shisodizinjí ndaʼdoozoh bídadéétʼiʼígíí yinaalnishgo bee bikʼidahodiiniiʼígíí tʼáá ałtsojįʼ bishop éí doodago bishop danilínígíí bíká adadoojah—
21 Áko diyingo ííshją́ą́ ádaalyaaígíí naaltsoos bee nidootʼááł, áádóó nahasdzáán bikááʼ tʼáá ałtsogóó ndaakai doo; áko ałdóʼ béeso shódeidoołtʼééł éí tʼáá ałtsojįʼ sodizin biyi chodeidoołʼįįł;
22 Áko ałdóʼ tʼáá ałtsojįʼ bá ahóótʼiʼ doo, dóó hazhóʼí ákáʼanídaajahgo ndaalnishí danilį́įgo bééhodoozįįł.
23 Áádóó áko, shooh, díí bikʼehgo tʼáá ałtso shisodizin bibranchjí ádaʼałʼį́į doo, tʼáá ałtso kéyah bikáá hadadilyaagóó. Áádóó áko kʼad bee haasdzíʼígíí ałtso ííshłaa. Amen.
24 Diyin bił hazʼą́ bibee hazʼą́ą́jí áłtsʼíísígo saad łaʼ bíídoodzoh, éí sodizinjí daʼatahígíí bídaadéétʼiʼ—éí Iiʼ Sizį́ Diyinii Ziongóó doonééł bikʼidadiilniiʼ, áádóó nááná łaʼ éí tʼáá ákónéehee Ziongóó dadookah—
25 Bíniʼdii bishop binaaltsoos tááʼgo elders sodizindééʼígíí deidoołtsos, éí doodago naaltsoos bishop bitsʼą́ą́dééʼígíí;
26 Doo ákódzaagóó éí háíshį́į́ kéyah Ziongóó doonéłígíí éí ákaʼadoolwołgo ndoolnishjí doo bá ahóótʼiʼ da doo. Díí ałdóʼ bikʼehgooígíí átʼé. Amen.