1 I tru, olsem ia nao Lod i talem long olgeta we mi lavem; mo olgeta we mi lavem, mi panisim olgeta tu blong stretem olgeta blong mi fogivim ol sin blong olgeta. From wetem ol panismen ia, mi mekem rere wan wei blong oli kam fri long evri samting we i temtesen, mo mi bin lavem yufala—

2 Taswe, yufala i mas kasem panismen mo stanap long fes blong mi blong mi tok strong blong stretem yufala;

3 From we yufala i bin sin long wan sin we i bigwan agensem mi, from we yufala i no bin tingting long komanmen we i hae moa long saed blong evri samting, we mi bin givim long yufala long saed blong wok blong bildim haos blong mi;

4 From wok blong rere we mi gat i stap blong mekem rere ol aposol blong mi blong oli klinim gud plantesen blong mi blong wan las taem, blong mekem se mi save mekem wok blong mi we i narafala i hapen, blong mekem se mi save kapsaetem Spirit blong mi long evri pipol—

5 Be luk, i tru mi talem long yufala, se i gat plante we mi bin odenem olgeta long medel blong yufala, we mi bin singaotem olgeta, be samfala nomo long olgeta mi jusum.

6 Olgeta we mi no bin jusum, oli bin sin long wan sin we i bigwan, long wei ia we oli stap wokbaot long tudak long medel dei.

7 Mo from hemia nao mi bin givim yufala wan komanmen se bambae yufala i mas singaotem wan tabu miting blong yufala, blong mekem se ol fasin blong yufala blong livim kakae mo harem sore blong yufala oli kam antap kasem sora blong Lod blong Sabaot, we i minim tru long fasin blong tanem mining blong ol lanwis, krieta blong fas dei, we i stat mo en.

8 Yes, i tru mi talem long yufala, mi bin givim wan komanmen long yufala se bae yufala i mas bildim wan haos, mo insaed long haos ia mi gat tingting blong mi givim, long olgeta we mi bin jusum, paoa ia we i kam long heven;

9 From hemia nao promes blong Papa long yufala; taswe, mi givim komanmen long yufala blong gohed blong stap ia, semmak olsem ol aposol blong mi long Jerusalem.

10 Be, ol wokman blong mi oli bin sin long wan sin we i bigwan; mo ol raorao oli bin girap insaed long skul blong ol profet; we i wan samting we i bigwan long mi, Lod blong yufala i talem; taswe, mi sendemaot olgeta i go blong mi panisim olgeta blong stretem olgeta.

11 I tru, mi talem long yufala, se hem i tingting blong mi se bae yufala i mas bildim wan haos. Sapos yufala i stap obei long ol komanmen blong mi, bambae yufala i gat paoa blong bildim haos ia.

12 Sapos yufala i no stap obei long ol komanmen blong mi, lav blong Papa bambae i no gohed blong stap wetem yufala, taswe, bambae yufala i wokbaot long tudak.

13 Nao, hemia i waes toktok, mo i maen blong Lod—oli mas bildim haos ia, i no folem fasin blong wol, from mi no letem yufala blong yufala i laef folem fasin blong wol;

14 From hemia, oli mas bildim haos ia folem fasin we bambae mi soemaot long yufalatri, we bambae mi putum mo odenem yufala long paoa ia.

15 Mo saes blong hem bambae i mas fiftifaef fit i waed, mo bambae i mas sikstifaef fit i longfala, hemia long insaed blong bilding ia.

16 Mo ples we i stap daon insaed long bilding ia, oli mas dediketem i kam long mi blong yufala i givim ofring blong sakramen blong yufala, mo blong yufala i prij, mo blong yufala i livim kakae, mo blong yufala i prea, mo blong yufala i talemaot ol samting we yufala i wantem we oli moa tabu, Lod i talem.

17 Mo ples we i stap antap insaed long bilding ia, oli mas dediketem i kam long mi blong mi mekem skul blong ol aposol blong mi, Pikinini Aman i talem; o long narafala toktok, Alfas; o long narafala toktok, Omegas; we i Jisas Kraes, Lod blong yufala. Amen.