1 Ha péicha ñambopaháta yvy ha yvagakuéra, ha opa umi hekoveaty.

2 Ha umi Tupã heʼi ojupe: Sétimo árape ñambopaháta ñane rembiapo, pe jaʼe haguéicha; ha sétimo árape japytuʼúta opa ñanerembiapo jaʼevaʼekuégui.

3 Ha sétimo árape umi Tupã heʼíkuri, upe sétimo árape opytuʼútagui hikuái opa hembiapokuéragui, (umi Tupã) pe heʼivaʼekue ojupe ojapotaha; ha osantifika upéva. Ha péicha idesisiõkuéra ára heʼírõguare hikuái ojupe ojapotaha yvagakuéra ha yvy.

4 Ha umi Tupã oguejy ha ojapókuri koʼã yvága ha yvy apoʼypy, ojejaporõguare umíva upe ára umi Tupã ojaporõguare yvy ha yvagakuéra,

5 Heʼihaichaite hikuái, opa ñumegua kaʼavo oĩ mboyve yvy ári, ha opa ñumegua ñanaraʼỹi okakuaa mboyve; umi Tupã nomboúiguikuri ama yvy ári heʼirõguare ojapotaha koʼãva, ha ndojapói gueteri yvypórape oñemitỹ hag̃ua yvy.

6 Ha katu yvýgui ojupi peteĩ ytimbo, ha omyakỹ opa pe yvy ape.

7 Ha umi Tupã ojapo yvypórape yvytimbógui, ha ojapyhy ijespíritu (kóva haʼe, yvypóra espíritu), ha omoĩ hyepýpe; ha oipeju itĩme tekove pytu, ha yvypóragui oiko ánga oikovéva.

8 Ha umi Tupã oñotỹ peteĩ yvotyty Edén kuarahyreiképe, ha upépe omoĩ hikuái yvypórape, pe ijespíritu omoĩvaʼekue hikuái upe tete ojapovaʼekue ryepýpe.

9 Ha umi Tupã ojapo taheñói yvýgui opa yvyramáta ombohorýva tesa ha iporãva hiʼupyrã; ha avei yvyramáta tekove rehegua pe yvotyty mbytépe, ha yvyramáta kuaapy iporãva ha ivaíva rehegua.

10 Oĩvaʼekue peteĩ ysyry Edén-gui osyrýva omyakỹ hag̃ua pe yvotyty, ha upégui isarambi oikóvo chugui irundy ysyry.

11 Ha umi Tupã ojapyhýkuri yvypórape ha omoĩ chupe Jardín de Edén-pe, oñemitỹ hag̃ua ipype ha oñangareko hag̃ua hese.

12 Ha umi Tupã omandákuri yvypórape, heʼívo: Opaite yvyramáta yvotytyguágui ikatu reʼu,

13 Ha katu yvyramáta kuaapy iporãva ha ivaíva reheguágui ndereʼumoʼãi; ára reʼu vove chugui, añetehápe remanóta. Koʼág̃a, che, Abraham, ahechákuri haʼeha Ñandejára áraicha, haʼéva Kólob áraicha; upe ára peve umi Tupã neʼĩrã gueteri omeʼẽ Adán-pe hiʼára jeipapa.

14 Ha umi Tupã heʼi: Jajapo peteĩ pytyvõha porã kuimbaʼépe, naiporãigui kuimbaʼe oĩ haʼeño; upévare, jajapóta chupe g̃uarã peteĩ pytyvõha porã.

15 Ha umi Tupã ojapo toʼa Adán ári peteĩ topehýi mbarete, ha haʼe oke; ha ojapyhy hikuái peteĩ ikostílla ha omboty hendaguépe upe hoʼo;

16 Ha pe kostíllagui umi Tupã oipevaʼekue kuimbaʼégui, ojapo haʼekuéra peteĩ kuña, ha ogueru chupe kuimbaʼépe.

17 Ha Adán heʼi: Kóva ningo umi che kangue kangue, ha che roʼo roʼo; koʼág̃a oñehenóita chupe Kuña, ojepeʼágui kuimbaʼégui;

18 Upévare, kuimbaʼe ohejavaʼerã itúva ha isy, ha ojoaju hembirekóre; ha haʼéta hikuái peteĩ toʼo año.

19 Ha mokõive ijopívo, upe kuimbaʼe ha hembireko, ha nahiʼõtĩri hikuái.

20 Ha yvýgui umi Tupã ojapókuri opa tymba ñumegua ha opa guyra yvytupegua, ha ogueru hikuái Adán-pe ohecha hag̃ua mbaʼéichapa ombohérata umíva; ha Adán omboheraháicha opa tekove oikovéva, upéichata herakuéra.

21 Ha Adán ombohéra opa mymbaʼaty, guyrakuéra yvytupegua, ha opa mymba ñumegua; ha ojejuhúkuri peteĩ pytyvõha porã chupe g̃uarã.