Seksen 73
Revelesen we Lod i givim long Profet Josef Smit mo Sidni Rigdon, long Haeram, Ohaeo, long 10 Jenuware 1832. Stat long eli pat blong manis Disemba we i pas, Profet mo Sidni, tufala i bin stap mekem wok blong prij, mo tru long wok ia, tufala i bin mekem plante wok blong daonem ol nogud filing we i girap agensem Jos (luk long heding blong seksen 71).
1–2, Ol elda oli mas gohed blong prij; 3–6, Josef Smit mo Sidni Rigdon, tufala i mas gohed blong transletem Baebol kasem taem hem i finis.
1 From i tru, olsem ia nao Lod i talem, long mi, hem i nid blong oli mas gohed blong prijim gospel, mo wetem fasin blong askem strong long ol jos long ol eria raonabaot, kasem taem blong konfrens;
2 Mo afta, luk, bambae mi talemaot long olgeta, tru long voes blong konfrens, ol defren misin we oli gat.
3 Nao, i tru, mi talem long yutufala ol wokman blong mi, Josef Smit Junia, mo Sidni Rigdon, Lod i talem, hem i nid blong yutufala i mekem translesen bakegen;
4 Mo, folem hamas hem i posibol blong mekem, blong prij long ol eria raonabaot kasem konfrens; mo afta, hem i nid blong gohed long wok blong translesen kasem taem hem i finis.
5 Mo hemia bae i mas wan rod blong folem, long ol elda, kasem taem we bae moa save i kam, olsem we oli bin raetem.
6 Nao, mi no givim moa long yufala long taem ia. Fasem strap raon long wes blong yufala mo no pleiplei. I olsem. Amen.