¶ 1 FANOGO eni, ae kau taulaeiki; bea fakafanogo, e fale o Isileli; bea tokaga mai ho teliga, e fale oe tu‘i; he oku fai kiate kimoutolu ae fakamāu, koeuhi koe tauhele akimoutolu ki Misiba, bea koe kubega nae fola i Teboa.

2 Bea koe kau agatuu oku loto ke fai ae fakabo, ne ogo ko au naaku valoki‘i akinautolu kotoabe.

3 Oku ou ilo a Ifalemi, bea oku ikai buli a Isileli meiate au: he koeni, e Ifalemi, oku ke fai feauaki, bea kuo uli‘i a Isileli.

4 E ikai te nau gaohi e nau aga ke liliu ki ho nau Otua: he koe laumalie oe feauaki oku i loto iate kinautolu, bea oku ikai te nau ilo a Jihova.

5 Bea koe fielahi a Isileli e fakatohifo ai hono mata: koia e to ki lalo a Isileli, mo Ifalemi i he e nau agahala; e to foki a Juta mo kinautolu.

6 Te nau alu moe nau faga sibi moe nau faga manu ke kumi a Jihova; ka e ikai te nau ilo ia; kuo ne mahui meiate kinautolu.

7 Kuo nau fai kākā kia Jihova: he kuo nau fakatubu ae fānau kehe: koeni, koe mahina be taha, bea e folo akinautolu mo ho nau gaahi tofia.

8 Ifi ae meaifi i Kibea, bea moe mealea i Lama: kalaga lahi ki Beteaveni, jio ki mui koe, e Benijimani.

9 E lala a Ifalemi i he aho oe valoki: i he lotolotoga oe gaahi faahiga o Isileli, kuou fakaha aia e hoko mooni.

10 Koe houeiki o Juta nae hage ko kinautolu oku hiki ae fakailoga: koia teu liligi hoku houhau kiate kinautolu, o hage koe vai.

11 Kuo fakamalohi mo feji‘i a Ifalemi i he fakamāu, koeuhi naa ne loto ke muimui ki he vaiga.

12 Koia teu hage koe ane kia Ifalemi, bea hage koe bobo ki he fale o Juta.

13 I he mamata e Ifalemi ki hono mahaki, bea mo Juta ki hono lavea naa ne toki alu a Ifalemi ki he Asilia, bea ne fekau ki he tu‘i ko Jalebi: ka nae ikai te ne faa fakamoui koe, ke moui ai ho lavea.

14 He teu hage koe laione ki Ifalemi, bea hage koe laione mui ki he fale o Juta: Ko au, io ko au, teu hae‘i, bea toe alu; teu ave bea e ikai ha toko taha te ne fakahaofi.

¶ 15 Teu tafoki o alu ki hoku botu, kae oua ke nau vete e nau hia, bea kumi ki hoku fofoga: i he e nau gaahi mamahi, te nau kumi fakavave kiate au.