Mwakoro 90
Kaotioti nakon Iotebwa Timiti te Burabeti, ae kaotaki i Kirtland, Ohio, ni Maati 8, 1833. Te kaotioti aei bon taian rikirake riki ni kaineti ma katean te Moan Beretitentii (taraa te kabwarabwaraan mwakoro 81); ibukin anne, taan ibuobuoki ake a atongaki a katabuaki ni Maati 18, 1833.
1–5, E anganaki Iotebwa Timiti kiingin te abanuea ao rinanona nakon te Ekaretia; 6–7, Sidney Rigdon ao Frederick G. Williams a riai ni beku n te Moan Beretitentii; 8–11, E riai n tataekinaki te euangkerio nakon aban Iteraera, nakoia Tientaire, ao nakoia Iutaia, aomata nako a na ongo n oin neweia; 12–18, Iotebwa Timiti ao ana taan ibuobuoki a riai ni bairea raoi ana waki te Ekaretia; 19–37, A mwaiti aomata aika a reireiaki iroun te Uea bwa a na nakonako i nanon te raoiroi ao ni beku n abanueana.
1 E taku te Uea, e koaua, e koaua I tuangko natiu te mwaane, a kabwaraaki am bure, ni kaineti nakon am bubuti, bwa am tataro ao aia tataro tarim a tia n roko nakon taningau.
2 Ngaia are, ko na kakabwaiaki man te tai aio ane e taua kiingin te abanuea are ko anganaki; are te abanuea are e na kateaki ibukin te kabanea n tai.
3 E koaua ae I tuangko, kiingin te abanuea aei a na aki manga anaaki mai iroum, ngkai ko mena n te aonaba, ke n te aonaba ae e na roko;
4 E ngae n anne, rinanom e na anganaki temanna taian kaotioti, eng, nakon te ekaretia naba.
5 Ao ni kabane naake a karekea ana kaotioti te Atua, a riai n tarataraia bwa a na kanga n tauii bwa mwina a taraaki bwa bwaai aika akea maneia, ao a na uotaki nakon te kabuakakaaki iai, ao n tatanako ao ni bwaka ngkana a roko angibuaka, ao e uki te ang, ao e bwaka te karau, ao a orea aon aia auti.
6 Ao e koaua ae I manga taekinna nakoia tarim, Sidney Rigdon ao Frederick G. Williams, a kabwaraaki aia bure naba, ao a atongaki bwa titebo ma ngkoe n tauakin kiingin te kabanea n abanuea aei;
7 N aron naba rinanon am tararua ni kiingin aia tabo n reirei burabeti, are I a tia n tua bwa e na kateaki;
8 Bwa a aonga ni kakororaoaki mai iai n aia mwakuri ni ibuobuoki ibukin kamaiuakin Tion, ao aban Iteraera, ao Tientaire, ao ni kabane ake a kakoaua;
9 Bwa rinanon am tararua a aonga ni karekea te taeka, ao rinanon aia tararua e na waaki te taeka nako tabotabon te aonaba, nakoia Tientaire moa, ao i mwina, nooria, ao taraia, a na nakoia Iutaia.
10 Ao ngkanne e na roko te bong are bain te Uea e na kaotaki mwaakana ni kaira nanoia aaba, ao aaba ni beekan, ana bata Iotebwa, n te euangkerio ibukin kamaiuaia.
11 Bwa e na koro bukina n te bong anne, bwa aomata nako a na ongo bwaninin te euangkerio n oin neweia, ao n oin aia taetae, rinanoia naake a katabuaki nakon te mwaaka aei, man ana tararua te Tia Karaunano, are e kanakoaki nako aoia ibukin kaotiotan Iesu Kristo.
12 Ao ngkai, e koaua ae I tuangkami, I anganingkami te tua bwa kam na reitinako n te mwakuri ni ibuobuoki ao n te beretitentii.
13 Ao ngkana ko a bane n rairii aia koroboki burabeti, man te tai anne ko na tararuai ana waaki te ekaretia ao te reirei;
14 Ao man te tai teuana nakon teuana, n aron ae e na kaotaki iroun te Tia Karaunano, ni karekei kaotioti ni kaotii bwain te abanuea aika raba;
15 Ao ni bairea raoi mwangan nako te ekaretia, ao ni kamatebwai ao n reiakinna, ao n reirei ma booki ni kabane aika raoiroi, ao ma taian taetae, neewe, ao aomata.
