1 Koʼág̃a, Tupã Ñandejára ombopohyive ñembyahýi Ur retãme, upévare omano Harán, che joykeʼy; ha katu che ru Taré, oiko gueteri Ur, caldeo-kuéra retãme.

2 Ha ojehu che, Abraham, ajapyhy che rembirekorã Sarai-pe, ha Nacor, che joykeʼy, ojapyhy hembirekorã Milca-pe, haʼéva Harán rajy.

3 Koʼág̃a, Ñandejára heʼíkuri chéve: Abraham, esẽ ne retãgui, ha umi ne hénte ag̃uigui ha nde ru rógagui, peteĩ tetã Che ahechaukátavape ndéve.

4 Upévare, che asẽkuri Ur, caldeo-kuéra retãgui, aha hag̃ua Canaán retãme; ha agueraha Lot, che joykeʼy raʼy, ha hembireko ha Sarai, che rembirekópe; ha che ru chesegi avei, tetã rohenóiva Harán peve.

5 Ha saʼive ñembyahýi; ha che ru opyta Harán-pe ha oiko upépe, oĩgui heta mymbaʼaty Harán-pe; ha che ru ojere jey itaʼangarayhúpe, upévare haʼe opytánte Harán-pe.

6 Ha katu, che, Abraham ha Lot, che joykeʼy raʼy, roñemboʼe Ñandejárape, ha Ñandejára ojehechauka chéve ha heʼi chéve: Epuʼã ha ejapyhy Lot-pe nendive; Che haʼémagui roguenohẽtaha Harán-gui, ha ajapotaha ndehegui peteĩ minístro regueraha hag̃ua che réra peteĩ pytagua retãme, Che ameʼẽtava mbaʼerepy opaveʼỹva ramo ne ñemoñare nde rireguápe, ohendu vove hikuái che ñeʼẽpu.

7 Che haʼe rupi Ñandejára nde Tupã; aiko yvágape; pe yvy haʼe che pyenda; aipyso che po yguasu ári, ha iñeʼẽrendu che ñeʼẽre; yvytu ha tatágui Che añemombaʼyru; yvytykuérape Che haʼe—Pesẽ koʼágui—ha péina ápe, ojegueraha koʼãva upe yvytujerére, peteĩ tesa pirĩme, sapyʼaitépe.

8 Che réra haʼe Jehová, ha Che aikuaa ipaha iñepyrũmby guive; upévare, che po nemoʼãta.

9 Ha Che ajapóta ndehegui peteĩ tetã tuicháva, ha Che tuichaiterei rohovasáta, ha aikuaaukáta nde réra opa tetãnguéra apytépe, ha nde haʼéta peteĩ jehovasa ne ñemoñare nde rireguápe, ipopekuéra ogueraha hag̃ua hikuái ko ministério ha Sacerdocio opa tetãnguérape;

10 Ha ahovasáta chupekuéra nde réra rupive; opavave omog̃uahẽva ko Evanhélio oñehenóitagui nde rérare; ha ojeipapáta hikuái ne ñemoñaréramo, ha opuʼãta ha nderovasáta hikuái ituvakuéraramo;

11 Ha Che ahovasáta umi nderovasávape, ha amoñeʼẽngáita umi nemoñeʼẽngáivape; ha nde rupi (péva heʼise, nde Sacerdocio-pe), ha ne ñemoñarépe (péva heʼise nde Sacerdocio), Che ameʼẽgui ndéve promésa nde rupi oho memetaha ko derécho, ha ne ñemoñare nde rireguápe, (péva heʼise ñemoñare tee, térã, ñemoñare teteguigua), ojehovasáta opa tetãmegua ogayguakuéra, jepeve Evanhélio jehovasa reheve, haʼéva salvasiõ jehovasakuéra, tekove ijapyraʼỹva jepeve.

