Abraham Kuatiañeʼẽ

1 Caldeo-kuéra retãme, umi che ru oikohápe, che, Abraham, ahechákuri tekotevẽha aheka ambue tenda aiko hag̃ua;

2 Ha ajuhúvo oĩveha tuicha vyʼa, pyʼaguapy ha pytuʼu chéve g̃uarã, ahekákuri umi túva jehovasa, ha derécho che oñeordevaʼerãháme, aʼadministra hag̃ua umíva; chete haʼéguikuri tekojoja rekahára, aguerekosévo avei tuichave kuaapy, ha asegi porãve hag̃ua tekojoja, ha aguereko hag̃ua kuaapy tuichavéva, ha haʼe hag̃ua heta tetãnguéra ru, peteĩ pyʼaguapy prínsipe, ha ahupytysévo ñemyesakã, ha añongatu hag̃ua Tupã rembiapoukapykuéra, oiko chehegui peteĩ eredéro añete, peteĩ Sumo Sacerdote, aguerekóvo derécho umi túva mbaʼévare.

3 Oñemeʼẽvaʼekue chéve tuvakuéragui; ou tuvakuéragui, ára oñepyrũmby guive, héẽ, jepeve iñepyrũmby guive, térã, yvy ojejapo mboyve, ko ára peve, upe primohénito derécho jepe, térã pe kuimbaʼe ypykuégui, haʼéva Adán, ñande ru peteĩha, ha umi túva rupive chéve g̃uarã.

4 Ahekákuri che ñehenói Sacerdocio-pe, Tupã ñehenói tuvakuerapeguáicha, upe ñemoñare reheguávape.

5 Ojeívo che rukuéra hekojojágui, ha tembiapoukapykuéra marangatu Ñandejára Itupã omeʼẽvaʼekuégui chupekuéra, ha oñemeʼẽvo paganokuéra raʼangápe ñetupãitũme, oñenegambaite hikuái ohendu hag̃ua che ñeʼẽpu;

6 Ikorasõkuéra oĩmagui ojapo hag̃uáicha ivaíva, ha oñemeʼẽmbaitéguikuri Elkénah tupãme, ha Líbnah tupãme, ha Mahmáckrah tupãme, ha Korash tupãme, ha Faraón, Egipto rréi, tupãme;

7 Upévare, ombojere ikorasõkuéra paganokuéra temikuaveʼẽme, oikuaveʼẽvo itaʼyrakuéra hiʼídolo oñeʼẽʼỹvape, ha nohendúi hikuái che ñeʼẽpu, ha katu oñehaʼã oipeʼa che rekove sacerdote Elkénah po rupive. Pe Elkénah sacerdote haʼékuri avei Faraón sacerdote.

8 Koʼág̃a katu, upe árape, Faraón, Egipto-gua rréi sacerdote, ojepokuaákuri oikuaveʼẽ altar ári, oñemopuʼãvaʼekue Caldea retãme, umi kuimbaʼe, kuña ha mitãnguéra ñekuaveʼẽmbýramo koʼã tupã pytaguápe.

9 Ha ojehu upe sacerdote ojapo peteĩ ñeikuaveʼẽ Faraón tupãme, ha avei Shagreel tupãme, jepeve egipcio-kuéra ojepokuaaháicha. Koʼág̃a, Shagreel tupã haʼékuri pe kuarahy.

10 Ha peteĩ mitã jepeve oikuaveʼẽkuri Faraón sacerdote, aguyje temikuãveʼẽramo, altar ári oĩva yvytyʼípe, ojeheróva Potifar Yvytyʼi, Olishem yvy ipéva akãme.

11 Koʼág̃a katu, peteĩ ára ko sacerdote oikuaveʼẽkuri mbohapy vírhen, Onítah rajykuéra, peteĩ lináhe hiʼañetéva, oúva Cam lomoitégui. Oñeikuaveʼẽkuri koʼã vírhenpe ivirtu rupi; ndojayvymoʼãiguikuri hikuái otupãitũ hag̃ua umi tupã yvyraguigua ni itaguiguápe; upévare, ojejuka chupekuéra altar ári, ha ojejapókuri Egipcio-kuéra ojepokuaaháicha.

12 Ha ojehu umi sacerdote chejapyhýkuri mbaretépe, chejuka hag̃ua avei chéve, ojapo haguéicha hikuái altar ári umi vírhenre; ha peikuaa hag̃ua mbaʼéicharaʼe ko altar, pogueraháta ñemohaʼanga oĩva ko kuatiajehaipyre ñepyrũme.

13 Ojejapókuri tupáicha, caldeo-kuéra apytépe ojeporuháicha, ha oĩkuri umi tupã Elkénah, Líbnah, Mahmáckrah, Korash ha avei peteĩ tupã, Faraón, Egipto rréi tupãichagua renondépe.

14 Peikũmby hag̃ua mbaʼéichaparaʼe koʼã tupã, ajapókuri peteĩ ñemohaʼanga chuguikuéra oĩva iñepyrũmbýme, umi taʼanga caldeo-kuéra ohenóiva Rahleenos, heʼiséva jeroglíficos.