16 Ao aio e na riki bwa oin tabemi ao ami mition ni maiumi ni kabane, n tararua n te bowi, ao ni bairei raoi ana waki nako te ekaretia aei ao te abanuea.
17 Tai maama, ke ni kamangaoaki; ma kam na kataetaeaki n ami kainikatonga ao te kamoamoa ni kabane, bwa e uota te bwai ni kamwane nako aon tamneimi.
18 Bairei raoi ami auti; kararoa te taningaroti ao te aki itiaki mai iroumi.
19 Ngkai, e koaua ae I tuangko, e riai n iai te tabo ae katauraoaki, n te tai ae e waekoa ngkana e kona, ibukia aia utu am tia ibuobuoki ao tia koroboki, ae Frederick G. Williams.
20 Ao e riai au tia mwakuri ae e a kara, Iotebwa Timiti te Ikawai n reitinako ma ana utu n te tabo are e maeka iai ngkai; ao e riai n aki kaboonakoa ni karokoa e na taekinna wiin te Uea.
21 Ao e riai au tia ibuobuoki, ae Sidney Rigdon, n tiku n te tabo are e maeka iai ngkai ni karokoa e na taekinna wiin te Uea.
22 Ao e riai te bitiobi n ukeuke ma te nanomwaaka ni karekea te tia tei, ao e riai bwa te aomata ae iai kaubwaina ae e kawakini—ana aomata te Atua, ao ni matoatoa ana onimaki—
23 Bwa man aio e aonga ni kona ni kabwarai tarau nako; bwa ana umwa ni kaikobwai te Uea e aonga n aki buakaka taekana imataia aomata.
24 Ukeuke ma te nanomwaka, tataro n taai nako, ao kakoauaa, ao bwaai ni kabane a na kaai ni mwakuri ibukin ae raoiroi ibukimi, ngkana kam nakonako i nanon te raoiroi ao n uringa te berita ae tabu are kam a tia ni berita iai imarenami.
25 A riai ami utu ni uarereke, moarariki au tia mwakuri ae e a kara ae Iotebwa Timiti te Ikawai, ni kaineti nakoia naake tiaki kaain ami utu;
26 Bwa bwaai ake a katauraoaki ibukimi, ni kakoroa bukin au mwakuri, e na aki anaaki mai iroumi ao n anganaki naake a aki tau—
27 Ao n aio ko na totokoaki ni kakoroi bukin bwaai akekei ake I a tia n tuangko.
28 Ao e koaua ae I manga tuangkami, bon au kantaninga bwa au tia mwakuri te aine ae Vienna Jaques e na karekea te mwane ni kabwaka boon ana kabane mwane, ao n nako nakon aban Tion;
29 Ao nikiran te mwane e kona ni katabuaki nakoiu, ao e na karekea kanuangana ni bon oin au tai.
30 E koaua ae I tuangkami, bwa e riai n oin au taratara bwa e na nako nakon aban Tion, ao ni karekea abana ni bwaibwai man bain te bitiobi;
31 Bwa e aonga ni maeka ma te rau ngkana e teimatoa ni kakaonimaki, ao n aki taningaroti n ana bong nako man te tai aei.
32 Ao nooria, e koaua ae I tuangkami, bwa kam na korea te tua aei, ao n taekinna nakoia tarimi i Tion, ni kamauria ma te tangira, bwa I a tia ni weteingkami naba bwa kam na tararua i aon Tion n oin au tai.
33 Ngaia are, a riai n toki ni katabeaiangaai ni kaineti ma aio.
34 Nooria, I tuangkami bwa tarimii i Tion a moana aia rairannano, ao a kimwareirei anera ibukiia.
35 E ngae n anne, I aki kukurei ma bwaai aika mwaiti; ao I aki kukurei iroun au tia mwakuri ae William E. McLellin, ao au tia mwakuri ae Sidney Gilbert; ao te bitiobi naba, ao tabeman bwa e mwaiti bwaai aika a na riai n raira nanoia mai iai.
36 Ma e koaua ae I tuangkami, bwa Ngai, te Uea, N na kauntaeka ma Tion, ao ni bubutia naake kaaina aika a matoatoa, ao ni katuaea ni karokoa e tokanikai ao n itiaki imatau.
37 Bwa e na aki kamwaingaki man ana tabo. Ngai, te Uea, I a tia n taekinna. Amen.