5 Pea ko ʻeni, koeʻuhi ko ho ongo fohá, ʻa ʻIfalemi mo Manase, ʻa ia naʻe fanauʻi kiate koe ʻi he fonua ʻo ʻIsipité, ki muʻa ʻi heʻeku haʻu kiate koe ʻi ʻIsipité; vakai, ʻoku ʻaʻaku ʻa kinaua, pea ʻe tāpuakiʻi ʻa kinaua ʻe he ʻOtua ʻo ʻeku ngaahi tamaí; ʻio ʻo hangē ko Lūpeni mo Simioné ʻe pehē hono tāpuakiʻi ʻo kinauá, he ʻoku ʻaʻaku ʻa kinaua; ko ia ʻe ui ʻa kinaua ʻi hoku hingoá. (Ko ia naʻe ui ʻa kinaua ko ʻIsileli.)

6 Pea ko hoʻo fānau ʻa ia te ke fakatupu ki mui ʻiate kinauá, ʻe ʻaʻau ia, pea ʻe ui ʻa kinautolu ʻi he hingoa ʻo honau kāinga ʻi honau tofiʻá, ʻi he ngaahi faʻahingá; ko ia naʻe ui ʻa kinaua ko e faʻahinga ʻo Manasé pea mo ʻIfalemí.

7 Pea naʻe pehē ʻe Sēkope kia Siosefa, ʻI he hā mai ʻa e ʻOtua ʻo ʻeku ngaahi tamaí kiate au ʻi Lusa, ʻi he fonua ʻo Kēnaní; naʻá ne fuakava kiate au, te ne foaki mai kiate au, pea ki hoku hakó, ʻa e fonuá ke hoko ko ha tofiʻa ʻo lauikuonga.

8 Ko ia, ʻE hoku foha, kuó ne tāpuakiʻi au ʻi hono fokotuʻu hake koe ke hoko ko ha tamaioʻeiki kiate au, ʻi he fakahaofi hoku falé mei he maté;

9 ʻI hono fakahaofi hoku kakaí, ʻa ia ko ho kāingá, mei he honge ʻa ia naʻe lahi fau ʻi he fonuá; ko ia ʻe tāpuakiʻi koe ʻe he ʻOtua ʻo hoʻo ngaahi tamaí, pea mo e fua ʻo ho manavá, koeʻuhí ke tāpuekina ʻa kinautolu ʻo lahi ange ʻi ho kāingá, pea lahi ange ʻi he fale ʻo hoʻo tamaí;

10 He kuó ke ikuna, pea kuo punou hifo ʻa e fale ʻo hoʻo tamaí ʻi ho ʻaó, ʻio ʻo hangē ko hono fakahā kiate koe ʻi he heʻeki ai fakatau koe ki ʻIsipite ʻi he nima ʻo ho ngaahi tokouá; ko ia ʻe punou hifo ʻa ho ngaahi tokouá kiate koe, mei he toʻu tangata ki he toʻu tangata, ki he fua ʻo ho manavá;

11 He te ke hoko ko ha maama ki hoku kakaí, ke fakahaofi ʻa kinautolu ʻi he ngaahi ʻaho ʻo ʻenau nofo pōpulá, mei he nofo fakapōpulá; pea ke ʻomi ʻa e fakamoʻuí kiate kinautolu, ʻi heʻenau punou kotoa ʻi he mamafa ʻo e angahalá.