¶ 1 KOE vaine momoa a Isileli, oku ne fua mai kiate ia be: o fakatatau ki he lahi o hono fua kuo ne fakalahi ae gaahi feilaulauaga; o fakatatau ki he lelei o hono fonua kuo nau gaohi ae gaahi tamabua masani.

2 Kuo mavahevahe ho nau loto; koeni, e ilo kuo nau hala: te ne li hifo ho nau gaahi feilaulauaga, bea maumau‘i e nau gaahi tamabua.

3 He te nau behe ni, Oku ikai ha mau tu‘i, koeuhi nae ikai te mau manavahe kia Jihova; bea koeha e fai ma amautolu e ha tu‘i?

4 Kuo nau lea aki ae gaahi lea, o tuki loi i he fai ae fuakava: koia kuo tubu ae fakamāu o hage koe hemiloki i he luoluo oe goue.

5 E manavahe ae kakai o Samelia, koeuhi koe gaahi bulu jii a Bete‐aveni: e tagilāulāu ai ae kakai oia, moe kau taulaeiki aia nae fiefia ai, koeuhi ko hono nāunāu, koe mea i he ene mahui mei ai.

6 E ave ia foki ki Asilia koe mea ofa ki he tu‘i ko Jalebi: e hoko ae ma kia Ifalemi, bea e ma a Isileli i he ene fakakaukau aana.

7 Ka ko Samelia, e tabibi hono tu‘i o hage koe koa mei he fukahi vai.

8 E auha foki ae gaahi botu maoluga o Aveni, koe agahala a Isileli: koe akau talatala moe tiseli e tubu hake i ho nau gaahi feilaulauaga; bea te nau lea ki he gaahi mouga, o behe, Ufiufi kimautolu; bea ki he gaahi tafugofuga, o behe, Taomia kimautolu.

9 E Isileli, kuo ke agahala talu mei he gaahi aho o Kibea: naa nau tuu i ai: koe tau i Kibea ki he fānau ae agahia nae ikai te ne fakamoua akinautolu.

10 Oku i he eku holi ke tautea akinautolu; bea e fakataha ae kakai kiate kinautolu, oka nau ka ha‘ijia akinautolu i he e na ogo luo.

11 Ko Ifalemi koe bulu mui kuo akonekina, oku manako ke malaki  ae koane; ka naaku laka i hono kia matamatalelei: teu gaohi a Ifalemi ke heka; e toho huo a Juta, bea momoji hono kelekele fefeka e Jekobe.

12 Tūtū‘i kiate kimoutolu i he agatonu, utu i he aloofa; fakamolu ae kelekele oku tuku vaoa: he koe kuoga eni ke kumi kia Jihova, kae oua ke ne haele mai, bea fakauha ae maonioni kiate kimoutolu.

13 Kuo mou keli aki ae huo toho i he agakovi, kuo mou utu i he agahia; kuo mou kai ae fua oe loi: koeuhi kuo ke falala ki ho hala, mo hono toko lahi o hoo kau tagata malohi.

14 Koia e tubu ae maveuveu i he lotolotoga oe kakai, bea e maumau‘i ho gaahi kolo tau, hage nae maumau‘i e Salimani a Beteabeli i he aho oe tau: nae lailai ae fa‘e mo feleteni mo ene fānau.

15 E behe ae fai e Beteli kiate kimoutolu, koeuhi ko hoo mou gaahi agakovi lahi: i ha bogibogi be e matuaki tuuji ae tu‘i o Isileli.