1 Upérõ Ñandejára heʼi: Jaguejy. Ha oguejy hikuái pe iñepyrũmbýpe, ha haʼekuéra, ojeʼeháicha, umi Tupã, omohenda ha ojapo yvagakuéra ha yvy.

2 Ha yvy, ojejapopa rire, isarambipa ha nandi, haʼekuéra ndojapoiguikuri mbaʼeve ndahaʼéirõ pe yvýnte; ha pytũmby ojahoʼi pe y pypuku rova ape, ha umi Tupã Espíritu ojahoʼi umi y rova.

3 Ha haʼekuéra (umi Tupã) heʼíkuri: Toiko tesape; ha oikókuri tesape.

4 Ha haʼekuéra (umi Tupã) oikũmbýkuri upe tesape, ojajáigui; ha ombojaʼo hikuái tesape, térã ojapo tojei pytũmbykuéragui.

5 Ha umi Tupãnguéra ombohéra upe tesapépe Ára, ha umi pytũmbýpe ohenói hikuái Pyhare. Ha ojehu kaʼarupytũ guive pyhareve peve ohenói hikuái pyhare; ha pyhareve guive kaʼarupytũ meve ohenói hikuái ára; ha kóva haʼékuri peteĩháva, térã upe haʼekuéra ohenoivaʼekue ára ha pyhare ñepyrũmby.

6 Ha umi Tupã heʼi avei: Toiko peteĩ arapy umi y mbytépe, ha kóva ombojaʼóta umi y ykuéragui.

7 Ha umi Tupã omandákuri arapýpe, ha upéicha rupi oñembojaʼo ykuéra oĩva arapy guýpe, ykuéra oĩvagui arapy ári; ha oiko, jepeve haʼekuéra omanda haguéicha.

8 Ha umi Tupã ohenói arapýpe, Yvága. Ha ojehu pe haʼéva kaʼaru guive pyhareve peve ohenói hikuái pyhare; ha ojehu pe haʼéva pyhareve guive kaʼarupytũ meve ohenói hikuái ára; ha haʼékuri mokõiha jeyve ohenoihague hikuái pyhare ha ára.

9 Ha umi Tupã omandákuri, heʼívo: Taʼijaty peteĩ hendápe ykuéra yvága guygua, ha taikã upe yvy; ha oiko omanda haguéicha hikuái;

10 Ha umi Tupã ohenóikuri yvy ikãvape, Yvy; ha umi y ijatývape ohenói hikuái Y Guasu; ha umi Tupã ohechákuri oñeñeʼẽrenduha hesekuéra.

11 Ha Tupãnguéra heʼi: Ñambosakoʼi pe yvy omoheñói hag̃ua kapiʼipe; pe kaʼavo tomeʼẽ yvaraʼỹi; pe yvyramáta hiʼáva tomeʼẽ yva heseguáicha, hiʼyvaraʼỹi teégui omeʼẽtava heseguáicha yvy ári; ha oiko, jepeve omanda haguéicha hikuái.

12 Ha umi Tupã omohendákuri upe yvy omoheñói hag̃ua kapiʼipe haʼỹi teégui, ha pe kaʼavo tomoheñói kaʼavo haʼỹi teégui, omeʼẽvo yvaraʼỹi heseguáicha; ha pe yvy omoheñói hag̃ua yvyramáta hiʼáva haʼỹi teégui, omeʼẽvo yvaʼa, haʼỹingue ikatúva omoheñói ijehegui añónte, heseguáicha; ha umi Tupã ohecha oñeñeʼẽrenduha hesekuéra.

13 Ha ojehu oipapákuri hikuái umi ára; kaʼarupytũ guive pyhareve peve ohenói hikuái pyhare; ha ojehu, pyhareve guive kaʼarupytũ meve ohenói hikuái ára; ha haʼékuri mbohapyha ára jeyve.

14 Ha umi Tupãnguéra omohendákuri umi tesapeha yvága arapýpe, ha ojapo oñembojaʼo ára pyharégui; ha omohendákuri umívape haʼe hag̃ua umi techaukaha ha arajere, ha ára ha arykuéra;

15 Ha omohenda umíva haʼe hag̃ua tesapeháramo yvága arapýpe, ohesape hag̃ua yvy; ha oiko.

16 Ha umi Tupã omohenda umi mokõi tesape tuicháva, tesape tuichavéva oisãmbyhy hag̃ua ára, ha tesape michĩvéva oisãmbyhy hag̃ua pyhare; ha upe tesape michĩvéva reheve omoĩ avei hikuái mbyjakuéra;

17 Ha umi Tupã omoĩ umívape yvága arapýpe, ohesape hag̃ua yvy, ha oisãmbyhy hag̃ua ára ha pyhare ári, ha oñembojaʼo hag̃ua tesape pytũmbykuéragui.