12 Koʼág̃a, Ñandejára oñeʼẽmba rire chéve, ha oipeʼa rire hova che renondégui, chehaʼékuri che korasõme: Ne rembiguái nde rekákuri jesarekópe; koʼág̃a rojuhúma;

13 Remboúkuri ne ánhel chemosãso hag̃ua Elkénah tupãnguéragui, ha ajapo porãta ahendúramo ne ñeʼẽpu, upévare, eheja ne rembiguái topuʼã ha toho pyʼaguapýpe.

14 Upéicha, che Abraham, asẽkuri Ñandejára heʼi haguéicha chéve, ha Lot oho chendive; ha che, Abraham, arekókuri sesenta y dos áño asẽrõguare Harán-gui.

15 Ha ajapyhy Sarai-pe, ajapyhyvaʼekue che rembirekorã aikóvo Ur, caldeo-kuéra retãme, ha Lot, che joykeʼy raʼy, ha opa ore mbaʼerepy rombyatyvaʼekue, ha umi ánga roganavaʼekue Harán-pe, ha rojagarra Canaán retã rape, roikóvo ogaʼaópe rojeʼói aja;

16 Upévare, ára apyraʼỹ haʼékuri ore moʼãha ha ore itaguasu ha ore salvasiõ, rohóvo Harán-gui, Jersón rapére, rog̃uahẽ hag̃ua Canaán retãme.

17 Koʼág̃a che, Abraham, amopuʼãkuri peteĩ altar Jersón retãme ha ajapókuri peteĩ temikuaveʼẽ Ñandejárape, ha añemboʼékuri ojei hag̃ua ñembyahýi che ru rógagui, ani hag̃ua omano hikuái.

18 Ha Jersón-gui rohasa upe tetã rupi, rog̃uahẽ meve tenda Siquem-pe; opytáva More yvypépe, ha rog̃uahẽmakuri Cananeo-kuéra retã rembeʼýpe, ha omeʼẽkuri temikuãveʼẽ upépe, More yvypépe, ha ahenói añetékuri Ñandejárape, rog̃uahẽmagui ko tetã itaʼangarayhúva yvýpe.

19 Ha Ñandejára ojehechauka chéve ombohováivo umi che ñemboʼe, ha heʼi chéve: Ne ñemoñarépe Che ameʼẽta ko yvy.

20 Ha che, Abraham, apuʼãkuri upe tenda amopuʼã haguégui peteĩ altar Ñandejárape, ha aha upégui peteĩ yvytýpe, Betel kuarahyresẽme, ha amoĩ upépe che rógaʼao, oĩvo Betel kuarahyreiképe ha Hai kuarahyresẽme; ha upépe amopuʼã ambue altar Ñandejárape, ha ahenói jey Ñandejára réra.

21 Ha che, Abraham, ajeʼóikuri, aha memévo sur gotyo; ha oĩnte gueteri ñembyahýi upe tetãme; ha Che, Abraham, haʼe chejupe aguejytaha Egipto-pe, aiko hag̃ua upépe, ivaietégui pe ñembyahýi.

22 Ha ojehu che ag̃uímavo, aike potávo Egipto-pe, Ñandejára heʼi chéve: Péina ápe, Sarai ne rembireko ningo iporã;

23 Upévare, ojehúta Egipcio-kuéra ohechávo chupe, heʼíta hikuái—Hembireko ningo haʼe; ha ndejukáta hikuái, ha katu ndojukamoʼãi hikuái chupe; upévare, kóicha rejapóta:

24 Teʼi haʼe Egipcio-kuérape ne reindyha, ha oikovéta ne ánga.

25 Ha ojehu che, Abraham, haʼékuri Sarai, che rembirekópe, opa Ñandejára heʼivaʼekue chéve—Upévare, ajerure ndéve, ere hag̃ua chupekuéra nde che reindyha, ohoporã hag̃ua chéve nde rupi, ha toikove che ánga nde rupive.