LSS, Sione 4:1–4. Fakafehoanaki mo e Sione 4:1–2
ʻOku holi ʻa e kau Fālesí ke fakapoongi ʻa Sīsū. ʻOkú Ne fakahoko ha ngaahi papitaiso, ka ʻoku fakahoko ʻe Heʻene kau ʻaposetoló ʻo lahi ange.
1 Pea ko ia ʻi he fanongo ʻa e kau Fālesí ʻoku maʻu mo papitaiso ʻe Sīsū ʻa e kau ākonga tokolahi ange ʻia Sioné,
2 Naʻa nau kumi lahi ange ki ha ngaahi founga ʻa ia te nau lava ʻo tāmateʻi ia; he naʻe tali ʻe he tokolahi ʻa Sione ko ha palōfita, ka naʻe ʻikai te nau tui kia Sīsū.
3 Ko ʻeni naʻe ʻafioʻi ʻeni ʻe he ʻEikí, neongo naʻe ʻikai te ne papitaiso ha tokolahi ʻo hangē ko ʻene kau ākongá;
4 He naʻá ne tuku ʻa kinautolu ke nau hoko ko e faʻifaʻitakiʻanga, ʻo e fefakaʻapaʻapaʻaki ʻiate kinautolú.
LSS, Sione 4:26. Fakafehoanaki mo e Sione 4:24
ʻOku talaʻofa mai ʻe he ʻOtuá ʻa Hono Laumālié ki he kau tui moʻoní.
26 He ko e faʻahinga peheé kuo ʻosi talaʻofa mai ʻe he ʻOtuá ʻa hono Laumālié kiate kinautolu. Pea ko kinautolu ʻoku hū kiate iá, kuo pau ke nau hū ʻi he laumālie pea ʻi he moʻoni.