18 Ha umi Tupã omaʼẽ umi mbaʼe omandavaʼekuére, iñeʼẽrendu peve umíva.

19 Ha ojehu kaʼaru guive pyhareve peve haʼe pyhare; ha ojehu pyhareve guive kaʼaru peve haʼe ára; ha haʼékuri irundyha jeyve.

20 Ha umi Tupã heʼi: Ñambosakoʼi umi y omoheñói heta hag̃ua tekovekuéra omýiva oikovéva; ha guyrakuéra, oveve hag̃ua yvága arapy guasúre.

21 Ha umi Tupã ombosakoʼi ykuéra omoheñói hag̃ua umi piraguasu tuichaitéva ha opa tekove oikove ha omýiva, umi y heta omoheñóitava, heseguáicha; ha opa guyra ipepóva, heseguáicha. Ha umi Tupã ohechákuri oñeñeʼẽrenduha hesekuéra, ha iplan oĩporãha.

22 Ha umi Tupã heʼi: Jahovasáta umívape, ha jahejáta taheñói ha toñemboheta, ha tomyenyhẽ umi y yguasúpe, térã, ykuéra tuicháva; ha jahejáta umi guyra toñemboheta yvy ári.

23 Ha ojehu kaʼarupytũ guive pyhareve peve ohenói hikuái pyhare; ha ojehu pyhareve guive kaʼarupytũ meve ohenói hikuái ára; ha haʼékuri kínto jeyve.

24 Ha umi Tupã ombosakoʼíkuri yvy omoheñói hag̃ua mymba oikovéva, heseguáicha, mymbaʼaty ha opa otyryrýva, ha umi tymba yvy arigua heseguáicha; ha oiko, heʼi haguéicha hikuái.

25 Ha umi Tupã omohendákuri yvy omoheñói hag̃ua umi tymba heseguáicha, ha mymbaʼaty heseguáicha; ha opa mbaʼe yvy ári otyryrýva, heseguáicha; ha umi Tupã ohechákuri iñeʼẽrendutaha hikuái.

26 Ha umi Tupã oñomongeta joa ha heʼi: Jaguejy ha jajapo yvypórape ñane raʼangáicha, ñandeichagua; ha ñameʼẽta chupekuéra taʼipuʼaka umi pira yguasupeguáre, umi guyra yvytuguáre, mymbaʼatýre ha opa upe yvýre ha opa mbaʼe yvy ári otyryrývare.

27 Upéicha umi Tupã oguejýkuri omohenda hag̃ua yvypórape haʼangáicha, ojapo hag̃ua umi Tupã raʼangáicha, ojapo hag̃ua chupekuéra kuimbaʼe ha kuña.

28 Ha umi Tupã heʼi: Jahovasáta chupekuéra. Ha umi Tupã heʼi: Jahejáta tomoheñói ha toñemboheta hikuái, ha tomyenyhẽ upe yvy ha tomoĩ ipoguýpe; ha taipuʼaka pirakuéra ypeguáre, guyrakuéra yvytuguáre, ha opa mbaʼe oikovévare, yvy ári omýivare.

29 Ha umi Tupã heʼi: Péina ápe, ñameʼẽta chupekuéra opa kaʼavo oguerekóva yvaraʼỹi, heñóitava opa yvy ape ári, ha opa yvyramáta hiʼátava; héẽ, ñameʼẽta chupekuéra upe yvyramataʼa omeʼẽva yvaraʼỹi; kóva haʼéta chupekuéra ikarurã.

30 Ha opa tymba yvy arigua, opa guyra yvytupegua, ha opa mbaʼe yvy ári otyryrývape, péina ápe, ñameʼẽta tekove, ha avei, ñameʼẽta chupekuéra opa kaʼavo rovyũ tembiʼúramo, ha kóicha oñemohendáta opa koʼãva.

31 Ha umi Tupã heʼi: Jajapóta opaite jaʼevaʼekue, ha ñamohendáta umívape; ha péina ápe, iñeʼẽrenduetéta hikuái. Ha ojehu, kaʼarupytũ guive pyhareve peve ohenói hikuái pyhare; ha ojehu, pyhareve guive kaʼarupytũ peve ohenói hikuái ára; ha oipapa hikuái séxto jeyve.