Wóltaʼii 91
Diyin Yá Yáłtiʼí Joseph Smith binahjįʼ díí diyingo bił ííshją́ą́ ályaa, Kirtland, Ohiodi, Wóózhchʼį́į́d 9, 1833 yihahgo. Ákweʼé hoolzhishgo Diyin Yá Yáłtiʼí Old Testament yá ataʼ halneʼgo néíyizóóh. Ałkʼidą́ą́ʼ nidaʼasdzohyę́ę Apocrypha wolyéii baa hoolzhiizhgo, Diyin Bóhólníihii neiyídéíłkidgo díí bił ííshją́ą́ ályaa.
1–3, Apocrypha éí kʼasdą́ą́ʼ tʼáá átʼé tʼáá ánínéegi átʼáo bá ataʼ dahóóneʼ ákondi diné ląʼí da saad doo tʼáá aanínígíí yiih deiyíízoh; 4–6, Diné Iiʼ Sizį́ Diyinii bił chʼídiníłdláadgo tʼéiyá díí naʼasdzohígíí bíkáʼadoolwoł.
1 Tʼáá aaníigo, Diyin Bóhólníihii Apocrypha bídéítiʼígíí yaa halneʼgo kóní—Áko ląʼí da tʼáá aaníinii biyiʼ silá, áádóó kʼasdą́ą́ʼ tʼáá átʼé nizhónígo nááná łaʼ saadkʼehjígo ályaa;
2 Áko ląʼí da doo tʼáá daʼaaníinii biyiʼ silá, éí diné ląʼí da saad doo tʼáá daʼanínígíí yiih deizoh.
3 Tʼáá aaníigo, Shí nihichʼįʼ haasdziih, Apocrypha nááná łaʼ saadkʼehjí ádoolníiłgo doo tʼáá íiyisíí nidzin da.
4 Éí bąą, tʼáá háíida díí yiyííłtaʼígíí, bíniʼdii yikʼidiʼdootį́į́ł, háálá Iiʼ Sizį́ Diyinii éí tʼáá aaníinii ííshją́ą́ ííłʼį́;
5 Áádóó tʼáá háiida Iiʼ Sizį́ Diyinii bił chʼídiʼníłdládígíí éí naʼasdzohyę́ę bitsʼą́ą́dóó bíkáʼadoowoł;
6 Áádóó tʼáá háiida Iiʼ Sizį́ Diyinii binahjįʼ doo baʼnídéélgóó, éí doo bíkáʼadoowoł da. Éí bąą nááná łaʼ saadkʼehjí álnéehgo doo tʼáá íiyisíí nidzin da. Amen.