Wóltaʼii 8
Diyin Yá Yáłtiʼí Joseph Smith díí diyingo bił ííshją́ą́ ályaa éí Oliver Cowdery yee yił hodoolnih biniyé, Harmony, Pennsylvaniadi, Tʼą́ą́chil 1829 yihahgo. Naaltsoos Mormon Wolyéhígíí nááná łahjįʼ saad bee álnééhgo, Oliver, éí haneʼ neiyiizóóhgo, éí Diyin Yá Yáłtiʼí bichʼįʼ yáłtiʼgo neiyiizóóh, éí ataʼ haneʼ shąąh ndoolyééł nízin. Áko Diyin Bóhólníihii neiyooskanígíí biniinaa díí diyingo bił ííshją́ą́ ályaa.
1–5, Iiʼ Sizį́ Diyinii bibeʼadziil binahjįʼ diyingo ił ííshją́ą́ ályaaígíí nihwiileeh; 6–12, Oodląʼ binahjįʼ Diyin God binaʼnitin tʼahdoo béédahoozįįhígíí ąąʼ ádadoolnííł dóó ałkʼidą́ą́ʼ haneʼ ndaháasdzohyę́ę adziilii bee ataʼ haneʼ álʼį́.
1 Oliver Cowdery, tʼááʼaaníí, tʼááʼaaníigo, Shí ándishní, tʼáá aaníí Diyin Bóhólníihii hiináago, éí niDiyin God dóó náNinánídleii nilį́, éígi átʼáo tʼáá aaníí tʼáá haʼátʼííshį́į́ neʼoodląʼ bee yíníkeedgo nínízínígíí nił bééhodoozįįł, nijéí tʼáá aaníí bee ádíníigo, haneʼ tʼáá ałkʼidą́ą́ haneʼ ndahaasdzóyę́ę baa ééhózinígíí nichʼįʼ kódoolnííł yínídlą́ągo, éí ałkʼidą́ą́ haneʼyę́ę ádaatʼé, éí shizaad łahdóó biiʼndaháasdzohyę́ę shiʼIiʼ Sizį́ Diyinii binahjįʼ haʼoodzííʼgo biyiʼ silá.
2 Aooʼ, áko shooh, níniʼ biyiʼdi dóó nijéí biyiʼdi shí bee nił hodeeshni, Iiʼ Sizį́ Diyinii binahjįʼ, éí nikʼihódooleeł dóó éí nijéí biyiʼ hólǫ́ǫ doo.
3 Kʼad, áko shooh, díí diyingo ił ííshją́ą́ ályaaígíí átʼé; áko shooh, díí diyingoígíí éí bee Moses Israel baʼáłchíní Tónteel Łichííʼdę́ę́ʼ niʼhóóltseijįʼ chʼííníʼeezh.
4 Éí bąą díí aʼiilyéii neiyílyá; baʼiinílíigo choiníłʼį́, dóó nikʼihojisdliʼ, háálá neʼanaʼí bilákʼeedóó yisdánidoolóós, áko, doo ákótʼéego éí, danidiyoołhééł dóó niʼiisizíinii deidoołchxǫǫł.
5 O, díí saad béénílniih, dóó shibee hazʼáanii bikʼeh honíłʼį́. Díí niʼaʼiilyéii átʼé, tʼáá béénílniih.
6 Áko díí doo tʼáá átʼé niʼaʼiilyéii átʼée da; háálá łaʼ aʼiilyéii naah nináánályá, éí Aaron bi aʼiilyéii átʼé; áko shooh, éí ląʼígo nił chʼííníʼą́.
7 Áko shooh, doo nááná łaʼ adziil díígiʼ átʼée da, tʼáá hazhóʼí Diyin God bibeʼadziilii tʼéiyá, éí díí Aaron bi aʼiilyéii neidoolééł.
8 Éí bąą, tʼáadoo nił naaki nilíní, háálá díí éí Diyin God bitsʼą́ą́dóó aʼiilyéii átʼé; dóó díí nílaʼ bee dahyílééł doo, áko diyingo naʼanish ayóóʼátʼéii bee áníłʼį́į doo; dóó ádin doo nááná łaʼ adziilii nilákʼee doo nighaidoodlééł da, háálá díí éí Diyin God binaanish átʼé.
9 Áádóó, éí bąą, éí binahjįʼ tʼáá haʼátʼííshį́į́ shííníkeedígíí, éí naadeeshłééł, dóó éí baa nił ééhózin dooleeł.
10 Béénílniih oodląʼ nee ádingo doo haʼátʼíhída ádíílííł da; éí bąą neʼoodląʼ bee ádíínkeed. Díí tʼáadoo aʼohgo baa ntsíníkeesí; doo nídéítiʼígíí tʼáadoo yíníkeedí.
11 Diyin God binaʼnitin tʼahdoo béédahoozįįhígíí shichʼįʼ ąąʼ ádadoolnííł diníigo yíníkeed, áádóó áko bá atah hodíílnihígíí dóó tʼáá ałtso ałkʼidą́ą́ haneʼ ndaháasdzohgo nídadeesʼį́į́yę́ę bitsʼą́ą́dóó nił ééhodoozįįł, éí dadílzin; dóó neʼoodląʼ binahjįʼ ákódoonííł.
12 Áko shooh, Shí díí bee haasdzííʼ; dóó hodeiyáádą́ą́ nihichʼįʼ haasdzííyę́ę éí tʼáá shí áshtʼį́.