1 Mo bakegen, i tru mi talem long yufala, ol fren blong mi, mi givim wan komanmen long yufala, se bambae yufala i statem wan wok blong mekem plan, mo rere blong statem mo mekem fandesen blong siti blong stek blong Saeon, long ples ia long graon blong Ketlan, mo bae i stat long haos blong mi.

2 Mo luk, yufala i mas mekem i folem eksampol we mi bin givim long yufala.

3 Mo fas pis graon long Saot, oli mas konsekretem i kam long mi blong bildim wan haos blong presidensi, blong presidensi i mekem ol wok, blong kasem ol revelesen; mo blong wok blong seves blong presidensi, blong evri samting long saed blong jos mo kingdom.

4 I tru, mi talem long yufala, bambae oli mas bildim i fiftifaef fit i waed mo sikstifaef fit i longfala, hemia long insaed blong bilding ia.

5 Mo bambae i mas gat wan ples we i stap daon mo wan ples we i stap antap, folem eksampol we bae mi givim long yufala afta.

6 Mo bambae oli mas dediketem i go long Lod stat long fandesen blong hem, folem oda blong prishud, folem eksampol we bae mi givim long yufala afta.

7 Mo bambae yufala i dediketem fulwan i kam long Lod blong presidensi i yusum blong mekem ol wok blong Jos.

8 Mo bambae yufala i no letem wan samting we i no klin i kam insaed long hem; mo glori blong mi bae i stap insaed ia, mo mi bambae mi stap insaed ia.

9 Be sapos i gat eni samting we i no klin we i kam insaed long hem, bambae glori blong mi i no stap insaed ia; mo bambae mi no stap insaed ia.

10 Mo bakegen, i tru mi talem long yufala, seken pis graon we i stap long Saot, bambae yufala i dediketem i kam long mi blong bildim wan haos blong mi, blong mekem wok blong printim translesen blong ol skripja blong mi, mo evri narafala samting we bae mi givim oda from long yufala.

11 Mo bambae hem i mas fiftifaef fit i waed mo sikstifaef fit i longfala, insaed long bilding ia; mo bambae i mas gat wan ples we i stap daon mo wan ples we i stap antap.

12 Mo haos ia, bambae yufala i mas dediketem fulwan i kam long Lod stat long fandesen blong hem, blong mekem wok blong printim ol samting, long wanem samting we bambae mi givim oda from long yufala, blong i stap tabu, blong oli no spolem, folem eksampol we i stap long saed blong evri samting olsem we bae mi givim long yufala.

13 Mo long nambatri pis graon, bambae wokman blong mi, Haeram Smit i kasem pat ia we hem i gat raet long hem.

14 Mo long fas mo seken pis graon long Not, bambae ol wokman blong mi, Renols Kahun mo Jared Kata, bae tufala i kasem pat ia we tufala i gat raet long hem—

15 Blong oli save mekem wok we mi bin givim long olgeta, blong oli stap olsem wan komiti blong bildim ol haos blong mi, folem komanmen ia, we mi, Lod God, mi bin givim long yufala.

16 Tufala haos ia, bambae yufala i no bildim kasem taem we mi givim oda long yufala blong yufala i mekem.

17 Mo nao, mi no givim moa instraksen long yufala long taem naoia. Amen.