¶ 1 HA‘U, bea tuku ke tau tafoki kia Jihova: he kuo ne hae‘i, bea te ne fakamoui akitautolu; kuo ne ta‘i, bea te ne toe fakamaoboobo.

2 Hili ae aho e ua te ne toe fakamoui akitautolu: i hono tolu oe aho te ne toe fokotuu akitautolu, bea te tau moui i hono ao.

3 Bea te tau toki ilo oka tau ka muimui atu ke ilo a Jihova: ko ene alu atu oku teuteu o hage koe bogibogi; bea te ne hoko kiate kitautolu o hage koe uha, koe uha mui moe uha mua ki he kelekele.

¶ 4 E Ifalemi, Koeha teu fai kiate koe? E Juta, koeha teu fai kiate koe? he ko hoo lelei oku hage koe ao oe bogibogi, bea hage koe hahau oe hegihegi oku mole atu.

5 Koia kuou ta‘i akinautolu i he kau balofita; kuou tamate‘i akinautolu i he gaahi lea a hoku gutu: bea ko hoo gaahi fakamāu oku hage koe māma oku ulo atu.

6 He kuou holi ki he aloofa, kae ikai ki he feilaulau; bea koe ilo ki he Otua o lahi hake i he feilaulau.

7 Kae hage koe tagata kuo nau maumau‘i ae fuakava: kuo nau fai kākā i ai kiate au.

8 Koe kolo okinautolu oku fai kovi a Kiliati, bea oku uli i he toto.

9 Hage oku tatali e he fakataha oe kau kaihaa ki ha tagata, oku behe ae fai fakabo i he hala e he fakataha oe kau taulaeiki o loto tatau be: he oku nau fai agauli.

10 Kuou mamata ki ha mea fakailifia i he fale o Isileli: oku i ai ae feauaki a Ifalemi, kuo uli‘i a Isileli.

11 Kuo tuutuuni foki, e Juta, ha ututa‘u kiate koe, i he ene liliu ae bobula a hoku kakai.