9 Pea naʻa nau pehē kiate ia, Tuʻu atu. Pea naʻa nau ʻita kiate ia.

10 Pea naʻa nau fepehēʻaki ʻiate kinautolu, Naʻe haʻu ʻa e tangata ʻe tokotahá ni ko e ʻāunofo ʻiate kitautolu, pea te ne fokotuʻu ʻeni ia ko ha fakamaau; pea te tau fai ʻa e kovi lahi ange kiate ia ʻiate kinaua.

11 Ko ia naʻa nau pehē ai ki he tangatá, Te mau maʻu ʻa e ongo tangatá, pea mo ho ongo ʻofefiné foki, pea te mau fai kiate kinautolu ʻo fakatatau ki heʻemau faʻitelihá.

12 Ko ʻeni naʻe fai ia ʻo fakatatau ki he anga ʻo e fai angahala ʻa Sōtomá.

13 Pea pehē ange ʻe Lote, Vakai ko ʻeni, ʻOku ʻi ai hoku ʻofefine ʻe toko ua ʻoku heʻeki ai te na ʻilo ha tangata; ko ia, ʻoku ou kole kiate kimoutolu, ʻe hoku kāinga ke ʻoua naʻá ku ʻomi ʻa kinaua kiate kimoutolu, pea ke ʻoua naʻa mou fai kiate kinaua ʻo fakatatau ki he meʻa ʻoku lelei ki homou matá;

14 Koeʻuhí ʻe ʻikai fakatonuhiaʻi ʻe he ʻOtuá ʻa ʻene tamaioʻeikí ʻi he meʻá ni; ko ia, tuku ke u kole kiate kimoutolu ʻe hoku kāinga, ʻo tuʻo taha, ke ʻoua naʻa mou fai ha meʻa ki he ongo tangatá ni, koeʻuhí ke na maʻu ʻa e melino ʻi hoku falé; he ko e ʻuhinga ia naʻá na haʻu ai ki he malumalu ʻo hoku falé.

15 Pea naʻa nau ʻita kia Lote, pea haʻu ke maumauʻi ʻa e matapaá, ka ko e ongo ʻāngelo ʻa e ʻOtuá, ko e ongo tangata māʻoniʻoni ʻa kinaua, naʻe mafao mai hona nimá, ʻo toho atu ʻa Lote ki he falé kiate kinaua, pea tāpuni ʻa e matapaá.