LSS, Sēnesi 17:3–12. Fakafehoanaki mo e Sēnesi 17:3–12
ʻOku ʻikai talangofua ʻa e kakaí ki he ngaahi ouau ʻo e ongoongoleleí, kau ai e papitaisó. ʻOku fakamatalaʻi ʻe he ʻOtuá kia ʻĒpalahame ʻa e fuakava ʻo e kamú pea mo e taʻu ʻoku ala ʻekeʻi ai mei he fānaú ʻa e ngaahi meʻa ʻoku nau faí.
3 Pea naʻe hoko ʻo pehē, naʻe tō foʻohifo ʻa ʻEpalame ʻi hono fofongá, peá ne ui ki he huafa ʻo e ʻEikí.
4 Pea naʻe folofola mai ʻa e ʻOtuá kiate ia, ʻo pehē ange, Kuo hē ʻa hoku kakaí mei heʻeku ngaahi akonakí, pea kuo ʻikai te nau tauhi ʻeku ngaahi ouau, ʻa ia kuó u tuku ki heʻenau ngaahi tamaí;
5 Pea kuo ʻikai te nau tauhi ʻa ʻeku paní; pea mo e tanu, pe ko e papitaiso ʻa ia kuó u fekau kiate kinautolú;
6 Ka kuo nau tafoki mei he fekaú, pea toʻo kiate kinautolu ʻa e fufulu ʻo e fānaú, pea mo e luluku ʻo e totó;
7 Pea nau pehē ko e toto ʻo e tokotaha māʻoniʻoni ko ʻĒpelí naʻe lilingi ia koeʻuhi e ngaahi angahalá; pea ʻikai te nau ʻilo pe ʻe fēfē haʻanau fakamatala ʻi hoku ʻaó.
8 Ka kiate koe, vakai, te u fai ʻeku fuakava mo koe, pea te ke hoko ko e tamai ʻo e ngaahi puleʻanga lahi.
9 Pea ko e fuakava eni ʻoku ou faí, ke ʻiloa ʻa hoʻo fānaú ʻi he ngaahi puleʻanga kotoa pē. Pea ʻe ʻikai toe ui ho hingoá ko ʻEpalame, ka ʻe ui ho hingoá ko ʻĒpalahame; he kuó u ngaohi koe ko ha taimi ki he ngaahi puleʻanga lahi.
10 Pea te u ngaohi koe ke ke tupu ʻo tokolahi ʻaupito, pea te u ngaohi ʻa e ngaahi puleʻanga lahi ʻiate koe, pea ʻe tupu e ngaahi tuʻi ʻiate koe, pea mo ho hakó.
11 Pea te u fokotuʻu ha fuakava ʻo e kamú mo koe, pea ʻe hoko ia ko ʻeku fuakava ʻiate au mo koe, pea mo ho hako ʻi mui ʻiate koé, ʻi honau ngaahi toʻu tangatá; koeʻuhí ke ke ʻiloʻi ai ʻo taʻengata ʻoku ʻataʻatā ʻa e fānaú ʻi hoku ʻaó kae ʻoua kuo nau taʻu valu.
12 Pea te ke feinga ke tauhi ʻeku ngaahi fuakava kotoa pē ʻa ia kuó u fuakava ai mo hoʻo ngaahi tamaí; pea te ke tauhi ʻa e ngaahi fekau ʻa ia kuó u foaki kiate koe ʻi hoku ngutu ʻoʻokú, pea te u hoko ko ha ʻOtua kiate koe pea mo ho hako ʻi mui ʻiate koé.
LSS, Sēnesi 17:23–24. Fakafehoanaki mo e Sēnesi 17:17–18
ʻOku fiefia ʻa ʻĒpalahame ʻi hono kikiteʻi ʻo e fanauʻi mai ʻa ʻAisaké mo lotua ʻa ʻIsimeli.
23 Pea toki tō foʻohifo ʻa ʻĒpalahame ʻi hono fofongá ʻo fiefia, peá ne pehē ʻi hono lotó, ʻE fanauʻi mai ha tama kiate ia kuo teau taʻu hono motuʻá, pea ʻe fanau ʻa Sela ʻa ia ʻoku hivangofulu hono taʻú.
24 Pea pehē ʻe ʻĒpalahame ki he ʻOtuá, ʻOfa ke moʻui angatonu ʻa ʻIsimeli ʻi ho ʻaó!