15 Ha omopuʼãvo hikuái ipo cherehe, chekuaaveʼẽ hag̃ua ha oipeʼa hag̃ua che rekove, péina ápe, ahupi che ñeʼẽpu Ñandejára che Tupãme, ha Ñandejára ojapysaka ha ohendu, ha haʼe chemyenyhẽ Ipuʼakapáva visiõ reheve, ha pe ánhel hendivegua oñemboʼy che ykére, ha upepete ojora umi che jokuaha;

16 Ha ou iñeʼẽpu chéve: Abraham, Abraham, péina ápe, che réra Jehová, ha Che rohendúkuri, ha aguejýkuri romosãso hag̃ua, ha rogueraha hag̃ua nde ru rógagui, ha opa ne hénte hiʼag̃uívagui, peteĩ tetã reikuaaʼỹvape, mbaʼeve ndereikuaáivagui;

17 Ha kóva ombojerégui hikuái ikorasõkuéra chehegui, otupãitũ hag̃ua Elkénah tupãme, ha Líbnah tupãme, ha Mahmáckrah tupãme, ha Korash tupãme, ha Faraón, Egipto rréi tupãme; upévare, Che aguejýkuri aju hag̃ua hendapekuéra, ha ahundi hag̃ua pe omopuʼãvaʼekuépe ipo nderehe, Abraham, che raʼy, oipeʼa hag̃ua nde rekove.

18 Péina ápe, Che rogueraháta che po rupi, ha rogueraháta amoĩ hag̃ua nde ári che réra, jepe nde ru Sacerdocio, ha che pokatu opytuʼúta nde ári.

19 Oĩ haguéicha Noé ndive, upéichata nendive; ha katu ne ministério rupi ojeikuaáta yvy ári che réra akoiete g̃uarã, Che haʼégui nde Tupã.

20 Péina ápe, Potifar Yvytyʼi oĩkuri Ur-pe, caldeo-kuéra retãme. Ha Ñandejára oitýkuri Elkénah altar, ha tetãmegua tupãnguéra, ha ohundipaite chupekuéra, ha ohavira pe sacerdote-pe ha haʼe omano; ha oĩkuri tuicha jaheʼo Caldea-pe, ha avei Faraón kórtepe; ha Faraón heʼise rréi tuguy rreal rupi.

21 Koʼág̃a, ko Egipto rréi haʼékuri Cam lómo ñemoñare, ha haʼékuri Cananeo-kuéra ruguy, ñemoheñói rupive.

22 Kóva ko ñemoñarégui heñoivaʼekue opa Egipcio-kuéra, ha upéicha oñeñongatúkuri yvy ári cananeo-kuéra ruguy.

23 Egipto retã ojejuhu ypyvaʼekue peteĩ kuñáre, haʼéva Cam rajy, ha Egyptus rajy, caldeo-pe heʼiséva Egipto, ha heʼiséva pe oñembotovéva.

24 Ko kuña ojuhurõguare, pe yvy henyhẽkuri ýgui, ha upe rire omoĩkuri imembykuéra upépe; ha péicha heñóikuri Cam-gui, upe rrása oñongatuvaʼekue ñeʼẽngái yvy ári.

25 Koʼág̃a, Faraón, Egyptus raʼy ypykue, Cam rajy, omoĩvaʼekue Egipto goviérno peteĩha, ha haʼékuri Cam goviérno joguaha, haʼéva patriarcal.

26 Faraón, haʼévo kuimbaʼe hekojojáva, omoĩvaʼekue irréino ha ohusga itavayguakuéra arandu ha tekojojápe opa hiʼára, oñehaʼã añetévo ojapo upe orden tuvakuéra omoĩ haguéicha ñemoñareaty ñepyrũme, umi rreinádo patriarcal peteĩha árape, héẽ, Adán rreinádope ha avei Noé, itúva, ohovasavaʼekue chupe umi yvy arigua jehovasa reheve, ha arandu jehovasa reheve, ha katu omoñeʼẽngái chupe Sacerdocio reheguávape.

27 Koʼág̃a, haʼévo Faraón upe linahegua, ndohejáiva chupe oguereko derécho Sacerdocio-pe, jepe Faraon-kuéra ojerure porãtakuri Noé-gui, Cam lináhe rupive, ojehúkuri che ru oñemboguata karẽ itaʼangarayhukuéra rupi;

28 Ha katu ko ára guive tenonderã, amombeʼúta pe féchare ñemohenda oúva che guive apopyre ñepyrũmby peve, oúgui che pópe umi kuatiajehaipyre, ko ára peve aguerekóva.

29 Koʼág̃a, Elkénah sacerdote ojehavira ha ojejuka rire, oñekumplíkuri umi mbaʼe ojeʼevaʼekue chéve Caldea retãre, oĩtaha yvy ári ñembyahýi.

30 Ha péicha ipuʼaka ñembyahýi opa Caldea retãre, ha che ru ohasaʼasy vaiete ñembyahýi rupi, ha oñearrepenti mbaʼevai ojaposevaʼekuégui cherehe, oipeʼa hag̃ua che rekove.

31 Ha katu tuvakuéra kuatiajehaipyre, héẽ, umi patriarca, sacerdocio derécho reheguáva, Ñandejára che Tupã oñongatúkuri che poitépe; upévare, apopyre ñepyrũmby kuaapy, ha avei umi planéta ha mbyjakuéra, umíva ojeikuaauka haguéicha tuvakuérape, che añongatúkuri ko ára peve, ha añehaʼãta ahaimi koʼã mbaʼe ko ñemombeʼúpe, che ñemoñare mbaʼeporãrã, umi oútava che rire.