2. Bat Kumora im Peļaakin Palmyra-Manchester
Erre nin̄aļo̧k, pija in ej kwaļo̧k Bat Kumora ilo Manchester, New York. Bat in ej waļo̧k ilo itulaļ ituanbwijmaron̄ in pija in im tōbtōblōn̄ļo̧k jidik n̄an jimattan n̄an tulōn̄in. Monument mouj eo loe ituiōn̄ in jem̧ļo̧k in bat in ej kautiej enjeļ Moronai im waļo̧ktok eo an Bok in Mormon. Bat Kumora ej jutak enan̄in ļalem kilomita ko iturōk-turear in Bukun Wōjke Ekwōjarjar eo. Epaake tulōn̄in pija in ej Jikin Kwelo̧k in Edik an Palmyra, jiljino im jimattan kilomita ettoļo̧k. Jikin kallib eo an baam̧le eo an Smith im Bukun Wōjke Ekwōjarjar rej pād itulōn̄-tuanmiin̄ in pija in.
Men Ko Reļļap: Baam̧le eo an Rikanaan Josep Smith eaar jokwe ilo jikin in ilo iien eo Visōn eo M̧oktata eaar bōk jikin (JS—B 1:3). Ilo Ā.K. 421, Moronai eaar kalbwin juon set in pileij gold ko ilo Bat Kumora eo ewōr ie bwebwenato eo ekwōjarjar an armej ro an (N an M 1:1–11; Morm. 6:6; Moro. 10:1–2). Ejja Moronai in wōt eaar ba n̄an Josep Smith ia enaaj kar lo pileij ko ilo bat in. Moronai eaar liļo̧k n̄an e ilo 1827 (K&B 27:5; 128:20; JS—B 1:33–35, 51–54, 59).