LSS, Sēnesi 9:4–6. Fakafehoanaki mo e Sēnesi 8:20–22
Hili e Tāfeá, ʻoku kole ʻe Noa ki he ʻEikí ke ʻoua naʻa toe fakamalaʻiaʻi e māmaní.
4 Pea naʻe fokotuʻu ʻe Noa ha ʻesi feilaulau ki he ʻEikí, pea naʻá ne toʻo mei he fanga manu maʻa kotoa pē, pea mei he fanga manupuna naʻe maʻá, pea ʻohake ʻa e ngaahi feilaulau ʻi he ʻesi feilaulaú; pea ʻohake ʻa e fakafetaʻi ki he ʻEikí, pea fiefia ʻi hono lotó.
5 Pea folofola ʻa e ʻEikí kia Noa, pea naʻá ne tāpuakiʻi ia. Pea nanamu ʻa Noa ki hono ngangatu leleí, peá ne pehē ʻi hono lotó;
6 Te u ui ki he huafa ʻo e ʻEikí, koeʻuhi ke ʻoua naʻá ne; toe fakamalaʻiaʻi e kelekelé koeʻuhi ko e tangatá, he ko e ngaahi mahalo ʻo e loto ʻo e tangatá ʻoku kovi mei heʻene kei talavoú; pea ke ʻoua naʻá ne toe taaʻi ʻa e ngaahi meʻa moʻui kotoa pē, ʻo hangē kuó ne faí, lolotonga e kei tuʻu ʻa māmaní.
LSS, Sēnesi 9:10–15. Fakafehoanaki mo e Sēnesi 9:4–9
Kuo pau ke ʻekeʻi mei he tangatá ʻa ʻene lilingi ʻa e toto ʻo e fanga monumanú pea mo e tangatá. ʻOku fokotuʻu ʻe he ʻOtuá mo Noa pea mo hono ngaahi fohá ʻa e fuakava tatau naʻá Ne fai mo ʻĪnoké.
10 Ka ko e toto ʻo e kakano kotoa pē ʻa ia kuó u foaki kiate kimoutolu ko e meʻakaí, ke mou lilingi ia ki he kelekelé, ʻa ia ʻoku maʻu moʻui mei ai, pea ko e totó ʻe ʻikai te mou kai ia.
11 Pea ko e moʻoni, ʻe ʻikai lilingi ha toto, ka ki he meʻakai pē, ke fakahaofi hoʻomou moʻuí; pea ko e toto ʻo e fanga manu kotoa pē te u ʻekeʻi mei homou nimá.
12 Pea ko ia ia ʻoku lilingi ʻa e toto ʻo e tangatá, ʻe lilingi hono totó ʻe he tangata; koeʻuhí ʻe ʻikai lilingi ʻe he tangata ʻa e toto ʻo e tangata.
13 Pea ko ha fekau ʻoku ou ʻoatu, ke tokanga ʻa e tokoua ʻo e tangata taki taha ke maluʻi ʻa e moʻui ʻa e tangatá, he naʻá ku ngaohi ʻa e tangatá ʻi hoku tatau ʻoʻokú.
14 Pea ko ha fekau ʻoku ou ʻoatu kiate kimoutolu, Ke mou fanafanau mo fakatokolahi; pea ʻomi ʻa e fānau tokolahi ki he funga ʻo e māmaní, pea nau fakatokolahi ʻi ai.
15 Pea naʻe folofola ʻa e ʻOtuá kia Noa, pea ki hono ngaahi fohá fakataha mo ia, ʻo pehē, Vakai, ko au, te u fokotuʻu ʻeku fuakava mo kimoutolu, ʻa ia naʻá ku fai ki hoʻo tamai ko ʻĪnoké ʻo kau ki ho hako ʻi mui ʻiate koé.
LSS, Sēnesi 9:21–25. Fakafehoanaki mo e Sēnesi 9:16–17
ʻOku fokotuʻu ʻe he ʻOtuá ʻa e ʻūmatá ʻi he langí ke hoko ko ha fakamanatu ʻo ʻEne fuakava kia ʻĪnoke pea kia Noá. ʻI he ngaahi ʻaho fakaʻosí, ʻe kau ʻa e fakatahaʻanga lahi ʻa e Siasi ʻo e ʻUluaki Fānaú mo e kau māʻoniʻoni ʻi he māmaní.
21 Pea ʻe ʻi he ʻaó ʻa e ūmata; pea te u mamata ki ai, koeʻuhí ke u manatu ki he fuakava taʻengata ʻa ia naʻá ku fai ki hoʻo tamai ko ʻĪnoké, ʻo ka tauhi ʻe he tangatá ʻa ʻeku ngaahi fekau kotoa pē, ʻe toe fakafoki mai ʻa Saione ki he māmaní, ʻa ia ko e kolo ʻo ʻĪnoke ʻa ia naʻá ku toʻo hake kiate au.
22 Pea ko ʻeni ʻa ʻeku fuakava taʻengatá, ʻo ka tali ʻe ho hakó ʻa e moʻoní, pea hanga hake kiate au, ʻe vakai hifo ʻa Saione, pea ʻe tetetete ʻa e ngaahi langí kotoa ʻi he fiefia, pea ngalulululu ʻa e māmaní ʻi he nēkeneka;
23 Pea ʻe ʻalu hifo ʻa e fakataha kātoa ʻo e siasi ʻo e ʻUluaki Fānaú mei he langí, ʻo maʻu ʻa e māmaní, pea maʻu hano potu ʻi ai kae ʻoua kuo hokosia ʻa e ngataʻangá. Pea ko ʻeni ʻa ʻeku fuakava taʻengatá, ʻa ia naʻá ku fai mo hoʻo tamai ko ʻĪnoké.
24 Pea ʻe ʻi he ʻaó ʻa e ʻūmata, pea te u fokotuʻu ʻa ʻeku fuakava kiate koé, ʻa ia kuó u fai ʻiate au mo koe, maʻá e meʻa moʻui ʻo e kakano kotoa pē ʻe ʻi he māmaní.
25 Pea naʻe folofola ʻa e ʻOtuá kia Noa, Ko e fakaʻilonga ʻeni ʻo e fuakava ʻa ia kuó u fokotuʻu ʻiate au mo koé; maʻá e kakano kotoa pē ʻe ʻi he māmaní.