¶ 1 KE ke behe ki ho gaahi tokoua, Ko Ami, bea ki ho gaahi tuofefine, ko Luhama.

2 Kole ki hoo fa‘e, kole: he oku ikai ko hoku unoho ia, bea oku ikai ko hono unoho au: bea koeuhi koia, tuku ke ne ave ene feauaki mei hono ao, bea mo ene tonotagata mei he vahaa o hono huhu;

3 Telia naaku fakatelefua ia, bea tuku ia ke hage koe aho o hono fanau‘i, bea gaohi ia ke hage koe toafa, bea tuku ia ke tatau moe fonua momoa, bea tamate‘i ia i he fieinu.

4 Bea e ikai teu aloofa ki he ene fānau; he koe fānau ae feauaki akinautolu.

5 He kuo fai e he e nau fa‘e ae feauaki: bea koia ia nae tuituia akinautolu kuo ne fai fakalielia: he naa ne behe, Teu alu atu ki he eku kau mamana, aia oku foaki mai eku ma mo eku vai, a eku fulufulu‘i sibi mo eku filo, a eku lolo mo eku inu.

¶ 6 Koia, vakai, teu felei hono hala aki ae akau talatala, bea gaohi ha a, ke oua naa ne ilo hono gaahi hala.

7 Bea te ne muimui ki he ene kau mamana, ka e ikai te ne ma‘u akinautolu; te ne kumi akinautolu ka e ikai ilo: bea te ne toki behe, Teu alu, bea tafoki ki hoku uluaki unoho; he nae lelei lahi ai ia kiate au.

8 He nae ikai te ne ilo naaku foaki kiate ia ae koane, moe uaine, moe lolo, bea neu fakalahi kiate ia ae siliva, moe koula, naa nau teu ma a Beali.

9 Koia teu tafoki, bea ave eku koane i hono kuoga, bea mo eku uaine i hono taahita‘u, bea teu toe ma‘u eku fulufulu‘i sibi mo eku filo nae ufiufi aki ene telefua.

10 Bea teu fakaha ni a ene uli i he ao o ene kau mamana, bea e ikai ha taha te ne fakahaofi ia mei hoku nima.

11 Bea teu fakagata ene fiefia, mo hono gaahi aho katoaga, mo hono gaahi mahina foou, mo hono gaahi ahotabu, bea mo ene gaahi katoaga mamafa kotoabe.

12 Bea teu fakaauha ene gaahi vaine, bea mo ene gaahi akau koe fiki, aia naa ne behe ai, Ko eni ae totogi nae foaki mai e he eku kau mamana: bea teu gaohi ia koe vao akau, bea e kai ia e he faga manu oe vao.

13 Bea teu totogi kiate ia ae gaahi aho o Bealimi, aia naa ne tutu ai kiate kinautolu ae akau namu lelei, bea ne teuteu aki eia ae mama i hono teliga mo ene gaahi teuga, bea ne alu atu ki he ene kau mamana, o ne fakagalo‘i au: oku behe e Jihova.

¶ 14 Koia, vakai, teu tauhele‘i ia, bea omi ia ki he toafa, bea lea fakafiemalie kiate ia.

15 Bea teu foaki kiate ia a ene goue vaine mei ai, bea moe telea o Akoli koe mataba oe amanaki lelei; bea te ne hiva i ai, o hage koe gaahi aho o ene kei jii, bea hage koe aho naa ne alu hake ai mei he fonua ko Ijibite.

16 Bea e hoko i he aho koia, oku behe e Jihova, te ke ui au ko Isi ka e ikai toe ui au ko Beali.

17 He teu too mei hono gutu ae gaahi higoa o Bealimi, bea e ikai toe manatu‘i akinautolu i ho nau higoa.

18 Bea i he aho koia teu fai ae fuakava ki he faga manu oe goue ma anautolu, bea ki he faga manu buna oe atā, bea ki he faga manu totolo oe kelekele, bea teu feji‘i ae kaufana moe heleta moe tau mei he fonua, bea teu bule ke nau tokoto hifo i he fiemalie.

19 Bea teu fakamau koe kiate au o lauikuoga; io teu fakamau koe kiate au i he maonioni, bea moe agatonu, bea i he agaofa, bea i he gaahi aloofa.

20 Teu fakamau koe kiate au i he mooni: bea te ke ilo a Jihova.

21 Bea e hoko i he aho koia, teu fanogo, oku behe e Jihova, teu fanogo, ki he gaahi lagi, bea te nau fakafanogo ki mamani:

22 Bea e fanogo ae mamani ki he koane, bea moe uaine, bea moe lolo, bea te nau fanogo kia Jesilili.

23 Bea teu tūtū‘i ia kiate au i he fonua; bea teu aloofa kiate ia nae ikai ke ma‘u ha aloofa; bea teu behe kiate kinautolu nae ikai ko hoku kakai, Ko hoku kakai akimoutolu, bea te nau behe, Ko ho mau Otua koe.